ចំណាប់ខ្មាំងហ្វីលីពីនទាំងអស់ត្រូវបានដោះលែងគ្រប់គ្នាហើយ
អាជ្ញាធរហ្វីលីពីន បានរំពឹងទុកនៅថ្ងៃសៅរ៍នេះថា ចំណាប់ខ្មាំងទាំងអស់ដែលក្រុមឧទ្ទាមអ៊ីស្លាម ឈ្មោះថា ក្រុមរណសិរ្សម៉ូរ៉ូរំដោះជាតិហ្វីលីពីន បានចាប់យកទៅ ជិតបីសប្តាហ៍មកនេះ នៅទីក្រុងកំពង់ផែ Zamboanga ត្រូវបានដោះលែងគ្រប់គ្នាហើយ។ បើគិតទៅ ចំណាប់ខ្មាំងសរុប១៩៥នាក់ បានត្រូវជួយសង្គ្រោះ រឺក៏ត្រូវបានក្រុមឧទ្ទាមដោះលែង។ យោងតាមកងទ័ពហ្វីលីពីន ការប្រយុទ្ធកន្លងមក រវាងកងទ័ព និងក្រុមឧទ្ទាមអ៊ីស្លាម បានធ្វើអោយស្លាប់ក្រុមឧទ្ទាម ១៦៦នាក់ ស្លាប់ទាហានហ្វីលីពីន២៣នាក់ និងជនស៊ីវិល១២នាក់។
ចុះផ្សាយនៅថ្ងៃ៖
ស្តាប់ - ០១:៥១
លោកស្រី អាប៊ីហ្កែល វ៉ាល់តេ ជាអ្នកនាំពាក្យប្រធានាធិបតីហ្វីលីពីន បានបញ្ជាក់ប្រាប់ថា រាល់បណ្តាជនដែលគេគិតថា ត្រូវបានក្រុមឧទ្ទាមរណសិរ្សម៉ូរ៉ូរំដោះជាតិហ្វីលីពីន ចាប់យកធ្វើជាចំណាប់ខ្មាំង នៅទីក្រុង Zamboanga ជិតបីសប្តាហ៍មកនេះ ត្រូវបានគេរកឃើញអស់ហើយ។ នៅក្រុងកំពង់ផែ Zamboanga ស្ថិតលើកោះមីនដាណាវ ចំណាប់ខ្មាំងដែលមានគ្នាសរុប ១៩៥នាក់ ត្រូវបានជួយសង្គ្រោះ ឬក៏ត្រូវបានក្រុមឧទ្ទាមដោះលែង។
ទោះយ៉ាងនេះក្តី កងទ័ពហ្វីលីពីន បានទទូចអោយបន្តប្រតិបត្តិការយោធាប្រឆាំងក្រុមឧទ្ទាមជាបន្តទៀត ចាប់ខ្លួនក្រុមឧទ្ទាមអោយបានគ្រប់គ្នា ដើម្បីធានាបានសន្តិសុខជាក់លាក់។ នៅពេលនេះ ក្រុមឧទ្ទាមមួយចំនួននៅលាក់ខ្លួន នៅក្នុងក្រុងនៅឡើយ។ ក្នុងប្រតិបត្តិការប្រឈមមុខជាមួយក្រុមឧទ្ទាមអ៊ីស្លាម កន្លងមក កងទ័ពបានចាប់ខ្លួនក្រុមឧទ្ទាមបាន២៣៨នាក់។ តុលាការហ្វីលីពីននឹងកាត់ទោសជនទាំងអស់នេះ នៅពេលខាងមុខ។
កងទ័ពហ្វីលីពីននៅមិនទាន់ដឹងថា តើហាប៊ីយេ ម៉ាលិក ដែលគេគិតថា ជាមេដឹកនាំនៃការវាយប្រហារជិត២០ថ្ងៃមកនេះ និងនួរ មីស៊ូយ៉ារី ស្ថាបនិកក្រុមឧទ្ទាមរណសិរ្សម៉ូរ៉ូរំដោះជាតិ នេះ កំពុងស្ថិតនៅទីណានោះទេ។ កងទ័ពហ្វីលីពីនគិតថា មីស៊ូយ៉ារី ជាអ្នកបញ្ជូនម៉ាលិក និងសកម្មជនរាប់រយនាក់ទៅក្រុង Zamboanga ដើម្បីធ្វើអោយបរាជ័យកិច្ចចរចាសន្តិភាពរវាងរដ្ឋាភិបាល និងក្រុមឧទ្ទាមអ៊ីស្លាមមួយក្រុមទៀត ដែលមានឈ្មោះថា រណសិរ្សម៉ូរ៉ូរំដោះអ៊ីស្លាម ដែលជាក្រុមប្រណាំងប្រជែងនឹងចលនារណសិរ្សម៉ូរ៉ូរំដោះជាតិហ្វីលីពីន។
សំរាប់ក្រុមឧទ្ទាមរណសិរ្សម៉ូរ៉ូរំដោះជាតិ ការចរចារវាងរដ្ឋាភិបាលចរចាជាមួយក្រុមប្រជែងនេះ គឺជាការរំលោភលើកិច្ចព្រមព្រៀងសន្តិភាពឆ្នាំ១៩៩៦ ដែលរដ្ឋាភិបាលបានចុះហត្ថលេខាជាមួយក្រុមខ្លួន។ កន្លងមក រដ្ឋាភិបាល និងក្រុមឧទ្ទាមបានជួបចរចាគ្នាដើម្បីព្យាយាមដាក់តំបន់ប៉ែកខាងត្បូង ជាតំបន់ស្វ័យត គឺមិនមែនជាតំបន់ឯករាជ្យនោះទេ។ គិតពីទសវត្សរឆ្នំា ១៩៧០មក ការប្រឈមមុខរវាងរដ្ឋាភិបាល និងក្រុមរណសិរ្យម៉ូរ៉ូរំដោះជាតិរបស់នួរ មីស៊ូយ៉ារី បានសម្លាប់មនុស្ស ១៥ម៉ឺននាក់ និងធ្វើអោយមានប្រជាជនភៀសខ្លួនរាប់សិបពាន់នាក់ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ