ទីផ្សារមូលបត្រអឺរ៉ុបជ្រួលច្របល់ដោយបារម្ភអំពីជោគវាសនាធនាគារបារាំង
ការព្រួយបារម្ភអំពីស្ថានភាពហិរញ្ញវត្ថុ នៅអឺរ៉ុប បានកើតមានកាន់តែខ្លាំង កាលពីថ្ងៃអាទិត្យ ១១ កញ្ញា ២០១១ ក្រោយពីមានលេចឮព័ត៌មានជុំវិញហានិភ័យនៃធនាគារធំៗរបស់បារាំង និងដោយសារតែភាពមន្ទិលសង្ស័យជុំវិញឆន្ទៈរបស់រដ្ឋាភិបាលអាល្លឺម៉ង់ ក្នុងការជួយក្រិកឲ្យចៀសផុតពីការក្ស័យធន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៨
នៅពេលចាប់ផ្តើមបើកទ្វារលក់ដូ នៅព្រឹកថ្ងៃចន្ទនេះ ទីផ្សារមូលបត្រនៅប៉ារីសបានធ្លាក់ចុះជាង ៤% ក្នុងនោះ ភាគហ៊ុនរបស់ធនាគារមានការធ្លាក់ចុះខ្លាំងជាងគេ (ខ្លះធ្លាក់រហូតដល់ទៅ ១០%)។
កាលពីថ្ងៃអាទិត្យ ម្សិលមិញ មានលេចឮព័ត៌មានថា នៅថ្ងៃព្រហស្បតិ៍ខាងមុខនេះ ទីភ្នាក់ងារវាយតម្លៃហានិភ័យឥណទាន ឈ្មោះ Moody’s នឹងទម្លាក់ចំណាត់ថ្នាក់ឥណទានធនាគារឯកជន ចំនួន ៣ គឺ PNB Paribas, Société Général និង Crédit Agricole ដែលសុទ្ធសឹងជាធនាគារធំៗបំផុតរបស់បារាំង។ ធនាគារទាំងនេះបានផ្តល់ប្រាក់កម្ចីរាប់ពាន់លានអឺរ៉ូ ទៅឲ្យរដ្ឋាភិបាល និងក្រុមហ៊ុនក្រិក។ នៅពេលដែលស្ថានភាពហិរញ្ញវត្ថុក្រិកកំពុងតែខិតកាន់តែជិតដល់ការក្ស័យធន ធនាគារដែលជាម្ចាស់បំណុលក្រិក ក៏ត្រូវប្រឈមមុខនឹងការខាតបង់ច្រើនដែរ។
នៅថ្ងៃចន្ទនេះ អាជ្ញាធរបារាំងបានអះអាងថា បើទោះជាក្រិកក្ស័យធន ក៏ធនាគារបារាំងមានទុនគ្រប់គ្រាន់ ក្នុងការទប់ទល់នឹងការខាតបង់ដែរ។ ក៏ប៉ុន្តែ ការអះអាងនេះហាក់ដូចជាមិនអាចរំងាប់ការព្រួយបារម្ភរបស់អ្នកវិនិយោគបានទេ។ តម្លៃភាគហ៊ុនធនាគារបារាំង នៅតែបន្តធ្លាក់ចុះដដែល នៅថ្ងៃចន្ទនេះ។
ការព្រួយបារម្ភទៅលើស្ថានភាពហិរញ្ញវត្ថុធនាគារបារាំង បានមកបន្ថែមលើបញ្ហាជាច្រើន ដែលអឺរ៉ុបកំពុងជួបប្រទះ។ សមាជិកក្រុមប្រឹក្សាភិបាលធនាគារសហភាពអឺរ៉ុបម្នាក់បានប្រកាសលាលែងចេញពីតំណែង កាលពីសប្តាហ៍មុន ដោយសារតែមានការខ្វែងគំនិតគ្នា ជុំវិញកម្មវិធីទិញមូលបត្របំណុលរបស់រដ្ឋសមាជិក។ ការខ្វែងគំនិតគ្នានេះបានធ្វើឲ្យអ្នកវិនិយោគលែងមានទំនុកចិត្តថា ធនាគារកណ្តាលអឺរ៉ុបអាចចាត់វិធានការធំៗ ដើម្បីជួយឲ្យអឺរ៉ុបចេញពីវិបត្តិ។
ក្នុងពេលជាមួយគ្នានេះ គេសង្កេតឃើញថា រដ្ឋាភិបាលអាល្លឺម៉ង់ក៏ហាក់ដូចជាលែងចង់ផ្តល់លុយជួយក្រិកទៀតដែរ។ រដ្ឋមន្រ្តីក្រសួងហិរញ្ញវត្ថុអាល្លឺម៉ង់បានបង្ហើបឲ្យដឹងថា អាល្លឺម៉ង់អាចនឹងសុខចិត្តទុកឲ្យក្រិកក្ស័យធន។ រដ្ឋាភិបាលអាល្លឺម៉ង់ទំនងជាកំពុងរៀបចំផែនការ ដើម្បីប្រុងប្រៀបខ្លួនជាមុនទប់ទល់នឹងករណីដែលក្រិកត្រូវក្ស័យធន ជាពិសេស ការជួយធនាគារឯកជនអាល្លឺម៉ង់ ដែលមានជាប់ពាក់ព័ន្ធនឹងបំណុលក្រិក។
នៅថ្ងៃពុធនេះ មន្រ្តីមកពីស្ថាប័ន៣ គឺ គណៈកម្មការអឺរ៉ុប ធនាគារកណ្តាលអឺរ៉ុប និងមូលនិធិរូបិយវត្ថុអន្តរជាតិ នឹងធ្វើដំណើរទៅកាន់ប្រទេសក្រិក ដើម្បីពិនិត្យមើលថា តើរដ្ឋាភិបាលក្រិកបានកាត់បន្ថយឧនភាពថវិកាទៅតាមការសន្យាដែរឬទេ? ប្រសិនបើរដ្ឋាភិបាលក្រិកមិនបំពេញតាមការសន្យានេះទេ ក្រិកមិនអាចទទួលជំនួយពីសហភាពអឺរ៉ុប និងមូលនិធិរូបយវត្ថុអន្តរជាតិបាននោះទេ។ នៅថ្ងៃចន្ទនេះ រដ្ឋាភិបាលក្រិកបានឲ្យដឹងថា ក្រិកមានលុយសម្រាប់ចាយត្រឹមខែតុលាប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ