អូតង់ក្លាយជាមេបញ្ជាការប្រតិបត្តិការយោធានៅលីប៊ី
ដំណើររុលទៅមុខរបស់ពួកបះបោរប្រឆាំងនឹងរបបកាដាហ្វ៊ី កំពុងតែជួយសម្រួលការវាយប្រហាររបស់កងទ័ពសម្ព័ន្ធមិត្តអន្តរជាតិ។ កងទ័ពសម្ព័ន្ធមិត្តដែលពេលនេះ មានអង្គការអូតង់ ជាមេបញ្ជាការដឹកនាំប្រតិបត្តិការសឹក នៅលីប៊ី ស្របតាមសេចក្តីសម្រេចចិត្តរបស់អង្គការសហប្រជាជាតិ ចាប់ពីរសៀលថ្ងៃទី២៧មីនា ២០១១។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ប្រតិបត្តិការយោធានៅលីប៊ី ទាំងមូលត្រូវដឹកនាំ ដោយអូតង់ ក្នុងក្របខ័ណ្ឌអង្គការសហប្រជាជាតិ។ ការទទួលខុសត្រូវនេះ ចាប់ផ្តើមមានសុពលភាពភ្លាមតែម្តង។ នេះបើតាមការអះអាងរបស់អគ្គលេខាធិការអង្គការអូតង់។
អូតង់ ដែលមានភារៈទទួលបន្ទុកធ្វើប្រតិបត្តិការល្បាតលើតំបន់ ហាមឃាត់ការហោះហើរ លើដែនអាកាសលីប៊ី និងដែលទទួលខុសត្រូវត្រួតពិនិត្យដែនសមុទ្ទក្រែងមានការបញ្ជូនអាវុធឲ្យលីប៊ីមក រួចស្រាប់ទៅហើយនោះ នៅពេលនេះ អូតង់ ត្រូវគ្រប់គ្រងបញ្ជាលើការវាយប្រហារដែនគោកទាំងឡាយ ដើម្បីកាត់ផ្តាច់ និងកម្ទេចកម្លាំងយោធាស្និទ្ធនឹងរបប កាដាហ្វ៊ី។
នេះគឺជាអ្វីដែលឯកអគ្គរដ្ឋទូតទាំង២៨ ប្រទេសជាសមាជិកអង្គការអូតង់បានយល់ព្រមព្រៀងគ្នានៅល្ងាចមិញ បិទបញ្ចប់រាល់ភាពចម្រូងចម្រាសនៃការស្វែងរកមេបញ្ជាការ ដែលអូសបន្លាយអស់រយៈពេលមួយសប្តាហ៍។
សូមបញ្ជាក់ថាពីដំបូងឡើយ បារាំងជាប្រទេសមួយក្នុងចំណោមបីប្រទេសដែលជាអ្នកដឹកនាំប្រតិបត្តិការយោធានៅលីប៊ី ប្រាថ្នាចង់ឲ្យប្រទេសសម្ព័ន្ធមិត្ត បារាំង អាមេរិក និងអង់គ្លេស រក្សាការទទួលខុសត្រូវទម្លាក់គ្រាប់បែក ប៉ុន្តែប្រទេសទួរគី ដែលមានសិទ្ធិប្រឆាំងវេតូក្នុងអង្គការអូតង់បានប្រឆាំង។ ហើយបន្តិចម្តងៗសំណើរបស់ប្រទេសជាសមាជិកកាន់តែខិតចូលគ្នារហូតដល់មានកិច្ចព្រមព្រៀង ប្រគល់ការទទួលខុសត្រូវការពារបណ្តាជនស៊ីវិល ព្រមទាំងតំបន់មានប្រជាជនរស់នៅ ឲ្យអូតង់ ដោយមានបេសកកម្មអាចទម្លាក់គ្រាប់បែកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ