អង្គការរដ្ឋអ៊ីស្លាមគម្រាមសម្លាប់អ្នកបើកបរយន្តហោះចម្បាំងហ្សកដានីនៅពេលថ្ងៃលិច នៅថ្ងៃនេះ
ក្រុមអង្គការរដ្ឋអ៊ីស្លាមបានប្រើឲ្យចំណាប់ខ្មាំងជនជាតិជប៉ុនលោកហ្គេនជិ ហ្គុតុ (Kenji Goto) បង្ហាញការគម្រាមសម្លាប់ថ្មី លើអ្នកបើកបរយន្តហោះចម្បាំងរបស់ហ្សកដានី ប្រសិនណាបើហ្សកដានីមិនព្រមប្រគល់ស្ត្រីអ្នកទោសក្រុមជីហាតម្នាក់ គឺ Sajida al-Rishawi ជាថ្នូរ នៅពេលថ្ងៃលិចនៅថ្ងៃព្រហស្បតិ៍នេះ។
ចុះផ្សាយនៅថ្ងៃ៖
ស្តាប់ - ០១:៤៥
ការគម្រាមថ្មីនេះ កើតមានឡើងបន្ទាប់ពីហ្សកដានី នៅថ្ងៃពុធម្សិលមិញបានយល់ព្រមដោះដូរស្ត្រីអ្នកទោស Sajida al-Rishawi ដែលជាអ្នកបំផ្ទុះគ្រាប់បែកអត្តឃាត ជាថ្នូរនឹងអ្នកបើកបរយន្តហោះចម្បាំងហ្សកដានី បន្ទាប់ពីកាលបរិច្ឆេទសម្លាប់អ្នកបើកបរយន្តហោះនេះ និងជនជាតិជប៉ុនលោក Goto របស់ក្រុមសកម្មប្រយុទ្ធអ៊ីស្លាមបានផុតកំណត់។
«ខ្ញុំគឺជា Kenji Goto Jogo។ នេះគឺជាសារសំឡេងដែលគេប្រាប់ខ្ញុំឲ្យផ្ញើរទៅអ្នក» សំឡេងរបស់អ្នកកាសែតជនជាតិជប៉ុនត្រូវបានលឺនិយាយនៅក្នុងសារជាសំឡេងមួយដែលមិនបានបង្ហាញពីអត្តសញ្ញាញច្បាស់លាស់ ហើយត្រូវបានចែកចាយនៅក្នុងគណនេយ្យ Twitter ក្រុមអង្គការរដ្ឋអ៊ីស្លាម។
នៅក្នុងសារជាសំឡេងនោះ លោក Goto បាននិយាយទៀតថា «ប្រសិនបើ Sajida al-Rishawi មិនត្រូវបានដោះដូរជាថ្នូរនឹងជីវិតរបស់ខ្ញុំ នៅព្រំដែនតួគីនៅពេលថ្ងៃលិចថ្ងៃព្រហស្បតិ៍ទី ២៩មករានេះទេ អ្នកបើកបរយន្តហោះចម្បាំងហ្សកដានីនឹងត្រូវសម្លាប់ភ្លាម!»។
ប្រទេសជប៉ុនបានស្វះស្វែងរកជំនួយពីហ្សកដានី ដើម្បីជួយរំដោះលោក Goto ចាប់តាំងពីក្រុមរដ្ឋអ៊ីស្លាមបានបញ្ចេញខ្សែវីដេអូមួយកាលពីចុងសប្តាហ៍បាននិយាយថាចំណាប់ខ្មាំងជនជាតិជប៉ុនម្នាក់ទៀតគឺលោក Haruna Yukawa ត្រូវបានសម្លាប់ដោយកាត់ក្បាល។
បន្ទាប់ពីទាមទារសំណងចំនួន ២០០លានដុល្លា ដើម្បីជាថ្នូរនឹងការដោះលែងលោក Yukawa និង Goto ក្រុមអង្គការដ្ឋអ៊ីស្លាម ដែលកំពុងតែកាន់កាប់តំបន់មួយភាគធំនៅស៊ីរ៉ីនិងអ៊ីរ៉ាក់បានប្តូរយុទ្ធសាស្ត្ររបស់ខ្លួន ដោយទាមទារឲ្យហ្សកដានីដោះលែងស្ត្រីអ្នកទោសជីហាត Rishawi ជំនួសលុយ២០០ លានដុលា្លវិញ។
សូមបញ្ជាក់ថា Sajida al-Rashawi ស្ត្រីអ្នកទោសដែលក្រុមជីហាតទាមទារឲ្យដោះលែងនេះ គឺជាភេរវជនអ៊ីរ៉ាក់ ដែលត្រូវតុលាការហ្សកដានីកាត់ទោសប្រហារជីវិត ពីបទជាប់ពាក់ព័ន្ធនឹងការវាយប្រហារភេរវកម្មជាច្រើន នៅក្នុងប្រទេសហ្សកដានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ