ប្រទេសផលិតប្រេងប្រជុំគ្នាដើម្បីជជែកពីបញ្ហាតម្លៃប្រេងទាបជ្រុល
បណ្តាប្រទេសនាំចេញប្រេងឆៅជួបប្រជុំគ្នា នៅថ្ងៃអាទិត្យនេះ នៅក្នុងទីក្រុងដូហា ប្រទេសកាតា ដើម្បីជជែកគ្នា អំពីបញ្ហាតម្លៃប្រេងឆៅ ដែលមានតម្លៃទាបខ្លាំង ហើយបង្កជាបញ្ហាដល់សេដ្ឋកិច្ចជាតិរបស់ពួកគេ ដែលសុទ្ធសឹងជាប្រទេសពឹងផ្អែកលើចំណូលពីការលក់ប្រេង។ ប្រធានបទចម្បងនៃកិច្ចប្រជុំថ្ងៃអាទិត្យនេះ គឺបរិមាណប្រេង ដែលគេត្រូវបូមយកទៅលក់ក្នុងទីផ្សារអន្តរជាតិ។
ចុះផ្សាយនៅថ្ងៃ៖
កិច្ចប្រជុំនៅទីក្រុងដូហានៅថ្ងៃអាទិត្យនេះ គឺជាកិច្ចប្រជុំពិសេស ដោយមានការចូលរួមពីសំណាក់ប្រទេសសមាជិកអង្គការ OPEC ផង និងប្រទេសក្រៅ OPEC ផង ជាពិសេស គឺរុស្ស៊ី ដែលជាប្រទេសនាំប្រេងចេញច្រើនជាងគេលំដាប់ទី២ លើពិភពលោកបន្ទាប់ពីអារ៉ាប៊ីសាអ៊ូឌីត។ ការបើកកិច្ចប្រជុំពិសេសស្ទើរតែគ្រប់ប្រទេសនាំចេញប្រេងបែបនេះ គឺជាការបញ្ជាក់ឲ្យឃើញពីក្តីបារម្ភ អំពីតម្លៃប្រេង ដែលធ្លាក់ចុះទាបខ្លាំង ហួសពីអ្វីដែលគេរំពឹងចង់បាន។
គួរបញ្ជាក់ថា តម្លៃប្រេងឆៅនៅលើទីផ្សារអន្តរជាតិបានធ្លាក់ចុះជាបន្តបន្ទាប់ ចាប់តាំងពីខែមិថុនាឆ្នាំ២០១៤ គឺធ្លាក់ចុះពី ១១៥ដុល្លារក្នុងមួយបារីល រហូតមកដល់កម្រិតទាបបំផុតត្រឹម ២៧ដុល្លារ នៅដើមឆ្នាំ២០១៦ មុននឹងកើនឡើងមកវិញត្រឹមប្រមាណជា ៤០ដុល្លារក្នុងមួយបារីល។
ការធ្លាក់ចុះនៃតម្លៃប្រេងនេះបានធ្វើឲ្យប្រទេសនាំចេញប្រេងត្រូវបាត់បង់ប្រាក់ចំណូលរាប់ពាន់លានដុល្លារ ហើយមូលនិធិរូបិយវត្ថុអន្តរជាតិ (IMF) ទើបនឹងបានធ្វើការវាយតម្លៃកាលពីដើមសប្តាហ៍មុនថា វាបានធ្វើឲ្យប៉ះពាល់យ៉ាងខ្លាំងដល់ស្ថិរភាពហិរញ្ញវត្ថុនៃបណ្តាប្រទេសអស់ទាំងនេះ។
គ្រប់គ្នាសុទ្ធតែដឹងថា ការធ្លាក់ចុះនៃតម្លៃប្រេងឆៅនៅក្នុងពេលបច្ចុប្បន្ននេះ គឺដោយសារតែបរិមាណប្រេងដែលគេបូមយកមកលក់ មានចំនួនច្រើនជាងតម្រូវការនៃទីផ្សារ។ ដូច្នេះ វិធានការសមស្រប ដើម្បីជំរុញឲ្យតម្លៃប្រេងកើនឡើងមកវិញ គឺការកាត់បន្ថយការបូមប្រេង។ ក៏ប៉ុន្តែ ប្រទេសខ្លះ ជាពិសេស អារ៉ាប៊ីសាអ៊ូឌីត មិនព្រមកាត់បន្ថយការបូមប្រេង ដោយសារតែខ្លាចបាត់បង់ចំណែកទីផ្សារ ទៅក្នុងដៃក្រុមហ៊ុនអាមេរិក។
ហេតុដូច្នេះហើយបានជាគេមិនរំពឹងថា នៅក្នុងការប្រជុំនៅក្នុងទីក្រុងដូហានៅថ្ងៃនេះ គេនឹងជជែកគ្នាតែទៅលើការបង្កកបរិមាណផលិតប៉ុណ្ណោះ ពោលគឺ រក្សាបរិមាណបូមប្រេងឲ្យនៅត្រឹមកម្រិតបច្ចុប្បន្ន ដោយគ្មានការបង្កើន ប៉ុន្តែ ក៏គ្មានការកាត់បន្ថយនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ