Des Frères musulmans៖ គ្មានបដិវត្តន៍អ៊ីស្លាម នៅអេហ្ស៊ីព្ទ
ចុះផ្សាយនៅថ្ងៃ៖
ស្តាប់ - ០៦:៣៩
នៅថ្ងៃសៅរ៍ទី ៥ កុម្ភៈ ជនមិនស្គាល់មុខបានបំផ្ទុះបំពង់បង្ហូរឧស្ម័នពីប្រទេសអេហ្ស៊ីព្ទទៅហ្សកដានី។ ទូរទស្សន៍រដ្ឋបានផ្សព្វផ្សាយថា នេះជាស្នាដៃរបស់ពួកភេរវករដែលចង់បង្កអសន្តិសុខក្នុងប្រទេស។ ព្រឹត្តិការណ៍ហាក់បញ្ជាក់សំដីរបស់ ប្រធានាធិបតីមូបារ៉ាក់ដែល កាលពីថ្ងៃព្រហស្បតិ៍ទី ៣ កុម្ភៈ និយាយថា បើគាត់ចុះចេញ នោះប្រទេសនឹងជួបចលាចល។
បើតាមអង្គការស្រាវជ្រាវលើប្រព័ន្ធអ៊ិនធ័រណេត និងតាមដានទៅលើសកម្មភាពរបស់បណ្តាញអាល់កៃដា ការបំផ្ទុះបំពង់បង្ហូរឧស្ម័នលើកនេះ មនុស្សមួយក្រុមបានជម្រុញលើកទឹកចិត្តឲ្យសកម្មជនអ៊ីស្លាមវាយប្រហារទៅលើបំពង់បង្ហូរឧស្ម័ន នៅភាគខាងលិចអេហ្ស៊ីព្ទ ឈ្មោះថា Sinaiខាងជើង។ តំបន់Sinai ជាតំបន់វាលខ្សាច់ដែលសំបូរទៅដោយក្រុមជួញដូរទុច្ចរិត។ ហើយបើតាមអង្គការស្រាវជ្រាវ SITE ខាងលើ ក្រុមអ៊ីស្លាមជ្រុលនិយមJihadists ជាអ្នកជម្រុញឲ្យសកម្មជនអ៊ីស្លាមនៅSinai ឆ្លៀតពេលអេហ្ស៊ីព្ទមានវិបត្តិនយោបាយបច្ចុប្បន្នវាយប្រហារទៅលើបំពង់បង្ហូរប្រេង ដែលគេជឿជាក់ថា ជាបំពង់បង្ហូរឧស្ម័នទៅប្រទេសអ៊ីស្រាអែល។
ការពាក់ព័ន្ធរបស់ក្រុមអ៊ីស្លាមក្នុងព្រឹត្តិការណ៍បំផ្ទុះប្រេងលើកនេះរឹតតែធ្វើឲ្យគេបារម្ភពីវត្តមាន របស់ចលនាអ៊ីស្លាម ជ្រុលនិយមនៅអេហ្ស៊ីព្ទ ជាពិសេស នៅពេលចលនាDes Frères musulmans បានចូលរួមកាន់តែច្រើនតវ៉ា ជាមួយបាតុករ នៅថ្ងៃសុក្រ ទី ៤ កុម្ភៈ។ អាមេរិក និងអ៊ីស្រាអែលនៅតែខ្លាចថា ស្ថានភាពរបស់អេហ្ស៊ីព្ទនឹងអាចវិវឌ្ឍដូចជានៅអៀរ៉ង់ នៅឆ្នាំ ១៩៧៩។ ឆ្នាំនោះ អាមេរិកបានបោះបង់ចោលស្តេច Chah និងទុកឱកាសឲ្យពួកអ៊ីស្លាមជ្រុលនិយមធ្វើបដិវត្តន៍អ៊ីស្លាម និងឡើងកាន់អំណាចនៅអៀរ៉ង់។ ហើយ កាលពីថ្ងៃព្រហស្បតិ៍ ប្រមុខដឹកនាំសាសនាអៀរ៉ង់ ក៏បានអំពាវនាវតាំងពីទីក្រុងតេអេរ៉ង់ ឲ្យពួកអ៊ីស្លាមនៅអេហ្ស៊ីព្ទ និងធ្វើបដិវត្តន៍អ៊ីស្លាម ដូចជាអៀរ៉ង់។
ប៉ុន្តែ ការអំពាវនាវនេះនៅមិនទាន់បានបង្កឲ្យមានការរំជើបរំជួលក្នុងប្រទេសអេហ្ស៊ីព្ទ នៅឡើយទេ។ ហើយគេក៏មិនសង្ឃឹមថា នឹងមានដែរបដិវត្តន៍អ៊ីស្លាម ដូចនៅអៀរ៉ង់ទេ។ អ្នកនាំពាក្យរបស់ចលនា Des Frères musulmansបានបញ្ជាក់ហើយបញ្ជាក់ទៀត ជា ពិសេសនៅថ្ងៃនេះ ថា ចលនារបស់ខ្លួនមិនចង់ឲ្យ បដិវត្តន៍ក្នុងប្រទេសអេហ្ស៊ីព្ទបច្ចុប្បន្ន ក្លាយជាបដិវត្តន៍អ៊ីស្លាមទេ។ ដើម្បីធានាកុំឲ្យមានការបារម្ភពីការរីកសាយធំ អ៊ីស្លាមជ្រុលនិយមនៅអេហ្ស៊ីព ចលនា Des Frères musulmansបានសន្យាហើយថា ខ្លួននឹងមិនឈរឈ្មោះជាបេក្ខជនក្នុងការបោះឆ្នោតប្រធានាធិបតី នៅក្រោយពេលលោកមូបារ៉ាក់ ចុះចេញពីអំណាច។
អេហ្ស៊ីព្ទនឹងមិនអាចក្លាយជាប្រទេសដឹកនាំដោយក្រុមអ៊ីស្លាមជ្រុលនិយម ដូចការនិយាយបង្អើលរបស់លោកមូបារ៉ាក់ ឬរបស់ប្រទេសអ៊ីស្រាអែលដែរ។ នោះគឺត្រង់ថា បើទោះបីជាក្រុមបក្សប្រឆាំងចង់ចូលរួមក្នុងការបោះឆ្នោត បន្ទាប់មកឈ្នះឆ្នោត ក៏ចលនា Des Frères musulmansមិនអាចឡើងកាន់អំណាចទាំងស្រុង ដែរ ពីព្រោះពួកទាហានដែលមានអំណាចខ្លាំង ពិតជាមិនយល់ព្រមឡើយ។ ទាំងនេះខុសពីស្ថានភាពនៅអៀរ៉ង់ ព្រោះនៅក្រោយបដិវត្តន៍ភ្លាម មេដឹកនាំសាសនាជាអ្នកជ្រើសរើសមេទ័ព និងប្រធានាធិបតី បើទោះបីជាមានការបោះឆ្នោតក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ