លោកប្រធានាធិបតីអាមេរិកអូបាម៉ាប្រកាសសម្រាលទណ្ឌកម្មដាក់លើភូមា
គណបក្សប្រឆាំងភូមារបស់លោកស្រីអ៊ុងសានស៊ូជីបានសម្តែងការស្វាគមន៍ទទួលនៅថ្ងៃព្រហស្បតិ៍នេះ នូវការសម្រាលទណ្ឌកម្មអាមេរិកាំងដែលបានដាក់ទៅលើប្រទេសភូមា។ ក៏ប៉ុន្តែបក្សប្រឆាំងភូមាបានទាមទារឲ្យមានការប្រុងប្រយ័ត្នហើយនិងឲ្យមានតម្លាភាពពាក់ព័ន្ធនឹងការបោះទុនធ្វើវិនិយោគ ជាពិសេសនៅក្នុងវិស័យប្រេងកាតនិងឧស្ម័ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
សេចក្តីសម្រេចចិត្តរបស់លោកប្រធានាធិបតីអាមេរិកអូបាម៉ាប្រកាសសម្រាលទណ្ឌកម្មដាក់ទៅលើភូមា ដែលបានថ្លែងឲ្យដឹងនៅថ្ងៃពុធម្សិលមិញ នឹងអាចអនុញ្ញាតឲ្យក្រុមហ៊ុនអាមេរិកាំងចូលទៅបោះទុនធ្វើវិនិយោគនៅក្នុងប្រទេសភូមា ជាពិសេសនៅក្នុងវិស័យប្រេងកាតនិងឧស្ម័នជាមួយក្រុមហ៊ុនរដ្ឋភូមាឈ្មោះ “Myanmar Oil and Gaz Enterprises” ឬ “សហគ្រាសប្រេងនិងឧស្ម័នមីយ៉ានម៉ា »។
គឺ “Myanmar Oil and Gaz Enterprises” ឬ “សហគ្រាសប្រេងនិងឧស្ម័នមីយ៉ានម៉ា »នេះឯងដែលលោកស្រីអ៊ុងសានស៊ូជីធ្លាប់បានព្រមានប្រាប់ឲ្យមានការប្រុងប្រយ័ត្នពីសំណាក់ប្រទេសបស្ចិមលោក នៅខណៈពេលដែលលោកស្រីបានចេញមកបំពេញទស្សនកិច្ចនៅអឺរ៉ុបកាលពីខែមុន។
គួរបញ្ជាក់ថា ប្រាក់ចំណូលបានមកពីការលក់ប្រេងឥន្ធនៈនិងឧស្ម័នភូមាដ៏ច្រើនមហិមានារយៈពេល៥០ឆ្នាំចុងក្រោយនេះឋិតនៅក្នុងដៃរបស់អតីតក្រុមយោធាផ្តាច់ការភូមា។ បើយោងតាមក្រសួងយកការសម្ងាត់អាមេរិក CIA ប្រទេសភូមាមានឧស្ម័នប្រមាណ ២៨៣ពាន់លានម៉ែត្រគុប ដែលក្នុងនោះមានមួយភាគធំឋិតនៅក្នុងសមុទ្រ។
ចំណែកឯ Ligue Nationale pour la Démocratie (LND) ឬសម្ព័ន្ធជាតិដើម្បីប្រជាធិបតេយ្យ ដែលជាគណបក្សប្រឆាំងភូមារបស់លោកស្រីអ៊ុងសានស៊ូជីបានថ្លែងប្រាប់ថា “ពួកគេអបអរនឹងការសម្រាលទណ្ឌកម្មអាមេរិកាំងដែលបានដាក់ទៅលើប្រទេសភូមានេះ”។ ក៏ប៉ុន្តែបក្សប្រឆាំងភូមាបានទាមទារឲ្យមានការប្រុងប្រយ័ត្នហើយនិងឲ្យមានតម្លាភាពពាក់ព័ន្ធនឹងការបោះទុនធ្វើវិនិយោគ ជាពិសេសនៅក្នុងវិស័យប្រេងកាតនិងឧស្ម័ន។
គួរកត់សម្គាល់ថា បច្ចុប្បន្ននេះ ប្រទេសភូមានៅមានកង្វះខាតច្រើនណាស់ ទាំងក្របខ័ណ្ឌច្បាប់ត្រឹមត្រូវ ទាំងប្រព័ន្ធធនាគារឲ្យបានសមស្រប។ ទោះបីជាលោកប្រធានាធិបតីភូមា ថេន សេន បានធ្វើកំណែទម្រង់យ៉ាងច្រើន ចាប់តាំងពីរបបគ្រប់គ្រងផ្តាច់ការយោធាភូមាបានត្រូវរំលាយនៅខែមីនាឆ្នាំ២០១១រួចមក។ លោក ថេន សេន បានថ្លែងអះអាងឲ្យដឹងទៀតថា លោកនឹងខិតខំធ្វើឲ្យមាន “តម្លាភាពអតិបរមា” ដើម្បីបញ្ចៀសកុំឲ្យប្រាក់ចំណូលរដ្ឋធ្លាក់ទៅក្នុងដៃរបស់ជនមួយក្តាប់តូច។
ពាក្យសន្យារបស់លោក ថេនសេន ខាងលើនេះ សមស្របនឹងសេចក្តីប្រកាសសម្រាលទណ្ឌកម្មរបស់ប្រធានាធិបតីអាមេរិកបារ៉ាក់អូបាម៉ាដែលបានថ្លែងប្រកាសថា “សហគ្រាសអាមេរិកត្រូវមានស្មារតីទទួលខុសត្រូវក្នុងការបោះទុនធ្វើវិនិយោគនៅក្នុងប្រទេសភូមា”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ