អតីតនាយករដ្ឋមន្ត្រីព័រទុយហ្កាល់Guterres អាចកាន់តំណែងអគ្គលេខាធិការអ.ស.ប. បន្តពីលោកបាន គីមូន
ថ្ងៃព្រហស្បតិ៍នេះ ក្រុមប្រឹក្សាសន្តិសុខអង្គការសហប្រជាជាតិ នឹងបោះឆ្នោតជាផ្លូវការ ជ្រើសរើស អគ្គលេខាធិការអង្គការ ដែលត្រូវបន្តពីលោកបាន គីមូន ចាប់ពីថ្ងៃ១មករា ឆ្នាំ២០១៧។ ក្រុមប្រឹក្សាសន្តិសុខអង្គការសហប្រជាជាតិប្រហែលអាចនឹងជ្រើសរើសបេក្ខជនព័រទុយហ្កាល់ នោះគឺអតីតនាយករដ្ឋមន្ត្រីព័រទុយហ្កាល់ អង់តូនីញ៉ូ ហ្គូទែររ៉េស Antonio Guterres។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ថ្ងៃពុធម្សិលមិញ ក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតមិនផ្លូវការ ដើម្បីសម្រេចថា តើបេក្ខជនណា អាចឡើងកាន់តំណែងអគ្គលេខាធិការអង្គការសហប្រជាជាតិ បន្តពីលោកបាន គីមូន ចាប់ពីថ្ងៃ១មករា ឆ្នាំក្រោយនេះ។
យោងតាមរុស្ស៊ី ការបោះឆ្នោតមិនផ្លូវការនេះ បង្ហាញថា លោកអង់តូនីញ៉ូ ហ្គូទែររ៉េស ជាអតីតនាយករដ្ឋមន្ត្រីព័រទុយហ្កាល់ ជាបេក្ខជននាំមុខគេ។ លោកអាចនឹងត្រូវក្រុមប្រឹក្សាសន្តិសុខអង្គការសហប្រជាជាតិបោះឆ្នោត ជាផ្លូវការ ថ្ងៃព្រហស្បតិ៍នេះ អោយជាប់ឈ្មោះជាប្រធានថ្មីនៃអង្គការសហប្រជាជាតិ។ អតីតនាយករដ្ឋមន្ត្រីព័រទុយហ្កាល់ហ្គូទែររ៉េស ក៏ជាបេក្ខជននាំមុខគេដែរ ក្នុងការបោះឆ្នោត៥ដងកន្លងមក។ ក្នុងការបោះឆ្នោត២ដងកន្លងមក សមាជិកក្រុមប្រឹក្សាសន្តិសុខអ.ស.ប ១២ប្រទេស ក្នុងចំណោម១៥ប្រទេស បានលើកទឹកចិត្តដល់លោក។
គួរបញ្ជាក់ថា បេក្ខជននិងបេក្ខនារី ឈរឈ្មោះសម្រាប់តំណែងអគ្គលេខាធិការអង្គការសហប្រជាជាតិ បន្តពីលោកបាន គីមូន មានសរុប១០នាក់។ ពួកគេមកពីប្រទេសដូចជា អាហ្សង់ទីន ប៊ុលហ្ការី ស្លូវ៉ាគី ម៉ុលដាវី រឺក៏ម៉ាសេដូនី។
ក្នុងការបោះឆ្នោតមិនផ្លូវការម្សិលមិញនេះ សមាជិកអចិន្ត្រៃយ៍ទាំង៥នៃអង្គការសហ ប្រជាជាតិ មានរុស្ស៊ី អាមេរិក បារាំង អង់គ្លេស និងចិន បានប្រើសន្លឹកឆ្នោតមានពណ៌ខុសៗគ្នា ដូច្នេះ គេអាចដឹងថា សមាជិកណាខ្លះមិនពេញចិត្តបេក្ខភាពរបស់អតីតនាយករដ្ឋមន្ត្រីព័រទុយហ្កាល់ ហ្គូទែររ៉េស។ ការបោះឆ្នោតកន្លងមក ទាំងសមាជិកអចិន្ត្រៃយ៍៥ប្រទេស និងមិនអចិន្ត្រៃយ៍១០ប្រទេស សុទ្ធតែប្រើសន្លឹកឆ្នោតមានពណ៌តែមួយដូចគ្នា។
លោកហ្គូទែររ៉េស អាយុ៦៧ឆ្នាំ ជាអតីតនាយករដ្ឋមន្ត្រីព័រទុយហ្កាល់ ពីឆ្នាំ១៩៩៥ ដល់ឆ្នាំ២០០២។ លោកធ្លាប់កាន់តំណែងប្រធានឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន រយៈពេល១០ឆ្នាំ។ បើលោកជាប់ឆ្នោតជាប្រធានអ.ស.ប.ថ្មី លោកនឹងក្លាយជាប្រធានអសប ដំបូងគេ ដែលធ្លាប់ធ្វើជាប្រមុខដឹកនាំរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ