អូបាម៉ា សាកូហ្ស៊ី កាម៉ឺរ៉ូន ចង់បានលីប៊ីដែលគ្មានលោកកាដាហ្វ៊ី
ប្រធានាធិបតីអាមេរិកាំង លោកបារ៉ាក់ អូបាម៉ា ប្រធានាធិបតីបារាំងលោកនីកូឡា សាកូហ្ស៊ី និងនាយករដ្ឋមន្រ្តីអង់គ្លេស ដាវីត កាម៉ារ៉ូនបានបញ្ចេញយោបល់រួម ជាលើកទីមួយ ក្នុងទំព័រវិចារណកថា របស់ កាសែតអាមេរិកាំង និងអង់គ្លេសដូចជា The Washington posts The Times, Le Figaro របស់បារាំង និងAl Hayat របស់ពិភពអារ៉ាប់ ដែលចេញផ្សាយនៅថ្ងៃនេះ។ មេដឹកនាំប្រទេសទាំងបីដែលនាំមុខគេ នៅក្នុងប្រតិបត្តិការយោធានៅលីប៊ី បានបញ្ជាក់ច្បាស់ៗថា កម្លាំងទ័ពអន្តរជាតិបន្តវាយប្រហារទៅលើប្រទេសលីប៊ី ដរាបណាលោកមួរអាម៉ា កាដាហ្វ៊ីនៅកាន់អំណាច។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ឈាង បុប្ផា
លោកអូបាម៉ា លោកសាកូហ្ស៊ី និងលោកកាម៉ារ៉ូនបានបញ្ចេញយោបល់រួមគ្នា ក្នុងទំព័រវិចារណកថា របស់កាសែត បារាំង អង់គ្លេស និងអាមេរិកាំង ដែលចេញផ្សាយ នៅថ្ងៃសុក្រនេះ។ ពួកគាត់ បញ្ចេញយោបល់រួមគ្នា លើវិបត្តិក្នុងប្រទេសលីប៊ី ប៉ុន្តែ មិនបានធ្វើសេចក្តីថ្លែងការណ៍ផ្លូវការរួមគ្នាទេ។ ការបញ្ចេញយោបល់ គឺគ្រាន់តែដើម្បីឲ្យគេអាចដឹងពីជំហរ តែមិនមែនដាក់សម្ពាធឲ្យគេប្រតិបត្តិតាមនោះទេ។
អន្តរាគមរបស់មេដឹកនាំប្រទេសធំទាំងបី ធ្វើឡើង នៅពេលនេះ ក្នុងពេលដែលប្រតិបត្តិការយោធា អន្តរជាតិ នៅលីប៊ី កំពុងរងការរិះគន់ពីមួយថ្ងៃ ទៅមួយថ្ងៃ។ ការខ្វែងគំនិតគ្នា លើប្រតិបត្តិការយោធានៅលីប៊ី ចេះតែមាន សូម្បីរវាងប្រទេសសមាជិករបស់ក្រុមប្រឹក្សាសន្តិសុខ។ ប្រទេសចិន រុស្ស៊ី និងប្រេស៊ីលដែលរារែកតាំងពីដើមទី មិនចង់លូកដៃក្នុងវិបត្តិលីប៊ី បានរិះគន់ជាថ្មី នៅដើមសប្តាហ៍នេះ ពីការទំលាក់គ្រាប់បែករបស់យន្តហោះអូតង់ ទៅលើទីក្រុងទ្រីប៉ូលី។
នៅចំពោះមុខស្ថានការណ៍ដ៏ ប្រទាញប្រទង់បែបនេះ មេដឹកនាំបារាំង អាមេរិកាំង និងអង់គ្លេស ដែលបង្ហាញការរួមគ្នាជាធ្លុងមួយ បានសរសេររំលឹក នៅក្នុងលិខិតបញ្ចេញយោបល់របស់ខ្លួន ថា ប្រទេសទាំងអស់បានបោះឆ្នោតគាំទ្រ សេចក្តីសម្រេចចិត្តរបស់អង្គការសហប្រជាជាតិ ដើម្បីឲ្យមានអន្តរាគមន៍យោធាអន្តរជាតិ នៅលីប៊ី។ សហព័ន្ធអារ៉ាប់ក៏បានគាំទ្រឲ្យគេលូកដៃចូលអន្តរាគមន៍ដើម្បីជួយប្រជាជនស៊ីវិល។
បារាំង អាមេរិក អង់គ្លេស បានសង្កត់ធ្ងន់ត្រង់ពាក្យថា គេធ្វើអ្វីៗ ដោយគោរពតាមសេចក្តីសម្រេចចិត្តរបស់អង្គការសហប្រជាជាតិ ដើម្បីការពារប្រជាជនលីប៊ីពីការវាយប្រហាររបស់កាដាហ្វ៊ី។ ត្រង់នេះ លោកអូបាម៉ា លោកសាកូហ្ស៊ី និងលោកកាម៉ារ៉ូន ទំនងចង់និយាយបញ្ចុះបញ្ចូលដល់ប្រទេស អាល្លឺម៉ង់ ចិន រុស្ស៊ី និងប្រេស៊ីលដែលធ្លាប់បានសុខចិត្តឲ្យមានប្រតិបត្តិការយោធានៅលីប៊ី ឲ្យត្រឡប់មកគាំទ្រពេញទំហឹង បេសកកម្មរបស់អង្គការអូតង់ពេលនេះ លែងខ្វែងគំនិតគ្នាតទៅទៀត។
ការមិនចុះសម្រុងគ្នា រវាងប្រទេសអន្តរជាតិបានធ្វើឲ្យប្រតិបត្តិការរបស់អូតង់មិនសូវជាមានប្រសិទ្ធិភាព។ លើសពីនេះ ជំហរផ្លាស់ប្តូររបស់អាមេរិក ដែលបានសម្រេចដកយន្តហោះចម្បាំងជាង ៥០គ្រឿងរបស់ខ្លួន ពីលីប៊ី បានធ្វើឲ្យកងទ័ពអូតង់ជួបការខ្វះខាតខ្លាំង។ អង្គការអូតង់ នៅលីប៊ី កំពុងជួបឧបសគ្គ និយាយឲ្យចំ គឺខ្វះការគាំទ្រ ខាងគ្រឿងសព្វាវុធពីប្រទេសសមាជិកតែម្តង។ ប្រទេសអាល្លឺម៉ង់ដែលជាសមាជិកសំខាន់របស់អូតង់បានបដិសេធមិនធ្វើប្រតិបត្តិការយោធា នៅលីប៊ី ចំណែកអេស្ប៉ាញវិញបានត្រឹមបញ្ជូនយន្តហោះដើម្បីត្រួតពិនិត្យតំបន់ហាមការហោះហើរ តែមិនទទួលខុសត្រូវទំលាក់គ្រាប់បែក លើកម្លាំងទ័ពលោកកាដាហ្វ៊ីទេ។
ដូច្នេះ ចង់ ឬមិនចង់ សំបុត្របញ្ចេញយោបល់របស់ប្រមុខដឹកនាំទាំងបី ដែលបង្ហាញការប្តេជ្ញាចិត្តបន្តបេសកកម្ម នៅលីប៊ី ប្រហែលជាអាចមានទំងន់ខ្លះ ដើម្បីឲ្យប្រទេសផ្សេងទៀតបន្តចូលរួមយោធានៅលីប៊ី។
គួដឹងថា រហូតមកដល់ពេលនេះ ក្នុងចំណោមប្រទេសទាំង២៨ មានតែប្រទេស៦ប៉ុណ្ណោះដែលចូលរួមទំលាក់គ្រាប់បែកលើទាហានកាដាហ្វ៊ី នៅលីប៊ី។ ប្រធានរបស់អូតង់ លោកRasmussen បានថ្លែងថា អូតង់នឹងនៅបន្តវាយប្រហារជារៀងរាល់ថ្ងៃ លើកម្លាំងលោកកាដាហ្វ៊ី ប៉ុន្តែ ដើម្បីអាចធ្វើបានគេត្រូវការជំនួយជាយន្តហោះ និងទិន្នន័យផ្សេងពីសម្ព័ន្ធមិត្តដើម្បីបាញ់ចំគោលដៅ មិនធ្វើឲ្យប៉ះពាល់ដល់ប្រជាជនស៊ីវិល ដែលកាដាហ្វ៊ីយកមកធ្វើជាខែលបាំង។
លោកRasmussenនិយាយថា រហូតមកដល់ពេលនេះ លោកមិនទាន់បានទទួលចំលើយតប ណាមួយពីប្រទេសសមាជិកទេ ប៉ុន្តែ លោកនៅតែមានក្តីសង្ឃឹមថា នឹង ទទួលបានចំលើយជាវិជ្ជមាន។ គួរដឹងថា ប្រតិបត្តិការរបស់អូតង់ នៅប៉ុន្មានថ្ងៃចុងក្រោយនេះ មិនសូវរីកចំរើនទៅមុខ ដោយសារតែមិនសូវមានគ្រឿងសព្វាវុធផង ហើយពួកបះបោរលីប៊ីលើដីឯណោះវិញ ខ្វះសមត្ថភាព និងលទ្ធភាពដើម្បីវាយប្រយុទ្ធដណ្តើមទីក្រុងពីទ័ពកាដាហ្វ៊ី។
លីប៊ី គ្មានលោកកាដាហ្វ៊ី
នៅក្នុងអត្ថបទបញ្ចេញយោបល់រួមគ្នា រវាងលោកអូបាម៉ា លោកសាកូហ្ស៊ី និងលោកកាម៉ារ៉ូន មេដឹកនាំប្រទេសទាំងបីបានលើកឡើងថា សេចក្តីសម្រេចរបស់ក្រុមប្រឹក្សាសន្តិសុខមិនអនុញ្ញាតឲ្យប្រើកម្លាំងយោធាដើម្បីបណ្តេញលោកកាដាហ្វីចេញពីអំណាច ប៉ុន្តែ ទោះយ៉ាងណា ក៏គេមិនអាចស្រមៃឃើញអនាគតលីប៊ីមួយដែល នៅតែដឹកនាំដោយលោកកាដាហ្វ៊ីបានទេ។ នៅក្នុងកណ្តាប់ដៃរបស់កាដាហ្វ៊ី ប្រជាជនលីប៊ី នៅទីក្រុងMisrata និងនៅទីក្រុងAjdabiyaកំពុងរងគ្រោះយ៉ាងធ្ងន់ធ្ងរ។ លោកកាដាហ្វ៊ីបានព្រមានថានឹងសម្លាប់អ្នកដែលក្បត់នឹងគាត់ ហើយពេលនេះទៀត កាដាហ្វ៊ីបានយកប្រជាជនមកធ្វើជារនាំងដើម្បីរួចផុតពីការវាយប្រហារពីទ័ពអាកាសអូតង់។ មេដឹកនាំទាំងបីយល់ថា លោកាដាហ្វីឃោឃៅយ៉ាងនេះ ដូច្នេះ បើទុកឲ្យកាដាហ្វ៊ីនៅបន្តដឹកនាំលីប៊ីបន្តទៅទៀត គឺហាក់ដូចក្បត់មនសិការរបស់ប្រជាជនលីប៊ី។
មេដឹកនាំអាមេរិក អង់គ្លេស និងបារាំងបានបញ្ជាក់ហើយ បញ្ជាក់ទៀត ដរាបណាលោកកាដាហ្វ៊ីនៅកាន់អំណាចនៅលីប៊ី កម្លាំងទ័ពអន្តរជាតិនឹងនៅបន្តវាយប្រហារទៅលើលីប៊ី ដើម្បីការពារជនស៊ីវិល។ គេនៅបន្តបំផ្លាញទីតាំងអាវុធ និងកម្លាំងទ័ពកាដាហ្វ៊ី របៀបដាក់គំនាប រហូតដល់លោកកាដាហ្វ៊ីព្រមចុះចាញ់តែម្តង។ គេមិនអាចបណ្តេញលោកកាដាហ្វ៊ី ដោយប្រើកម្លាំងទ័ពបានទេ។ ប៉ុន្តែ ការដាក់គំនាប និងការដាក់ទណ្ឌកម្មនេះនឹងអាចធ្វើលោកកាដាហ្វ៊ីព្រមលះបង់អំណាចខ្លួន។ មេដឹកនាំប្រទេសទាំងបីនិយាយថា លោកកាដាហ្វ៊ីត្រូវតែដើរចេញ។ ប៉ុន្តែ ទោះជាយ៉ាងណា គេបាននិយាយថា អនាគតរបស់លីប៊ី មិនមែនស្ថិតក្នុងដៃរបស់អង្គការសហប្រជាជាតិ ឬរបស់ប្រទេសអន្តរជាតិណាមួយទេ។ គឺប្រជាជនលីប៊ីផ្ទាល់ដែលជាអ្នកសម្រេចជ្រើសរើសមេដឹកនាំ ស្របតាមរដ្ឋធម្មនុញ្ញរបស់ខ្លួន។
គេមិនបានបញ្ជាក់ថា តើមេដឹកនាំថ្មីចេញពីក្រុមប្រឆាំង ឬខាងលោកកាដាហ្វ៊ីទេទេ ប៉ុន្តែ គេបាននិយាយថា គឺជាមេដឹកនាំមួយដែលចេញពីក្រុមមនុស្សជំនាន់ថ្មី។ អង្គការអូតង់ នឹងនៅអាចជួយរក្សាសន្តិសុខ ហើយអន្តរជាតិនឹង ជួយប្រជាជនដើម្បីកសាងលីប៊ីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ