សម្ព័ន្ធប្រឆាំងស៊ីរីប្រកាសបង្កើតរដ្ឋាភិបាល តែមិនចូលរួមកិច្ចប្រជុំជាមួយបណ្តាប្រទេសជាមិត្តស៊ីរី
សម្ព័ន្ធប្រឆាំងស៊ីរី បានប្រកាសកាលពីថ្ងៃសុក្រម្សិលមិញនេះថា នឹងបង្កើតនូវរដ្ឋាភិបាលក្នុងប្រទេសនាពេលឆាប់ៗនេះ ហើយនឹងប្រកាសឈ្មោះរបស់នាយករដ្ឋមន្ត្រី នៅខែមិនាខាងមុខនេះ។ រដ្ឋាភិបាលនេះ មានបំណងគ្រប់គ្រង តំបន់ដែលក្រុមឧទ្ទាមកាន់កាប់។ ផ្ទុយទៅវិញ សម្ព័ន្ធប្រឆាំងនឹងមិនចូលរួមកិច្ចប្រជុំរបស់បណ្តាប្រទេសជាមិត្តរបស់ប្រជាជនស៊ីរី ដែលនឹងប្រព្រឹត្តទៅនៅចុងខែកុម្ភៈនេះទេ ដោយចោទសហគមន៍អន្តរជាតិបិទភ្នែក ធ្វើមិនដឹងមិនលឺ ចំពោះការកាប់សំលាប់ប្រជាជនក្នុងប្រទេស ដែលតែងតែកើតមានជាប្រចាំ។ កាលពីថ្ងៃសុក្រ ការវាយប្រហារដោយមីស៊ីល នៅក្រុងអាឡិប បានសំលាប់មនុស្ស២៩នាក់ និងធ្វើអោយរបួសមនុស្សជាង១០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នៅប្រទេសស៊ីរី កាលពីថ្ងៃសុក្រម្សិលមិញនេះ មេដឹកនាំនានានៃសម្ព័ន្ធប្រឆាំងស៊ីរីដែលបានភៀសខ្លួននៅក្រៅប្រទេស បានប្រកាសថានឹងបង្កើតរដ្ឋាភិបាលស៊ីរី នាពេលឆាប់ៗនេះហើយ ហើយនឹងប្រកាសឈ្មោះរបស់នាយករដ្ឋមន្ត្រី នៅខែមិនាខាងមុខនេះ។
ដោយឡែក នាយករដ្ឋមន្ត្រីនេះមិនមែនជាសមាជិករបស់សម្ព័ន្ធប្រឆាំងនោះទេ។
រដ្ឋាភិបាលរបស់សម្ព័ន្ធប្រឆាំងមានគំរោងគ្រប់គ្រង ដែនដីដែលកាន់កាប់ដោយក្រុមឧទ្ទាម។
យោងតាមសម្ព័ន្ធប្រឆាំង ដែនដីស៊ីរីជាងពាក់កណ្តាលត្រូវក្រុមឧទ្ទាមរំដោះបាន។
ក្រុមឧទ្ទាមបានកាន់កាប់តំបន់សំខាន់ៗ នៅភាគខាងជើង និងភាគខាងកើតប្រទេស។
“យើងចង់អោយរដ្ឋាភិបាលមានទីតាំងនៅលើទឹកដីស៊ីរី។ រដ្ឋាភិបាលនឹងយកចិត្តទុកដាក់ជួយប្រជាជនដែលរស់នៅក្នុងតំបន់ដែលរំដោះបាននេះ។ ប្រជាជនត្រូវការទឹក ភ្លើង ថ្នាំពេទ្យ និងរាល់ឧបករណ៍ប្រើប្រាស់ផ្សេងៗទៀត” នេះជាការលើកឡើងរបស់លោក Walid al-Bunni អ្នកនាំពាក្យរបស់សម្ព័ន្ធប្រឆាំង។
ផ្ទុយទៅវិញ សម្ព័ន្ធប្រឆាំងប្រកាសនៅថ្ងៃសៅរ៍នេះថា នឹងមិនចូលរួមកិច្ចប្រជុំនៃបណ្តាប្រទេសជាមិត្តរបស់ប្រជាជនស៊ីរី ដែលនឹងប្រព្រឹត្តទៅនៅថ្ងៃទី ២៨ ខែកុម្ភៈ ខាងមុខនេះទេ ដោយចោទសហគមន៍អន្តរជាតិបិទភ្នែក ធ្វើមិនដឹងមិនលឺ ចំពោះការកាប់សំលាប់ប្រជាជនក្នុងប្រទេស ដែលតែងតែកើតមានជាប្រចាំ។
កិច្ចប្រជុំរបស់បណ្តាប្រទេសជាមិត្តរបស់ប្រជាជនស៊ីរី នឹងធ្វើឡើងដោយមានវត្តមានរបស់ប្រទេសជាង១០០ ក្នុងនោះមានបណ្តាបស្ចិមប្រទេស និងប្រទេសអារ៉ាប់ អង្គការអន្តរជាតិផ្សេងៗ ព្រមទាំងអ្នកតំណាងនានាមកពីគណបក្សប្រឆាំងស៊ីរីផងដែរ។
ការប្រកាសមិនចូលរួមកិច្ចប្រជុំនេះ គឺធ្វើឡើងបន្ទាប់ពីមានការវាយប្រហារដោយមីស៊ីល នៅក្រុងអាឡិប កាលពីថ្ងៃសុក្រម្សិលមិញ ដែលបានសំលាប់មនុស្ស ២៩នាក់ ក្នុងនោះក៏មានកុមារជាច្រើននាក់ផងដែរ។ ហើយកាលពីថ្ងៃព្រហស្បតិ៍មុននេះមួយថ្ងៃ អំពើភេរវកម្មនានា បានកើតឡើងនៅក្រុងដាម៉ាស បង្កអោយមនុស្សជាងមួយរយនាក់បាត់បង់ជីវិត។
ក្នុងរយៈពេលប៉ុន្មានខែចុងក្រោយនេះ ក្រុមចលនាជីហាដនៃរណសិរ្ស Al-Nosra បានប្រកាសថា ខ្លួនជាមេខ្លោងនៃអំពើភេរវកម្មនានា ដែលកើតមាន នៅក្រុងដាម៉ាស។
កាលពីថ្ងៃព្រហស្បតិ៍ បេសកជនពិសេសរបស់អង្គការសហប្រជាជាតិ លោកឡាក់ដារ ប្រាហ៊ីមី បានសុំអោយរុស្ស៊ី និងអ៊ីរ៉ង់ដាក់សម្ពាធទៅលើរដ្ឋាភិបាលកាន់អំណាចនៅស៊ីរី ដែលជាសម្ព័ន្ធមិត្តរបស់ខ្លួន នៅក្នុងកិច្ចការចរចា ប៉ុន្តែសំណូមពរនេះត្រូវបានក្រុងដាម៉ាសបានទាត់ចោល ដោយអះអាងមកវិញថា ស៊ីរីជាប្រទេសមួយដែលមានស្វ័យភាពខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ