អង្គការ Opep បានបង្កើនផលិតកម្មប្រេងក្នុងខែមេសា ទោះបីតម្លៃនៅទាបខ្លាំង
នៅថ្ងៃសុក្រ ទី១៣ ឧសភា អង្គការនៃក្រុមប្រទេសនាំប្រេងចេញហៅកាត់ថា Opep បានផ្សព្វផ្សាយរបាយការណ៍ប្រចាំខែមេសាកន្លងទៅ។ នៅក្នុងរបាយការណ៍នោះ Opep បានប្រាប់ឲ្យដឹងពីកំណើនបរិមាណផលិតកម្មប្រេងក្នុងខែមេសាធៀបនឹងខែមីនា។ របាយការណ៍ថ្មីរបស់ Opep បានធ្លាក់មក ជិត ១ខែក្រោយពីក្រុមប្រទេសសមាជិក Opep និងក្រុមប្រទេសមិនសមាជិក Opep និយាយមិនចុះសម្រុងគ្នាក្នុងការមិនបង្កើនផលិតកម្មប្រេងដើម្បីទប់ការធ្លាក់ថ្លៃយ៉ាងគំហុកតាំងពីពាក់កណ្តាលឆ្នាំ ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
នៅទីបំផុត និងខុសពីការគិតទុក អង្គការ Opep មិនបានកាត់បន្ថយ ឬក៏រក្សាកម្រិតផលិតកម្មប្រេងឲ្យនៅឋេរទេ តែបែរជាបានដំឡើងបន្ថែមទៅវិញ។ នៅក្នុងរបាយការណ៍ប្រចាំខែចេញផ្សាយក្នុងថ្ងៃសុក្រ ទី១៣ ឧសភា Opep បានប្រាប់ឲ្យដឹងពីការបូមប្រេងក្នុង១ថ្ងៃៗចំនួនជាង ៣២លានបារីលនាខែមេសាកន្លងទៅ ពោលមានការកើនឡើងក្នុង១ថ្ងៃៗចំនួន ១៨៨ ០០០បារីលធៀបនឹងខែមីនា។ គឺជាកំណើនមួយដ៏សំខាន់ដែល Opep មិនធ្លាប់បានធ្វើទេ បើគិតតាំងពីឆ្នាំ ២០០៨។ ប្រសិនបើ Opep នៅបន្តប្រកាន់យកវិធានការដូចក្នុងខែមេសា នោះកំណើនបរិមាណប្រេងជាមធ្យមក្នុង១ថ្ងៃនៅឆ្នាំ ២០១៦ នេះនឹងមានប្រមាណ ៩៥០ ០០០បារីល។
សូមជម្រាបជូនថា តម្លៃប្រេងនៅលើទីផ្សារអន្តរជាតិបានធ្លាក់ថ្លៃយ៉ាងគំហុកតាំងពីពាក់កណ្តាលឆ្នាំ ២០១៤ ពីតម្លៃ ១០០ដុល្លារក្នុង១បារីលនាដើមឆ្នាំ ២០១៤ មកនៅប្រមាណតែជាង ៤០ដុល្លារក្នុង១បារីលនាពេលបច្ចុប្បន្ន។ កាលពីជិត ១ខែកន្លងទៅ Opep បានរួមប្រជុំប្រទេសសមាជិក និងប្រទេសមិនសមាជិកដូចយ៉ាងរុស្ស៊ីដើម្បីស្វែងរកវិធានការទប់ស្កាត់ការធ្លាក់ថ្លៃតម្លៃប្រេង តែទទួលបរាជ័យដោយនិយាយមិនចុះសម្រុងគ្នា។ ក្រៅពីកិច្ចប្រជុំរវាងប្រទេសសមាជិក និងមិនសមាជិក Opep ក៏ធ្លាប់បានរួមប្រជុំគ្នាឯងដែរ តែនៅនិយាយមិនត្រូវគ្នាដដែល។
តាមគម្រោង អង្គការ Opep ត្រៀមនឹងបើកកិច្ចប្រជុំថ្មីរវាងប្រទេសសមាជិក និងមិនសមាជិកនៅថ្ងៃទី២ មិថុនាខាងមុខ តែប្រទេសរុស្ស៊ីតាមរយៈរដ្ឋមន្រ្តីក្រសួងថាមពលលោកអាឡិចសង់ ណូវ៉ាក់បានទម្លាយឲ្យដឹងនៅថ្ងៃសុក្រ ទី១៣ ឧសភាថា ភាគីរុស្ស៊ីអាចនឹងអវត្តមាននៅក្នុងកិច្ចប្រជុំនោះ។ ទន្ទឹមគ្នានេះ លោកអាឡិចសង់ ណូវ៉ាក់បានបន្ថែមថា រុស្ស៊ីក្នុងនាមជាប្រទេសផលិតប្រេងទី១ ក្នុងលោកបានត្រៀមខ្លួនជានិច្ចដើម្បីចូលរួមប្រជុំជាមួយអង្គការ Opep ប្រសិនបើមានសំណើអញ្ជើញឲ្យចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ