រូបិយប័ណ្ណអ៊ីរ៉ង់ដាំក្បាលធ្លាក់ថ្លៃជាប្រវត្តិសាស្ត្រ
ក្នុងរយៈពេលតែមួយថ្ងៃ (ថ្ងៃចន្ទទី ១ តុលា ២០១២) ម្សិលមិញ លុយអ៊ីរ៉ង់ បានបាត់បង់តម្លៃ អស់ ១៧% បើប្រៀបទៅនឹងបា្រក់ដុល្លារអាមេរិក ពោលគឺធ្លាក់ថ្លៃខ្លាំងបំផុតមិនធ្លាប់មានក្នុងប្រវត្តិរូបិយប័ណ្ណអ៊ីរ៉ង់ និងបន្តធ្លាក់ថ្លៃទៀតនៅថ្ងៃអង្គារនេះ។ បើតាមសហរដ្ឋអាមេរិក លុយរៀល (Rial)អ៊ីរ៉ង់ ធ្លាក់ថ្លៃ គឺជាជោគជ័យ និងជាឥទ្ធិពលដំបូងនៃទណ្ឌកម្មរបស់បស្ចិមលោកដាក់ប្រឆាំងនឹងអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
គឺជាការធ្លាក់ចុះមិនធ្លាប់មានក្នុងប្រវត្តិរូបិយប័ណ្ណអ៊ីរ៉ង់។ ក្នុងរយៈពេលតែមួយថ្ងៃម្សិលមិញ លុយរៀលអ៊ីរ៉ង់បានធ្លាក់ថ្លៃអស់១៧% ពោលគឺស្មើនឹងជាង៨០%ក្នុងអំឡុងពេលមួយឆ្នាំ។ នៅថ្ងៃនេះទៀត បើតាមអ្នកឯកទេស ប្រាក់រៀល (Rial) បន្តដាំដូងធ្លាក់ចុះពី២ % ទៅ៦%បន្ថែមទៀត។ ទណ្ឌកម្មប្រេងកាត និងធនាគារ ដែលបស្ចិមលោកដាក់ប្រឆាំងនឹងអ៊ីរ៉ង់ ដើម្បីអោយក្រុងតេហេរ៉ង់បោះបង់កម្មវិធីនុយក្លេអ៊ែរ បានធ្វើឱ្យការនាំចូលប្រេងកាតពីអ៊ីរ៉ង់ថយចុះ ហើយអ៊ីរ៉ង់បានទទួលហិវញ្ញវត្ថុថ្លៃបង់ប្រេងក៏យឺតយាវ។ រដ្ឋាភិបាលអ៊ីរ៉ង់កំពុងប្រឈមនឹងសង្គ្រាមសេដ្ឋកិច្ច ព្រោះថាដុល្លារគឺរូបិយវត្ថុគោលនៃការលក់ដូរប្រេងនៅលើពិភពលោក។
ប្រាក់ដុលា្លរអាមេរិកឡើងថ្លៃ ជាការវាយសំពងលើអតិផរណាអ៊ីរ៉ង់ ដែលមានជាផ្លូវការប្រមាណ២៣% ប៉ុន្តែតម្លៃផលិតផលហូបចុក បានឡើងថ្លៃទ្វេដងក្នុងមួយឆ្នាំនេះ។ ទំនិញហូបចុកឡើងថ្លៃ ប៉ះពាល់យ៉ាងខ្លាំងទៅលើជីវភាពរស់នៅប្រចាំថ្ងៃរបស់បណ្តាជនអ៊ីរ៉ង់ទូទៅ។
វិស័យទេសចរណ៍វិញ ក៏រងឥទ្ធិពលពីលុយធ្លាក់ថ្លៃដែរ។ ក្នុងមួយឆ្នាំៗ មានបណ្តាជនអ៊ីរ៉ង់រាប់លាននាក់ ធ្វើដំណើរទៅបរទេស ខ្លះជាទេសចរ ខ្លះដើម្បីស្វែងធម៌នៅក្រុងសក្តិសិទ្ធិនៃសាសនាអ៊ីស្លាម La Mecque នៅប្រទេសអ៊ីរ៉ាក់ ឬនៅប្រទេសស៊ីរី។ ប៉ុន្តែពួកគេមួយចំនួនធំត្រូវបង្ខំចិត្តលុបកម្មវិធីដើរកំសាន្ត និងសាសនានេះចោលវិញ។ ជាចុងក្រោយ បណ្តាជនអ៊ីរ៉ង់ទាំងអស់ដែលមានគ្រួសារនៅក្រៅប្រទេស មិនថាក្នុងហេតុផលរស់នៅ ឬដើម្បីបន្តការសិក្សាទេ សុទ្ធតែជួបការលំបាកខ្លាំងឡើងៗ ក្នុងបញ្ជូនលុយចេញទៅឱ្យក្រុមគ្រួសារ និងកូនចៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ