ម៉ូស្គូខ្វល់នឹងដំណឹងស្តីអំពីការវាយប្រហារពីខាងអ៊ីស្រាអែលទៅលើដែនដីស៊ីរី
ក្តីព្រួយកង្វល់នេះ មានលើកឡើងក្នុងសេចក្តីថ្លែងការណ៍មួយពិសេស ចេញ ព្រឹកមិញ ដោយក្រសួងការបរទេសរុស្ស៊ី ដែលក៏ចង្អុលឲ្យឃើញផងដែរថា ទីក្រុងម៉ូស្គូនឹងផ្តន្ទាទោសខានមិនបាន បើព័ត៌មានស្តីអំពីការវាយប្រហារដោយយន្តហោះចម្បាំងអ៊ីស្រាអែលទៅលើទីដៅនៅក្បែរទីក្រុងដាម៉ាសប្រទេសស៊ីរី ជាដំណឹងពិតមែន។
ចុះផ្សាយនៅថ្ងៃ៖
ស្តាប់ - ០២:៣៥
ក្នុងសេចក្តីថ្លែងការណ៍នោះ ក្រសួងការបរទេសរុស្ស៊ីគូសបញ្ជាក់ថា បើដំណឹងនោះ ជាដំណឹងពិតមែន គឺមានន័យថាអ៊ីស្រាអែលធ្វើការវាយប្រហារដោយគ្មានអ្វីជាដើមហេតុសោះ ទៅលើដែនដីនៃរដ្ឋអធិបតេយ្យទាំងបំពានយ៉ាងកម្រោល លើធម្មនុញ្ញអង្គការសហប្រជាជាតិ ដែលជាការមិនអាចទទួលយកបានឡើយ ទោះអ៊ីស្រាអែលសំអាងលើលេសណាក៏ដោយ។
ទីក្រុងម៉ូស្គូចង្អុលឲ្យឃើញថា ខ្លួនកំពុងចាត់វិធានការយ៉ាងរួសរាន់ ដើម្បីវែកញែកបំភ្លឺអំពីឧប្បត្តិហេតុនោះឲ្យបានល្អិតល្អន់។
ក្រសួងការបរទេសរុស្ស៊ី តាមរយៈសេចក្តីថ្លែងការណ៍នោះ អំពាវនាវឲ្យបញ្ឈប់រាល់អំពើហិង្សាក្នុងប្រទេសស៊ីរី កុំបណ្តោយឲ្យមានការលូកដៃជ្រៀតជ្រែកអ្វីណាពីក្រៅទៅក្នុងកិច្ចការប្រទេសនោះ ដែលជារឿងមិនអាចទទួលយកបាន និងឲ្យមានការចាប់ផ្តើមឡើងនៃសំវាទរវាងភាគីបដិបក្ខស៊ីរី ដោយឈរលើកិច្ចព្រមព្រៀងទាក់ទងនឹងវិបត្តិនៅស៊ីរី ដែលមានចុះនៅក្រុង Genève កាលពីថ្ងៃទី៣០ មិថុនា ឆ្នាំ២០១២។
រីឯទីក្រុងដាម៉ាសបានប្រកាស ល្ងាចថ្ងៃពុធម្សិលមិញថា មានយន្តហោះអ៊ីស្រាអែលបាន ហោះទៅ “ទំលាក់គ្រាប់បែកត្រង់ផ្ទាល់” លើមជ្ឈមណ្ឌលស្រាវជ្រាវវិទ្យាសាស្ត្រយោធា ដែលស្ថិតនៅត្រង់ចន្លោះ រវាងរដ្ឋធានីស៊ីរី និងព្រំដែនលីបង់ ហើយការវាយប្រហារនេះត្រូវ អ៊ីស្រាអែលធ្វើជាលើកទី១ តាំងពីមានអធិករណ៍ឆាបឆេះនៅស៊ីរី អស់ជិត២ឆ្នាំហើយ។
តាមការអះអាងនៃកងទ័ពស៊ីរី ដែលផ្សាយដោយទីភ្នាក់ងារព័ត៌មានផ្លូវការស៊ីរី SANA ៖ គឺតាំងពីព្រឹកព្រលឹមតែម្តង ដែលយន្តហោះចម្បាំងរបស់អ៊ីស្រាអែលបានទំលាក់គ្រាប់បែក ទៅលើមជ្ឈមណ្ឌលស្រាវជ្រាវនោះ ហេតុដែលបានបណ្តាលឲ្យបុគ្គលិកមជ្ឈមណ្ឌលនោះ ធ្លាក់ខ្លួនស្លាប់អស់២នាក់ និងរបួស៥នាក់ ព្រមទាំងបានបំផ្លាញអគារនោះអស់មួយភាគ ដោយហែរហម ជាការខូចខាតយ៉ាងបង្គួរ។ ចំណែកអ្នកនាំពាក្យផ្លូវការរបស់កងទ័ពអ៊ីស្រាអែល ប្រកែកពុំព្រមធ្វើអត្ថាធិប្បាយអ្វីណាទេ។
រុស្ស៊ីជាបង្អែកមួយចុងក្រោយ នៃរបបលោកប្រធានាធិបតីស៊ីរី អាសាដ ដោយរមែងលក់អាវុធទៅឲ្យរបបនេះ ហើយប្រឆាំងជានិច្ចនឹងអន្តរាគមន៍ពីក្រៅទៅក្នុងទំនាស់នៅប្រទេសនេះ ទំនាស់ដែលតាមតួលេខអ.ស.ប. បានផ្តាច់ជីវិតអ្នកស្រុកអស់ជាង៦ម៉ឺននាក់ហើយ។
គួរនិយាយថា លោកនាយករដ្ឋមន្ត្រីរុស្ស៊ី មេដវេដេវ ក្នុងបទសម្ភាសន៍ថ្ងៃអាទិត្យកន្លងទៅ បានបញ្ចេញយោបល់ថា ភ័ព្វសំណាងលោក អាសាដ នៅអាចកាន់អំណាច ចេះតែរួញខើចទៅ ពីមួយថ្ងៃទៅមួយថ្ងៃ មកពីគាត់បានថ្លោះធ្លោយជា “កំហុសដែលប្រហែលនាំឲ្យវិនាសដល់វាសនាគាត់ទៅផង ដ្បិតគាត់បានយឺតពេលធ្វើកំណែទម្រង់”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ