របបលោកកាដាហ្វី បដិសេធមិនបានប្រើគ្រាប់បែកចង្កោម
ឆាកឈុតប្រយុទ្ធគ្នា នៅតែបន្តមានយ៉ាងសាហាវ នៅទីក្រុងមីស្រាតា ក្រុងភាគខាងលិចប្រទេសលីប៊ីកាន់កាប់ដោយពួកអ្នកបះបោរ តែត្រូវកម្លាំងទ័ពលោក កាដាហ្វី វាយយកបានជាញឹកញាប់។ ការប្រយុទ្ធគ្នាក៏បានកើតឡើងដែរនៅ ភាគខាងកើតប្រទេស ក្នុងក្រុង អាដាប៊ីយ៉ា ក្រុងយ៉េហ្វ្រេន។ ស្ថានភាពកាន់តែដុនដាបជាងនេះទៅទៀត ព្រោះបើតាមពួកអ្នកបះបោរ កងកម្លាំងស្ម័គ្រនឹងលោកកាដាហ្វី បានប្រើគ្រាប់បែកចង្កោម ក្នុងសង្កាត់ដែលប្រជាជនរស់នៅច្រើន។ សន្ធិសញ្ញាអន្តរជាតិ បានហាមឃាត់ការប្រើប្រាស់គ្រាប់បែកចង្កោមនេះ ប៉ុន្តែប្រទេសលីប៊ីមិនបានផ្តល់សច្ចាប័នទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
នៅថ្ងៃសុក្រម្សិលមិញ ទីក្រុងមីស្រាតា ភាគខាងលិចប្រទេស និង ក្រុងអាដាប៊ីយ៉ា ទីយុទ្ធសាស្ត្រមុននឹងដល់ក្រុងបេនហ្កាហ្ស៊ី ការប្រយុទ្ធគ្នាហាក់មានសន្ធឹកខ្លាំងជាងពេលមុនៗ។ សំឡេងគ្រាប់ផ្ទុះ យន្តហោះប្រដេញ សំឡេងគ្រាប់ផ្លោង កាំភ្លើងស្វ័យប្រវត្តិ កាំភ្លើងត្បាល់ បានលាន់រន្ថើនរហូតដល់យប់។ ក្រុមគ្រូពេទ្យបានថ្ងូចថ្ងូរអំពីចំនួនជនរងគ្រោះស៊ីវិល ថាមានស្លាប់យ៉ាងហោចណាស់ ១២នាក់ និងរបួស១៦នាក់។
មិនតែប៉ុណ្ណោះ គេសង្កេតឃើញមានការប្រើប្រាស់គ្រាប់បែកចង្កោម ដែលអាចប្រល័យជីវិតជនស៊ីវិលដ៏សាហាវបំផុត។ ក្រុមអ្នកបះបោរ បានចោទប្រកាន់ថាជាស្នាដៃរបស់ លោក កាដាហ្វី។ ការចោទប្រកាន់ដែលអង្គការការពារសិទ្ធិមនុស្ស Human Rights Watch បានទទួលស្គាល់ និងបញ្ជាក់ថាពិតជាមានការប្រើប្រាស់គ្រាប់បែកចង្កោម ដូចអ្វីដែលក្រុមអ្នកបះបោរបានចោទប្រកាន់មែន។ អង្គការការពារសិទ្ធិមនុស្សនេះ បានឃើញផ្ទាល់ នៅនឹងកន្លែងប្រភេទគ្រាប់បែកចង្កោម ដែលហាមឃាត់ដោយសន្ធិសញ្ញាអន្តរជាតិ។ ប៉ុន្តែភ្លាមមួយរំពេច របបលោក កាដាហ្វី ច្រានចោលការចោទប្រកាន់នេះ។
សូមជម្រាបថា តាំងពីថ្ងៃព្រហស្បតិ៍ទី ១៤មេសាមក ក្រុងមីស្រាតា បានក្លាយជាសមរភូមិដ៏ក្តៅគគុក កម្លាំងទ័ពលោកកាដាហ្វី បានវាយសម្រុក និងបាញ់គ្រាប់រ៉ូកែត។ គឺជួនពេលដែល អង្គការអូតង់បានជួបប្រជុំគ្នានៅទីក្រុងប៊ែរឡាំង ប្រទេសអាល្លឺម៉ង់ សម្រេចមិនបានពីយុទ្ធសាស្ត្ររួម នៃប្រតិបត្តិការយោធា។ ប្រទេសអ៊ីតាលី ទើបបានបដិសេធមិនព្រមសហការឲ្យច្រើនលើស ពីការឲ្យប្រើប្រាស់អាកាសយានដ្ឋានយោធារបស់ខ្លួនទេ។
ទោះជាពេលនេះ អូតង់បន្តទម្លាក់គ្រាប់បែកនៅលើក្រុង Syrte ក្រុងAziziyé ជាប់ក្រុងទ្រីប៉ូលី និងនៅក្រុងហ្សេនតែន ប៉ុន្តែអូតង់កំពុងស្ថិតក្នុងស្ថានភាពខ្វះសព្វាវុធ ដោយហេតុតែមានប្រទេសជាសមាជិកតែ៦ប៉ុណ្ណោះក្នុងចំណោមសមាជិកទាំង២៨ ដែលចូលរួមចំណែកធ្វើអន្តរាគមន៍យោធាផ្លូវអាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ