វិបត្តិអេហ្ស៊ីព្ទ៖ “ថ្ងៃចុងក្រោយ” របស់លោកមូបារ៉ាក់
នៅថ្ងៃសុក្រ ៤ កុម្ភៈ ២០១១នេះ ក្រុមបាតុករប្រឆាំងរាប់សិបម៉ឺននាក់កំពុងប្រមូលផ្តុំគ្នានៅក្នុង ទីក្រុងគែរ ដើម្បីធ្វើបាតុកម្មដ៏ធំមួយ ដែលគេប្រសិទ្ធិនាមថា “ថ្ងៃចុងក្រោយ” ដោយសំដៅលើថ្ងៃចុងក្រោយនៃការកាន់អំណាចរបស់លោកមូបារ៉ាក់។ កងទ័ពអេហ្ស៊ីព្ទបានប្រកាសសន្យាជាថ្មីម្តងទៀតថា ពួកគេនឹងមិនប្រើកម្លាំងបង្រ្កាបបាតុករនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
បន្ទាប់ពីការសូត្រធម៌ថ្ងៃសុក្របានបញ្ចប់ ក្រុមបាតុករប្រឆាំងរាប់សិបម៉ឺននាក់បានប្រមូលផ្តុំគ្នានៅ “ទីលានសេរីភាព” ក្នុងទីក្រុងគែរ ដោយស្រែកទាមទារឲ្យលោកហូស្នី មូបារ៉ាក់ ចុះចេញពីតំណែង។
ខុសពីកាលពីរថ្ងៃមុន បាតុកម្មនៅថ្ងៃសុក្រនេះប្រព្រឹត្តទៅដោយគ្មានអំពើហិង្សានោះទេ។ គេក៏មិនឃើញក្រុមគាំទ្រលោកមូបារ៉ាក់ចេញមុខមកតទល់ក្រុមប្រឆាំង ដូចមុនទៀតដែរ។ គេសង្កេតឃើញចំនួនទាហាន ដែលដាក់ពង្រាយនៅកន្លែងធ្វើបាតុកម្មមានការកើនឡើងគួរឲ្យកត់សម្គាល់។
កាលពីយប់ថ្ងៃព្រហស្បតិ៍ លោកមូបារ៉ាក់បានប្រាប់ទូរទស្សន៍ ABC របស់អាមេរិកថា លោកកាន់តំណែងយូរឆ្នាំមកហើយ។ លោកក៏មានការធុញទ្រាន់ ហើយចង់លាឈប់ដែរ។ ក៏ប៉ុន្តែ លោកមិនចង់ចុះចេញពីតំណែងភ្លាមៗពេលនេះ ព្រោះខ្លាចអេហ្ស៊ីព្ទត្រូវធ្លាក់ក្នុងអាណាធិបតេយ្យ។
យោងតាមកាសែត The New York Times ពេលនេះ រដ្ឋាភិបាលរបស់លោកអូបាម៉ាកំពុងតែពិភាក្សាជាមួយមេទ័ពអេហ្ស៊ីព្ទ ដើម្បីរកវិធីធ្វើយ៉ាងណា រុញលោកមូបារ៉ាក់ឲ្យចុះចេញពីតំណែង ហើយឲ្យលោកស៊ូលេម៉ាន់ អនុប្រធានាធិបតី ឡើងកាន់តំណែងជាប្រធានាធិបតីស្តីទី រហូតដល់ពេលរៀបចំបោះឆ្នោតប្រធានាធិបតីថ្មី។ គួររំឭកឡើងវិញថា អាមេរិកមានឥទ្ធិពលលើអេហ្ស៊ីព្ទ ពីព្រោះ ក្នុងមួយឆ្នាំៗ អាមេរិកផ្តល់ជំនួយប្រមាណ ១ពាន់ ៥រយលានដុល្លារ ទៅឲ្យអេហ្ស៊ីព្ទ ភាគច្រើនជាជំនួយយោធា។
អាមេរិកក៏បានធ្វើការថ្កោលទោសរដ្ឋាភិបាលអេហ្ស៊ីព្ទផងដែរ ចំពោះការធ្វើទុក្ខបុកម្នេញលើអ្នកកាសែតបរទេស ក្នុងរយៈពេល ២ថ្ងៃកន្លងទៅនេះ។ អ្នកកាសែតមកពី CNN, BBC, ABC, Alzazeera, New York Times, France 24 ព្រមទាំងអ្នកកាសែតបរទេសជាច្រើននាក់ផ្សេងទៀតត្រូវ ទទួលរងការវាយប្រហារពីសំណាក់បាតុករ ឬត្រូវអាជ្ញាធរចាប់ឃុំខ្លួន។ យោងតាមរដ្ឋាភិបាលអាមេរិក ការវាយប្រហារលើអ្នកកាសែតបរទេស គឺជាទង្វើ ដែលមានការរៀបចំចាត់ចែងច្បាស់លាស់ ហើយទំនងជាផែនការរបស់ក្រសួងមហាផ្ទៃអេហ្ស៊ីព្ទផ្ទាល់តែម្តង។
រដ្ឋាភិបាលមកពីប្រទេសផ្សេងទៀត រួមមាន បារាំង អង់គ្លេស រុស្ស៊ី មន្រ្តីសហភាពអឺរ៉ុប និងអ.ស.ប. សុទ្ធតែបានធ្វើការថ្កោលទោសចំពោះការវាយប្រហារលើអ្នកកាសែតបរទេស ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ