គេចង់ពុះបំបែក“សម្ព័ន្ធ Medvedev-Poutine “ ដែលកាន់អំណាចនៅរុស្ស៊ី
នេះជាគោលដៅសម្ងាត់មួយ នៃ ក្រុមប្រទេសមានឈ្មោះជាអក្សរកាត់ថា E- PINE ផ្សំឡើង ពី ស.រ.អា. និង បណ្តាប្រទេសអឺរ៉ុបឧត្តរ ពោលគឺ ពួកប្រទេស Scandinaves និង ៣ប្រទេសមាត់សមុទ្រ Baltique។ ពត៌មាន ទើបចុះផ្សាយថ្ងៃនេះ ដោយកាសែតប្រទេស Suede ឈ្មោះ Dagens Nyheter យោងទៅលើ WikiLeaks និងថ្ងៃនេះដែរស្រង់ចេញមក ដោយមធ្យោបាយឃោសនាមហាជនខ្លះ នៅរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់កែវ ឆាយាពីទីក្រុងម៉ូស្គូ
ក្រុមប្រទេសមានឈ្មោះ E- PINE ដែលន័យរបស់វា គឺ ការធ្វើសហប្រតិបត្តិការដើម្បី ពង្រឹង ភាពជាដៃគូ នៅអឺរ៉ុបឧត្តរ តែងរួមប្រជុំ២ដងក្នុងមួយឆ្នាំ ៖ ម្តងនៅក្រុង Washington ម្តង នៅរដ្ឋធានីណាមួយ នៃ ប្រទេស Scandinaves និងប្រទេស Baltes។ កិច្ចប្រជុំនេះតែងលើកយកទៅពិភាក្សា គឺ ៖ “ នយោបាយដែលត្រូវអនុវត្តចំពោះ ប្រទេសរុស្ស៊ី“។
គឺពិតជា ក្នុងអង្គប្រជុំនៅក្រុង Washington កាលពីឆ្នាំ២០០៨ ដែលតំណាងរបស់ ប្រទេសស៊ុយអែតបានអំពាវនាវឲ្យជួយពង្រឹងគោលជំហរលោកប្រធានាធិបតីរុស្ស៊ី Medvedev ឲ្យធ្វើ ប្រជាធិបតេយ្យូបនីយកម្ម និងទំនើបកម្ម ប្រទេសរុស្ស៊ី ហើយតាមផ្លូវនេះ គឺ ពុះញែករូបគាត់ឲ្យនៅដាច់ពីឥទ្ធិពលលោកនាយករដ្ឋមន្ត្រី Poutine។ ទោះបីពេលនោះ មានការជំទាស់ ពីខាងប្រទេស ន័រវែសក្តី ក៏ តំណាងរបស់ ស៊ុយអែតនៅតែបន្តដាក់ចេញផែនការនោះ ទាំង កត់សំគាល់ថា វិធីដែលធ្លាប់ប្រើពីមុនៗ សម្រាប់ធ្វើសហប្រតិបត្តិការជាមួយរុស្ស៊ី គឺលែងនាំមក នូវផ្លែផ្កាទៀតឡើយ។
រាល់តែប្រតិភូឯទៀតនៃកិច្ចប្រជុំ សុទ្ធតែបានឯកភាពជាមួយមតិស៊ុយអែត ដែលថា បើ ក្រុមប្រទេស E- PINE ចេះពង្រឹងជំហររបស់លោក Medvedev បានដូចចិត្តមែន នោះ រុស្ស៊ីក្នុងពេលឆាប់ៗខាងមុខ នឹងក្លាយទៅជា ប្រទេសទំនើបទាន់សម័យ និង ស៊ីវីល័យ។ ទន្ទឹមនេះ គេក៏ទទួលស្គាល់ដែរថា រុស្ស៊ី ជាដៃគូដ៏លំបាកសំរាប់ ពួកប្រទេស Scandinaves និង ៣ប្រទេស នៅមាត់សមុទ្រ Baltique និងថា ការផ្លាស់ប្តូរដែលប្រព្រឹត្តទៅនៅរុស្ស៊ី ច្បាស់ជានឹងពុំប្រែប្រទេសនេះ ឲ្យស្រួលនិយាយ ស្តាប់គ្នាឡើយ។
ក្នុងកិច្ចប្រជុំនោះ គេថែមទាំង ចែកចាយឲ្យគ្នាទៅវិញទៅមក នូវពត៌មាន មិនគ្រាន់តែ អំពី ប្រទេសរុស្ស៊ី ប៉ុណ្ណោះទេ តែក៏ អំពីប្រទេស Georgie Bielorussie Moldavie Ukraine។ គេគាំទ្រឲ្យ Georgie និង Ukraine ចូលជាសមាជិកបក្សសម្ពន្ធ OTAN និងថា ទំនាក់ទំនង Russie-OTAN គឺនាំជាគុណប្រយោជន៍ ដល់រុស្ស៊ីច្រើនជាង។
ពត៌មានថ្ងៃនេះ ដែលស្រង់ចេញ ពីទំពរ WikiLeaks ក៏រំលឹកថា ពិតជាស៊ុយអែត ដែលសាមគ្គីជាមួយ ស.រ.អា. ប្តូរផ្តាច់ជាងគេ គាំទ្រ Georgie ក្នុងជម្លោះទល់នឹងរុស្ស៊ីឆ្នាំ ២០០៨។
ជាបញ្ចប់សេចក្តី គួរនិយាយថា ការប៉ុនប៉ង ពុះបំបែក សម្ពន្ធអំណាច Medvedev-Poutine ក៏ធ្លាប់បានត្រូវប្រារព្ធធ្វើ ដោយ អតីតអភិបាលក្រុងម៉ូស្គូ លោក Loujkov ដែលស្និទនឹងលោក នាយករដ្ឋមន្ត្រី Poutine ជាង ហើយដែលបន្ទាប់មក គឺបានត្រូវ លោកប្រធានាធិបតី Medvedev ចេញក្រិត្យ ទម្លាក់ពីតំណែងនោះ ក្រោមលេសថា លែងជឿទុកចិត្តលើរូបគាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ