រលកនៃការរិះគន់ទៅលើសេចក្តីព្រាងច្បាប់ស្តីពីសមាគមនិងអង្គការក្រៅរដ្ឋាភិបាលមិនទាន់ស្ងប់ស្ងាត់
សង្គមស៊ីវិលកម្ពុជា ត្រូវបានផាត់ចេញពីដំណើរការព្រាងច្បាប់ស្តីពីសមាគម និងអង្គការមិនមែនរដ្ឋាភិបាល។ នេះបើយោងតាមសេចក្តីថ្លែងការណ៍របស់អ្នកជំនាញសិទ្ធិមនុស្សនៃអង្គការសហប្រជាជាតិលោក ម៉ៃណា គីអៃ (Maina Kiai) កាលពីថ្ងៃទី២២ឧសភាម្សិលម៉ិញ។ ការចេញសេចក្តីថ្លែងការណ៍របស់អ្នកជំនាញសិទ្ធិមនុស្សនៃអង្គការសហប្រជាជាតិបានធ្វើឡើង១ថ្ងៃក្រោយពីក្រសួងការបរទេសកម្ពុជាបានព្រមានតំណាងទីភ្នាក់ងារអង្គការសហប្រជាជាតិចំនួន៤ ដែលកំពុងធ្វើការនៅក្នុងប្រទេសកម្ពុជា ចំពោះការរិះគន់របស់ពួកគេមកលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ពីទីក្រុងសឺណែវប្រទេសស្វីស លោក ម៉ៃណា គីអៃ (Maina Kiai) អ្នកជំនាញសិទ្ធិមនុស្សអង្គការសហប្រជាជាតិ បានសរសេរនៅក្នុងសេចក្តីថ្លែងការណ៍របស់លោកកាលពីថ្ងៃទី២២ឧសភាថា «វាជារឿងចម្លែកដែលថា ការធ្វើសេចក្តីព្រាងច្បាប់មួយ ដែលមានគោលដៅធ្វើនិយតកម្មសង្គមស៊ីវិលនៅកម្ពុជា បែរជាផាត់សង្គមស៊ីវិលចេញពីដំណើរការនេះទៅវិញ»។
អ្នករាយការណ៍ពិសេសអង្គការសហប្រជាជាតិ ស្តីពីសិទ្ធិសេរីភាពក្នុងការជួបប្រជុំដោយសន្តិវិធី និងសិទ្ធិសេរីភាពក្នុងការបង្កើតសមាគមបានមានប្រសាសន៍នៅក្នុងសេចក្តីថ្លែងការណ៍ដែលត្រូវបានផ្សព្វផ្សាយនៅលើគេហទំព័ររបស់ការិយាល័យឧត្តមស្នងការអង្គការសហប្រជាជាតិទទួលបន្ទុកខាងសិទ្ធិមនុស្សថា «ជាកង្វល់ដ៍ធ្ងន់ធ្ងរ អំពីដំណើរការមួយដែលនាំឱ្យមានការអនុម័តច្បាប់ស្តីពី សមាគម និងអង្គការមិនមែនរដ្ឋាភិបាល ដោយគ្មានការចូលរួមជាសាធារណៈប្រកបដោយអត្ថន័យនេះ»។ លោក ម៉ៃណា គីអៃ បានកត់សម្គាល់ថា ការបង្កើតច្បាប់ដើម្បីគ្រប់គ្រងសមាគមសង្គមស៊ីវិលនៅក្នុងប្រទេសនេះ ដែលមានតាំងពីឆ្នាំ២០០៨មកនោះ ត្រូវបានគេរាយការណ៍ថា មានការលាក់កំបាំងជាសម្ងាត់។
សេចក្តីថ្លែងការណ៍របស់អ្នកជំនាញសិទ្ធិមនុស្សអង្គការសហប្រជាជាតិដែលបានចេញផ្សាយនៅថ្ងៃនេះ ក៍បានបញ្ជាក់ឡើងវិញនូវការអំពាវនាវរបស់លោកដល់រដ្ឋាភិបាលកម្ពុជា សូមឱ្យធានាថា សង្គមស៊ីវិលអាចរួមចំណែកប្រកបដោយអត្ថន័យ នៅក្នុងការរៀបចំតាក់តែងសេចក្តីព្រាងច្បាប់ស្តីពី សមាគម និងអង្កការមិនមែនរដ្ឋាភិបាល ដែលគេរំពឹងថា នឹងត្រូវអនុម័តដោយរដ្ឋសភានៅក្នុងខែឧសភានេះ។
អ្វីជាការកត់សម្គាល់ ការចេញសេចក្តីថ្លែងការណ៍របស់អ្នកជំនាញសិទ្ធិមនុស្សនៃអង្គការសហប្រជាជាតិនៅពេលនេះ បានធ្វើឡើង១ថ្ងៃ ក្រោយពីក្រសួងការបរទេសកម្ពុជាបានកោះហៅនិងព្រមានទៅលើតំណាងទីភ្នាក់ងារអង្គការសហប្រជាជាតិចំនួន៤ ដែលកំពុងធ្វើការនៅក្នុងប្រទេសកម្ពុជា ចំពោះការរិះគន់របស់ពួកគេទៅលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះ និង២ថ្ងៃក្រោយនៃកំណត់ទូតរបស់ក្រសួងការបរទេសកម្ពុជាទៅកាន់ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីល្លៀម ថត (William E. Todd) ដែលក៍បានរិះគន់ទៅលើសេចក្តីព្រាងច្បាប់នេះដែរ ហើយនៅក្នុងសន្និសីទកាសែតពេលបញ្ចប់បេសកម្មរយៈពេល៤ថ្ងៃនៅកម្ពុជា កាលពីថ្ងៃទី២២ឧសភា លោក Silvio Gonzato នាយកសហភាពអឺរ៉ុបទទួលបន្ទុកប្រជាធិបតេយ្យ និងសិទ្ធិមនុស្ស ក៍បានរិះគន់ទៅលើសេចក្តីព្រាងច្បាប់ទាំងពីរនិងបានជំរុញឱ្យរដ្ឋាភិបាលកម្ពុជាបើកចំហឱ្យមានកិច្ចពិភាក្សាទូលំទូលាយមួយ មុនពេលសេចក្តីព្រាងច្បាប់ទាំងពីរ ត្រូវបានអនុម័តដោយរដ្ឋាភិបាលនិងរដ្ឋសភានៅពេលខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ