អឺរ៉ុបព្រមព្រៀងលើកញ្ចប់ថវិកាជួយក្រិក ដោយមានវិភាគទានពីអ្នកវិនិយោគឯកជន
ក្រោយពីបញ្ចប់ជំនួបកំពូល កាលពីថ្ងៃព្រហស្បតិ៍ ២១ កក្កដា ២០១១ ប្រទេសសមាជិកតំបន់អឺរ៉ូ (ប្រទេសចាយលុយអឺរ៉ូ) ទាំង ១៧ប្រទេស បានព្រមព្រៀងគ្នា លើកញ្ចប់ថវិកា ដើម្បីជួយប្រទេសក្រិកពីវិបត្តិបំណុល។ កញ្ចប់ថវិកាថ្មីនេះ គិតជាទឹកប្រាក់ជាង ១៥៨ពាន់លានអឺរ៉ូ ក្នុងនោះ ក៏មានចំណែកអ្នកវិនិយោគឯកជនដែលជាម្ចាស់បំណុលក្រិកផងដែរ។ ការណ៍ដែលម្ចាស់បំណុលក្រិកត្រូវចូលរួមវិភាគទាននេះ ត្រូវបានគេចាត់ទុកថា អឺរ៉ុបបណ្តោយឲ្យក្រិក “ក្ស័យធនមួយផ្នែក”។
ចុះផ្សាយនៅថ្ងៃ៖
ស្តាប់ - ០៥:២៩
តាំងពីវិបត្តិបំណុលក្រិកបានចាប់ផ្ទុះឡើងមក ប្រទេសក្នុងតំបន់អឺរ៉ូបានព្យាយាមស្វែងរកគ្រប់ដំណោះស្រាយ ដើម្បីបញ្ចៀសកុំឲ្យក្រិកក្ស័យធន។ កាលពីខែឧសភា ឆ្នាំ២០១០កន្លងទៅនេះ អឺរ៉ុបបានអនុម័តកញ្ចប់ថវិកា ចំនួន ១១០ពាន់លានអឺរ៉ូម្តងរួចមកហើយ ដើម្បីជួយដោះបំណុលក្រិក។ ប៉ុន្តែ ទឹកប្រាក់នេះមិនគ្រប់គ្រាន់ ដើម្បីជួយក្រិកចេញពីវិបត្តិបានទេ។ ក្រោយពីឆ្លងកាត់ការចរចាយ៉ាងស្វិតស្វាញ អឺរ៉ុបបានព្រមព្រៀងជួយក្រិកជាលើកទីពីរ ក៏ប៉ុន្តែ បានសម្រេចថាទុកឲ្យក្រិកក្ស័យធនមួយផ្នែក។
ក្នុងកញ្ចប់ថវិកាចំនួន ១៥៨ពាន់លានអឺរ៉ូ ដែលអនុម័ត កាលពីថ្ងៃព្រហស្បតិ៍នេះ ថវិកាបានមកពីរដ្ឋជាសមាជិកតំបន់អឺរ៉ូ មានចំនួន ១០៩ពាន់លានអឺរ៉ូ។ ក្រៅពីបានផ្តល់ប្រាក់កម្ចីបន្ថែម អឺរ៉ុបបានចាត់វិធានការបន្ថែមមួយចំនួនទៀត ដើម្បីសម្រាលបំណុលក្រិក។
ទីមួយ ឥណប្រតិទាននៃបំណុលក្រិក (ពេលកំណត់ត្រូវសងបំណុល) ដែលបច្ចុប្បន្នមានរយៈពេល ៧ឆ្នាំកន្លះ នឹងត្រូវពន្យារពេលដល់ ពី ១៥ឆ្នាំ ទៅ៣០ឆ្នាំ មានន័យថា បំណុលដែលអឺរ៉ុបឲ្យក្រិកខ្ចីនៅពេលនេះ រហូតដល់ឆ្នាំ២០៤១ ទើបក្រិកត្រូវសងមកវិញ។
ទីពីរ អត្រាការប្រាក់នៃកម្ចីនេះ នឹងត្រូវបញ្ចុះមកនៅកម្រិតទាបបំផុត ពោលគឺ ត្រឹមតែ ៣,៥% ប៉ុណ្ណោះ ធៀបនឹង ៤,៥%-៥,៨% កាលពីមុន។
បន្ថែមពីលើនេះ អឺរ៉ុបនឹងរៀបចំកំណត់ផែនការ ដើម្បីជួយជំរុញសេដ្ឋកិច្ចឲ្យមានកំណើន។ ខ្លឹមសារលម្អិតនៃផែនការនេះ នឹងត្រូវអឺរ៉ុបលើកយកទៅជជែកគ្នា នៅពេលក្រោយ។
ចំពោះវិស័យឯកជនវិញ ម្ចាស់បំណុលក្រិក នឹងត្រូវចូលរួមវិភាគទាន ក្នុងផែនការសង្រ្គោះក្រិក តាមរូបភាពបី៖
- ពន្យារពេលឥណប្រតិទាននៃបំណុលក្រិក ពី ១៥ ទៅ ៣០ឆ្នាំ។
- កាត់បន្ថយអត្រាការប្រាក់ពី ១៥% ទៅ ២៥% ធៀបនឹងអត្រាការប្រាក់ ដែលបានព្រមព្រៀងគ្នាពីមុន
- កាត់បន្ថយបរិមាណបំណុលដែលក្រិកជំពាក់ចំនួន ២០%
ការចូលរួមវិភាគទានរបស់អ្នកវិនិយោគឯកជននឹងត្រូវធ្វើឡើង តាមគោលការណ៍ស្ម័គ្រចិត្ត។ ក៏ប៉ុន្តែ ចំពោះអ្នកវិនិយោគណា ដែលសុខចិត្តចូលរួមវិភាគទាន នឹងទទួលបានការធានាបំណុល ពីសំណាក់មូលនិធិពិសេសរបស់អឺរ៉ុប។ នេះមានន័យថា អ្នកវិនិយោគណា ដែលសុខចិត្តកាត់បន្ថយបំណុល កាត់បន្ថយអត្រាការប្រាក់ ឬពន្យារពេលឥណប្រតិទាននៃបំណុលក្រិក បើទោះជាក្រិកមិនមានលទ្ធភាពសងបំណុល ក៏តំបន់អឺរ៉ូនឹងទទួលរ៉ាប់រងសងបំណុលជំនួសក្រិកដែរ។
រដ្ឋមន្រ្តីក្រសួងសេដ្ឋកិច្ចក្រិក បានមានប្រសាសន៍ថា កញ្ចប់ថវិកា ដែលអឺរ៉ុបបានព្រមព្រៀងគ្នា កាលពីថ្ងៃព្រហស្បតិ៍នេះ អាចបំពេញតម្រូវការចំណាយរបស់ក្រិក រហូតដល់ឆ្នាំ២០២០។ ចំណែកបំណុលរបស់ក្រិកវិញ ក៏នឹងអាចកាត់បន្ថយបានប្រមាណ ៤% ដែរ ពោលគឺ កាត់បន្ថយ ១៣ពាន់ ៥រយលានអឺរ៉ូ ពីបំណុលសរុប ៣៤០ពាន់លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ