ស្រ្តីអាហ្រ្វិកពីររូប និងអ្នកកាសែតយេម៉ែនជាជ័យលាភីណូបែលសន្តិភាព ២០១១
នៅថ្ងៃសុក្រនេះ នៅទីក្រុងអូស្លូប្រទេស ន័រវែស គណៈកម្មាធិការណូបែលបានប្រកាសឈ្មោះជ័យលាភីណូបែលសន្តិភាព ឆ្នាំ ២០១១។ លោកស្រីប្រធានាធិបតីលីបេរីយ៉ា សកម្មជនការពារសិទ្ធិស្រ្តីលីបេរីយ៉ា និងអ្នកកាសែតស្រ្តីយេម៉ែន ត្រូវទទួលរង្វាន់ណូបែលសន្តិភាពរួមគ្នា នៅថ្ងៃទី ១០ ខែធ្នូខាងមុខនេះ។ នេះជាលើកទី ១២ ដែលស្រ្តីបានទទួលរង្វាន់ណូបែលសន្តិភាព ដែលបង្កើតឡើងដោយលោក Alfred Nobel នៅឆ្នាំ ១៩០១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៩
មនុស្សច្រើន បានរំពឹងទុកមុនថា រង្វាន់ណូបែលសន្តិភាពឆ្នាំនេះនឹងអាចធ្លាក់ទៅក្នុងដៃយុវជនអារ៉ាប់ នៅក្នុងប្រទេសអេហ្ស៊ីប និងទុយនីស៊ី ព្រោះពួកគេមានស្នាដៃ ក្នុងការប្រមែប្រមូលមនុស្សឲ្យចេញធ្វើបាតុកម្ម ផ្តួលរំលំមេដឹកនាំផ្តាច់ការ។ ចំណែកប្រធានគណៈកម្មាធិការណូបែល វិញបានបង្ហើប កាលពីម្សិលមិញ ពីលទ្ធភាពដែលបេក្ខជនមកពីអឺរ៉ុប អាចទទួលរង្វាន់ណូបែលសន្តិភាព។
ប៉ុន្តែ លទ្ធផលចេញមកពីការបោះឆ្នោតរបស់គណៈកម្មាធិការណូបែលបានបង្ហាញថា គឺប្រធានាធិបតី និងសកម្មជនការពារសិទិ្ធស្រ្តីអាហ្រ្វិកពីររូប និងអ្នកកាសែតយេម៉ែនម្នាក់ដែលជាជ័យលាភីណូបែលសន្តិភាពឆ្នាំនេះ។ បើតាមប្រធានគណៈកម្មាធិការណូបែល ស្រ្តីទាំងបីរូប បានទទួលរង្វាន់ណូបែលសន្តិភាពពីព្រោះពួកគេមានស្នាដៃប្រយុទ្ធប្រឆាំងដោយអហិង្សា ដើម្បីសន្តិសុខរបស់ស្រ្តី និងដើម្បីស្តី្រចូលរួមក្នុងដំណើរការស្វែងរក សន្តិភាព។
ក្នុងករណីរបស់លោកស្រី Ellen Johnson Sirleaf ប្រធានាធិបតីលីបេរីយ៉ា លោកស្រីជាប្រធានាធិបតីស្រ្តីទីមួយ ក្នុងទ្វីបអាហ្រ្វិក។ Ellen Johnson Sirleaf អាយុ ៧២ឆ្នាំ ត្រូវបានគេទទួលស្គាល់ថា បានចូលរួមកសាងសន្តិភាព ដោយស្រោចស្រង់លីបេរីយ៉ាចេញពីសង្រ្គាមស៊ីវិល នៅឆ្នាំ ២០០៣។ ការជ្រើសរើសលោកស្រីឲ្យជាជ័យលាភីណូបែលសន្តិភាព ធ្វើឡើង នៅតែ៤ថ្ងៃមុនការបោះឆ្នោត ប្រធានាធិបតីនៅលីបេរីយ៉ា។ មើលទៅរង្វាន់ណូបែលនឹងអាចជួយជម្រុញឲ្យលោកស្រីជាប់ជាប្រធានាធិបតី សម្រាប់អាណត្តិទីពីរទៀត។ ជោគជ័យរបស់លោកស្រីប្រធានាធិបតី Ellen Johnson ដើម្បីបញ្ចប់សង្រ្គាមស៊ីវិល នៅលីបេរីយ៉ា មិនមានទៅរួចទេ បើគ្មានលោកស្រី Leymah Gboweeដែលជាអ្នកត្រួសត្រាយ នៅទីលាន ជាក់ស្តែង។ Leymah Gboweeត្រូវគណៈកម្មាធិការណូបែលបោះឆ្នោតឲ្យជាប់ជាជ័យលាភីណូបែលដែរ ដោយមកពីលោកស្រីជាអ្នកផ្តួចផ្តើមប្រមូលប្រជាជនចេញមុខតវ៉ា ដើម្បីទាមទារសន្តិភាពនៅលីបេរីយ៉ា។
មួយវិញទៀត រង្វាន់ណូបែលមិនបានធ្លាក់ទៅក្នុងដៃយុវជនដែលបានជម្រុញឲ្យមានបដិវត្តន៍នៅអេហ្ស៊ីប និងទុយនីស៊ី មែន ប៉ុន្តែ នៅប៉ុន្មាននាទីក្រោយប្រកាសលទ្ធផល Tawakkol Karman អ្នកកាសែតស្រីយេម៉ែន ដែលទើបដឹងថា ខ្លួន បានទទួលរង្វាន់ណូបែលសន្តិភាព ២០១១ បាននិយាយថា រង្វាន់ណូបែលសន្តិភាពសម្រាប់លោកស្រី គឺក៏ដូចជាសម្រាប់សកម្មជនទូទៅដែលបានធ្វើបដិវត្តន៍អារ៉ាប់ ហ៊ានងើបតវ៉ាប្រឆាំងអំណាចផ្តាច់ការរបស់មេដឹកនាំ។ គួរដឹងថា ក្នុងប្រទេសយេម៉ែន ដែលកំពុងត្រាំត្រែងនឹងអំពើហិង្សា និងបាតុកម្មមហាជន អ្នកកាសែត Tawakkol Karman ត្រូវគេស្គាល់ថា ជាអ្នកដឹកនាំសំខាន់មួយ ក្នុងចំណោមអ្នកដឹកនាំបាតុកម្មនិស្សិតផ្សេងទៀត ដើម្បី ទាមទារឲ្យប្រធានាធិបតីAbdallah Saleh ចុះចេញពីតំណែងប្រធានាធិបតី។
លោកលី ស៊ាវប៉ូ ម្ចាស់រង្វាន់ណូបែលសន្តិភាព២០១០ នៅតែជាប់ក្នុងគុក ប្រទេសចិន
ប្រសិនបើគេសង្ឃឹមថា រង្វាន់ណូបែលសន្តិភាពនឹងជម្រុញឲ្យអាជ្ញាធរចិនដោះលែង លោកលី ស៊ាវប៉ូ នោះគេប្រាកដជាគិតខុស។ មុននឹងត្រូវជ្រើសរើសឲ្យទទួលរង្វាន់ណូបែលសន្តិភាពឆ្នាំមុន សកម្មជនការពារសិទ្ធិមនុស្ស រូបនេះ ត្រូវរដ្ឋអំណាចចិនចាប់ដាក់គុក ដោយចោទពីបទបង្កវិទ្ធង្សនា។
ការផ្តល់រង្វាន់ដ៏កិត្តិយស ណូបែលសន្តិភាព មិនត្រឹមតែ មិនបានជួយដល់លោក លី ស៊ាវប៉ូ ឲ្យចេញពីគុក ប៉ុន្តែ វារឹតតែទៅទម្លាក់លើទុក្ខរបស់គ្រួសាររបស់លោក លី ស៊ាវប៉ូ និងសកម្មជនការពារសិទ្ធិមនុស្សដទៃទៅទៀត។ ក្រោយ ពេលគេប្រកាសផ្តល់រង្វាន់សន្តិភាព ប្រពន្ធរបស់លោក លី ស៊ាវប៉ូ ត្រូវអាជ្ញាធរចិនចាប់ដាក់ឃុំ ក្នុងគេហដ្ឋាន និងផ្តាច់ទំនាក់ទំនងរបស់គាត់ ជាមួយពិភពខាងក្រៅ។
ភរិយារបស់លោកលី ស៊ាវប៉ូ ធ្លាប់បាននិយាយប្រាប់អ្នកកាសែតលោកខាងលិចថា ខុសពីប្រទេសដទៃទៀត នៅប្រទេសចិន រង្វាន់ណូបែលសន្តិភាពបានធ្វើឲ្យសកម្មជនរឹតតែបិទមាត់ មិនហ៊ានបញ្ចេញមតិ។
ក្នុងរយៈពេលមួយឆ្នាំទៅនេះ រដ្ឋអំណាចចិន ដែលកំពុងខ្លាចបដិវត្តន៍អារ៉ាប់ ឆ្លងចូលក្នុងប្រទេសរបស់ខ្លួន កំពុងតាមចាប់ដាក់គុក រាល់អ្នកដែលហ៊ានកម្រើកខ្លួនតវ៉ា។ សកម្មជនការពារសិទ្ធិមនុស្ស មេធាវី និងអ្នកបង្កើតBlog ចិន បានបាត់ខ្លួន ជាបន្តបន្ទាប់។ គេសង្ស័យថា ពួកគេទាំងនោះត្រូវអាជ្ញាធរចាប់ឃុំដោយសម្ងាត់។ បារម្ភមានកាន់តែខ្លាំង នៅពេលគេបានដឹងថា រដ្ឋាភិបាលចិនកំពុងរៀបចំសេចក្តីព្រាងច្បាប់ ដែលនឹងអនុញ្ញាតឲ្យអាជ្ញាធរចាប់មនុស្សឃុំខ្លួន ដោយសម្ងាត់ និងដោយស្របច្បាប់។
បើតាមអង្គការការពារសិទ្ធិមនុស្ស ក្នុងទីក្រុងហុងកុង ក្តីសង្ឃឹម ដែលថា រង្វាន់ណូបែលសន្តិភាពដល់ជនជាតិចិនលើកដំបូង នឹងជម្រុញឲ្យមានការផ្លាស់ប្តូរ និងការគោរពសិទ្ធិមនុស្ស ត្រូវរលាយដូចផ្សែង។ ប៉ុន្តែ សម្រាប់អ្នកផ្តល់រង្វាន់ណូបែលសន្តិភាពវិញ វាគ្មានអ្វីដែលភ្ញាក់ផ្អើលទេ ដែលគេឃើញប្រតិកម្មកំរោលចូលរបស់អាជ្ញាធរចិន។
បើទោះបីជារង្វាន់ណូបែលសន្តិភាពមិនបានជួយឲ្យគេដោះលែងលោកលី ស៊ាវប៉ូ មែន ប៉ុន្តែ វាបានជម្រុញឲ្យពិភពលោកចាប់អារម្មណ៍និយាយ ផ្តោតខ្លាំងទៅលើបញ្ហារំលោភសិទ្ធិមនុស្សនៅក្នុងប្រទេសចិន។ ដូចករណីរបស់លោកស្រី អ៊ុងសាន ស៊ូជី មេដឹកនាំបក្សប្រឆាំងភូមា ដែលពិភពលោកទាំងមូលបានរិះគន់ និងដាក់គំនាបរហូតដល់រដ្ឋាភិបាលសម្រេចដោះលែងលោកស្រីមេដឹកនាំប្រឆាំង។ ជាថ្មីម្តងទៀត គណៈកម្មាធិការនឹងរង់ចាំ ដោយអត់ធ្មត់ ឲ្យលោកលី ស៊ាវប៉ូ ម្ចាស់រង្វាន់ណូបែលសន្តិភាព រហូតគាត់បានទទួលសេរីភាព និងមកទទួលរង្វាន់ដោយខ្លួនឯង បើទោះជាការរង់ចាំ មានរយៈពេលវែង យ៉ាងណាក៏ដោយ ព្រោះថា លោកលី ស៊ាវប៉ូត្រូវតុលាការចិនចាប់ដាក់គុក ដល់ទៅ ១១ឆ្នាំឯណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ