ក្រុមអ្នកគាំទ្រលោកមូបារ៉ាក់ចេញមុខវាយប្រហារមកលើក្រុមប្រឆាំង
ចាប់តាំងពីជាងមួយសប្តាហ៍មកហើយ គេឃើញមានតែក្រុមបាតុករ ធ្វើការតវ៉ាឲ្យលោកប្រធានាធិបតីអេហ្ស៊ីព្ទចុះចេញពីតំណែង។ ប៉ុន្តែ នៅព្រឹកថ្ងៃពុធ ទី ២ កុម្ភៈ ស្រាប់តែ ប្រជាជនមួយក្រុមទៀត បានចេញមុខមក ការពារគាំទ្រ លោក អូស្នី មូបារ៉ាក់ រហូតប៉ះទង្គិចនឹងក្រុមអ្នកប្រឆាំង។ អំពើហិង្សាជាថ្មី តាំងពីយប់ថ្ងៃពុធ រហូតមកដល់ម៉ោង៤ ព្រឹកថ្ងៃព្រហស្បតិ៍ទី ៣កុម្ភៈ បានសម្លាប់ មនុស្សយ៉ាងតិច ៥នាក់ និងរបួសជាង ៨០០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ការពន្យល់របស់ឈាង បុប្ផា
អ្នកដែលចេញមុខគាំទ្រលោកមូបារ៉ាក់មានច្រើនប្រភេទ។ ពួកគេអាចជាប្រជាជនធម្មតា ឬជាមន្ត្រីរដ្ឋការដែលបម្រើការឲ្យរបបលោកមូបារ៉ាក់។ មន្រ្តីរដ្ឋការដែលខ្លាចបាត់បង់ប្រយោជន៍ នៅពេលលោកមូបារ៉ាក់ ធ្លាក់តំណែង បានចេញមុខគាំទ្រលោកមូបារ៉ាក់។ អ្នកមួយចំនួនផ្សេងទៀត ត្រូវគេសង្កេតឃើញថា ជាអ្នកដែលរកស៊ី ខាតបង់ ដោយសារបាត់ភ្ញៀវទេសចរ ក្នុងពេលមានបាតុកម្មនៅទីក្រុងគែរ។
អ្នកដែលប៉ះពាល់ដោយផ្ទាល់ដូចក្រុមអ្នករកស៊ីមានតិចតួច។ ប៉ុន្តែ បើតាមអ្នកកាសែត និងបាតុករប្រឆាំងលោកមូបារ៉ាក់ ដែលនៅនឹងកន្លែងកើតហេតុ ក្រុមអ្នកគាំទ្រលោកមូបារ៉ាក់ ដែលចេញមុខថ្មី ជាមនុស្សដែលលោកមូបារ៉ាក់បានជួល ឲ្យមកធ្វើការប្រឆាំងទប់នឹងបាតុករដែលកំពុងធ្វើការតវ៉ាដោយសន្តិភាពកន្លងមក។
អ្នកកាសែតរបស់Newyork Time បានស្រង់សម្តីរបស់បាតុករគាំទ្រលោកមូបារ៉ាក់ ដែលនិយាយថា ពួកគេបានទទួលលុយ ៥០ Livres គឺតិចជាង ៨,៥ដុល្លារម្នាក់ ដើម្បីធ្វើបាតុកម្មគាំទ្រលោកមូបារ៉ាក់។ ចំណែកក្រុមបាតុករប្រឆាំងខ្លះនិយាយថា ពួកអ្នកគាំទ្រលោកមូបារ៉ាក់ សុទ្ធជាពួកយូកូង ជនពាល ឬជាពួកអ្នកទោសដែលពួកគេបានប្រើឲ្យមកបង្រ្កាបក្រុមបាតុករ។ ពួកទាំងនេះមានកាន់កាំបិត ប្រើដំបងឈើ និងដែកវាយសំពងលើក្រុមអ្នកប្រឆាំង។ ជាពិសេសទៅទៀត ក្រុមបាតុកប្រឆាំងបានចោទថា មានពួកប៉ូលិសស្លៀកពាក់ស៊ីវិលបានបង្កប់ខ្លួន និងចូលជាមួយក្រុមគាំទ្រលោកមូបារ៉ាក់។ ក្រុមអ្នកប្រឆាំងនិយាយថា មានគ្រាប់កាំភ្លើងមែនទែនជាច្រើនគ្រាប់ត្រូវគេបាញ់ចេញពីខាងក្រុមលោកមូបារ៉ាក់ សំដៅទៅលើបាតុករប្រឆាំង រហូតធ្វើឲ្យមនុស្សរបួសជាច្រើននាក់។
ទាហានអេហ្ស៊ីព្ទបានធ្វើតាមការសន្យា។ ពួកគេមិនធ្វើការបាញ់ទៅលើក្រុមបាតុករ ដែលប្រឆាំងនឹងលោកមូបារ៉ាក់ទេ។ ទាហានបានពង្រាយរថពាសដែក នៅជិតទីលានសេរីភាព ដើម្បីការពារបាតុករ។ ប៉ុន្តែ នៅក្រោយពីប្រធានាធិបតីមូបារ៉ាក់ប្រកាសថា លោកនឹងមិនឈរឈ្មោះជាប្រធានាធិបតីនៅអាណត្តិក្រោយ ប៉ុន្តែ លោកនឹងស្ថិតនៅជាប្រធានាធិបតីរហូតដល់ចប់អាណត្តិរបស់លោក ក្រុមទាហានយល់ថា ជារឿងមួយដ៏សមរម្យ លោកមូបារ៉ាក់គួរតែអាចនៅកាន់តំណែងរហូតដល់ខែកញ្ញានេះ។ ដូច្នេះ ហើយ នៅពេលក្រុមបាតុករគាំទ្រលោកមូបារ៉ាក់ចេញមុខ ធ្វើបាតុកម្ម និងសំដៅទីលានសេរីភាព គេសង្កេតឃើញថា ទាហានហាក់ដូចជាបន្ធូរដៃ ដោយបើកផ្លូវ ដករថពាសដែក ដែលធ្លាប់តែជារនាំងបាំងផ្លូវ និងឈរមើលពួកបាតុករទាំងពីរក្រុមគប់ដុំថ្មទៅលើគ្នាទៅមក។
ចាប់ពីម៉ោង៦ ព្រឹកថ្ងៃព្រហស្បតិ៍ នៅក្រោយអំពើហិង្សាដែលកាន់តែរីកធំឡើងៗ (មនុស្សស្លាប់៥នាក់ ដោយមានម្នាក់ទៀត ទាហាន) ទាហានបានចាប់ផ្តើមចេញប្រតិបត្តិការចាប់មនុស្ស ជាពិសេសគឺក្រុមអ្នកគាំទ្រលោកមូបារ៉ាក់ ដែលគេសង្ស័យថា ជាអ្នកបង្កអំពើហិង្សា និងប្រព្រឹត្តបទឧក្រិដ្ឋ។ នាយករដ្ឋមន្រ្តីអេហ្ស៊ីព្ទដែលបានអំពាវនាវឲ្យក្រុមបាតុករបំបែកផ្លូវ ទៅផ្ទះ បានចេញមុខនៅថ្ងៃនេះ សូមទោស និងសន្យាស្រាវជ្រាវរកមុខអ្នកនៅពីក្រោយអំពើហិង្សាលើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ