ដាម៉ាសបដិសេធពុំផ្តល់ទិដ្ឋាការឲ្យអ្នកសង្កេតការណ៍
អង្គការសហប្រជាជាតិបានប្រកាសប្រាប់ពីការបដិសេធដោយប្រទេសស៊ីរីពុំព្រមផ្តល់ទិដ្ឋាការឲ្យអ្នកសង្កេតការណ៍អន្តរជាតិបីនាក់ ហើយនិងបានចោទរបបគ្រប់គ្រងស៊ីរីនិងក្រុមអ្នកប្រឆាំងថា បានរំលោភលើកិច្ចព្រមព្រៀងឈប់បាញ់គ្នាដែលបានសម្រេចបានកាលពីបីសប្តាហ៍មុន។ ចំណែកឯអំពើហិង្សានៅតែកើតមាននៅក្នុងប្រទេស ដែលបានបណ្តាលឲ្យមានមនុស្សស្លាប់៣៤នាក់នៅថ្ងៃអង្គារម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
“មកទល់ពេលនេះ ទីក្រុងដាម៉ាសបានបដិសេធពុំផ្តល់ទិដ្ឋាការឲ្យអ្នកសង្កេតការណ៍បីលើកហើយ” នេះជាការប្រកាសនៅទីក្រុងញូវយ៉ក ដោយប្រធានបេសកកម្មរក្សាសន្តិភាពរបស់អ.ស.ប. លោក Hervé Ladsous ដោយពុំបានបញ្ជាក់ប្រាប់ពីសញ្ជាតិរបស់អ្នកសង្កេតការណ៍នោះឡើយ។
បើយោងតាមអ្នកការទូត រដ្ឋាភិបាលស៊ីរីពុំចង់ឲ្យអ្នកសង្កេតការណ៍ដែលចេញពីប្រទេសលោកខាងលិចដូចជា សហរដ្ឋអាមេរិក បារាំង អង់គ្លេស ឬអាល្លឺម៉ង់ដែលប្រឆាំងនឹងរបបគ្រប់គ្រងផ្តាច់ការបាស្ហារអាល-អាស្សាដ ចូលប្រទេសស៊ីរីឡើយ។ ក៏ដូចគ្នាអ៊ីចឹងដែរសម្រាប់អ្នកសង្កេតការណ៍ដែលចេញពីប្រទេសអារ៉ាប់មួយចំនួនដូចជាប្រទេសអារ៉ាប៊ីសាអ៊ូឌីត ឬប្រទេសកាតារដែលគាំទ្រពួកអ្នកប្រឆាំងស៊ីរី។
ចំណែកឯអ្នកនាំពាក្យនៃក្រសួងការបរទេសស៊ីរី លោក Jihad Makdessi បានបញ្ជាក់ប្រាប់ AFP ពីការពុំចុះសម្រុងគ្នាពាក់ព័ន្ធនឹងបញ្ហាសញ្ជាតិរបស់អ្នកសង្កេតការណ៍ ប៉ុន្តែប្រកែកពុំព្រមនិយាយពីការបដិសេធពុំផ្តល់ទិដ្ឋាការឲ្យអ្នកសង្កេតការណ៍អន្តរជាតិឡើយ។
រីឯអ្នកសង្កេតការណ៍អន្តរជាតិ២៤នាក់ដែលមានវត្តមាននៅក្នុងប្រទេសស៊ីរីជាច្រើនសប្តាហ៍មកហើយនោះ បានធ្វើការកត់សម្គាល់ថា “សព្វាវុធធុនធ្ងន់ៗ”នៅតែមាននៅក្នុងទីក្រុង ដែលជាការរំលោភមួយទៅលើផែនការរបស់បេសកជនពិសេសរបស់ អ.ស.ប. លោកកូហ្វីអាណាន។
សូមបញ្ជាក់ថា អនុលោមតាមផែនការរបស់លោកកូហ្វីអាណានដែលបានចូលជាធរមានតាំងពីថ្ងៃទី១២មេសាឆ្នាំ២០១២ គេគ្រោងបញ្ជូនអ្នកសង្កេតការណ៍អន្តរជាតិ៣០០នាក់ទៅប្រទេសស៊ីរី ឲ្យបាស្ហារអាល-អាស្សាដដោះលែងអ្នកជាប់ឃុំឃាំងនយោបាយ ឲ្យមានសិទ្ធិធ្វើបាតុកម្មដោយសន្តិភាព ហើយនិងឲ្យមានសិទ្ធិសេរីភាពធ្វើដំណើរសម្រាប់អ្នកកាសែតក៏ដូចជាសម្រាប់អង្គការមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ