សម្ព័ន្ធប្រឆាំងស៊ីរីបើកស្ថានទូតទីមួយរបស់ខ្លួននៅប្រទេសកាតារ
បន្ទាប់ពីបានទទួលអាសនៈតំណាងប្រទេសស៊ីរីពីសំណាក់សម្ព័ន្ធអារ៉ាប់រួចមក សម្ព័ន្ធប្រឆាំងស៊ីរីបានបើកស្ថានទូតទីមួយរបស់ខ្លួន កាលពីថ្ងៃពុធម្សិលមិញ នៅក្រុងដូហាប្រទេសកាតារ។ ស្របពេលនេះដែរ ឆ្លើយតបទៅនឹងការបដិសេធរបស់អាមេរិក ដែលមិនព្រមពង្រីកខែលការពារមីស៊ីលតាមសំណូមពររបស់ខ្លួន សម្ព័ន្ធប្រឆាំងស៊ីរីបានចោទអាមេរិកថា មិនចង់អោយចលនាបដិវត្តន៍ប្រឆាំងរបបផ្តាច់ការរបស់លោកអាសាដ ទទួលបានជោគជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
កាលពីថ្ងៃពុធម្សិលមិញនេះ សម្ព័ន្ធប្រឆាំងស៊ីរីបានបើកសម្ពោធស្ថានទូតទីមួយរបស់ខ្លួន នៅប្រទេសកាតារ ដោយមានវត្តមានរបស់មេដឹកនាំដែលទើបលាលែងពីតំណែង គឺលោក Al-Khatib និងរដ្ឋមន្ត្រីការបរទេសប្រទេសកាតារ លោក Al-Attiya។
ស្ថានទូតរបស់សម្ព័ន្ធប្រឆាំងស៊ីរី មានទីតាំងនៅក្នុងសង្កាត់ការទូតមួយ ក្នុងក្រុងដូហា ហើយក្រុងដូហាជាអ្នកដែលបានផ្តល់ទីកន្លែងស្ថានទូតនេះដល់សម្ព័ន្ធប្រឆាំងស៊ីរី។
ស្ថានទូតនេះ ស្ថិតនៅក្រោមការគ្រប់គ្រងរបស់លោក Nizar Haraki ឯកអគ្គរដ្ឋទូតរបស់សម្ព័ន្ធប្រឆាំងស៊ីរី នៅកាតារ។
បក្សប្រឆាំងស៊ីរីក៏បានប្រាប់ផងដែរថា ខ្លួនមានឯកអគ្គរដ្ឋទូតជាច្រើនរូបទៀត នៅតាមបណ្តាប្រទេសនានាដូចជា បារាំង ទួរគី លីប៊ី សហរដ្ឋអាមេរិក រឺក៏អង់គ្លេសជាដើម។ ប៉ុន្តែអ្នកទាំងអស់នេះ ពុំមានបេសកកម្មផ្នែកការទូតអ្វីនោះទេ។
ពិធីបើកសម្ពោធស្ថានទូតនេះ បានធ្វើឡើងបន្ទាប់ពីសម្ព័ន្ធប្រឆាំងស៊ីរីបានទទួលអាសនៈតំណាងប្រទេសស៊ីរីពីសំណាក់សម្ព័ន្ធអារ៉ាប់ កាលពីថ្ងៃអង្គារកន្លងមក។
នៅក្នុងថ្ងៃបើកសម្ពោធនេះដែរ សម្ព័ន្ធប្រឆាំងស៊ីរីបានឆ្លៀតឧកាសចោទសហរដ្ឋអាមេរិកថាមិនចង់អោយចលនាបដិវត្តន៍ប្រឆាំងរបបផ្តាច់ការលោកអាសាដ ទទួលបានជោគជ័យ។
ការចោទប្រកាន់នេះ ជាការឆ្លើយតបទៅនឹងការបដិសេធរបស់អាមេរិក ដែលមិនព្រមពង្រីកខែលការពារមីស៊ីលនៅប្រទេសទួរគី ទៅតាមសំណូមពររបស់ខ្លួន។
គួររំលឹកឡើងវិញថា កាលពីថ្ងៃអង្គារ សេតវិមានអាមេរិកបានប្រាប់ទៅលោក Al-Khatib ដែលជាមេដឹកនាំសម្ព័ន្ធប្រឆាំងស៊ីរីថា អង្គការអូតង់មិនអាចផ្គត់ផ្គង់ខែលការពារមីស៊ីលដើម្បីការពារតំបន់ដែលក្រុមឧទ្ទាមស៊ីរីកាន់កាប់នោះទេ។ នៅប្រទេសទួរគី នៅតាមបណ្តោយព្រំដែនជាប់ជាមួយស៊ីរី មានដាក់ខែលការពារមីស៊ីលនេះរួចទៅហើយ គឺប្រើក្នុងករណីមានការបាញ់មីស៊ីលពីសំណាក់ស៊ីរី។
សហរដ្ឋអាមេរិកបានលើកឡើងថា ក្នុងពេលនេះ អង្គការអូតង់មិនមានគោលបំណងធ្វើអន្តរាគមន៍យោធានៅស៊ីរីនោះទេ ហើយរដ្ឋាភិបាលអាមេរិកក៏តែងតែពិនិត្យនិងដាក់គោលជំហររបស់ខ្លួនអោយសមស្របទៅនឹងស្ថានការជម្លោះនៅស៊ីរីផងដែរ។
គួរបញ្ជាក់ថា អាមេរិកធ្លាប់បានចំណាយថវិការាប់រយលានដុល្លារ ដើម្បីជួយផ្នែកមនុស្សធម៌ នៅស៊ីរី។ ប៉ុន្តែអាមេរិកបដិសេធមិនធ្វើជំនួយយោធាដល់ក្រុមឧទ្ទាមសោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ