ក្រុមគ្រួសារបារាំងដែលត្រូវចាប់ជំរិតនៅអាហ្វ្រិក ត្រលប់មកដល់ក្រុងប៉ារីសហើយ
បន្ទាប់ពីត្រូវបានក្រុមនិកាយបូកូ អារ៉ាំ ចាប់ជម្រិតឃុំឃាំងអស់រយៈពេលពីរខែនៅប្រទេសនីហ្សេរីយ៉ាមក ជនជាតិបារាំងទាំង៧នាក់ ដែលស្ថិតក្នុងក្រុមគ្រួសារតែមួយ បានត្រូវដោះលែងអោយរួចខ្លួន កាលពីថ្ងៃសុក្រម្សិលមិញនេះ។ នៅថ្ងៃសៅរ៍នេះ ពួកគេបានធ្វើដំណើរត្រលប់មកកាន់ក្រុងប៉ារីស ប្រទេសបារាំងវិញហើយ ដោយបានទទួលការទទាក់ទទួលពីប្រធានាធិបតីបារាំងផ្ទាល់ នៅអាកាសយានដ្ឋាន។
ចុះផ្សាយនៅថ្ងៃ៖
ស្តាប់ - ០២:៣៨
ជនជាតិបារាំងទាំង៧រូប ដែលត្រូវគេចាប់ជម្រិតនិងឃុំឃាំងអស់រយៈពេលពីរខែ នៅប្រទេសនីហ្សេរីយ៉ានោះ ជាសមាជិកនៃគ្រួសារតែមួយ ក្នុងត្រកូល Moulin-Fournier។
ពួកគេទាំង៧រូបនោះមាន ប្តីប្រពន្ធ និងបងប្អូនប្រុសពួកគេម្នាក់ ព្រមទាំងកូនប្រុស៤នាក់ មានអាយុពី៥ ទៅ១២ឆ្នាំ។
នៅថ្ងៃសៅរ៍នេះ តាំងតែពីម៉ោងប្រាំមួយព្រឹក គ្រួសារ Moulin-Fournier បានត្រលប់មកដល់ប្រទេសបារាំងវិញហើយ តាមយន្តហោះរបស់ក្រសួងការបរទេសបារាំង។ ប្រធានាធិបតីបារាំង François Hollande បានទៅទទួលពួកគេ នៅព្រលានយន្តហោះដោយផ្ទាល់។
គួររំលឹកឡើងវីញថា នាឧកាសដំណើរកម្សាន្តរបស់ខ្លួននៅប្រទេសCameroun ជនជាតិបារាំងទាំង៧រូប ត្រូវបានគេចាប់ជម្រិតនៅថ្ងៃ១៩ កុម្ភៈ ដើមឆ្នាំ នៅចុងភាគខាងជើងប្រទេសនេះ ក្បែរព្រំប្រទល់ជាមួយប្រទេសនីហ្សេរីយ៉ា។ បន្ទាប់មក ពួកគេស្ថិតនៅក្រោមការឃុំឃាំងរបស់ក្រុមនិកាយ បូកូ អារ៉ាំ នៅប្រទេសនីហ្សេរីយ៉ា។ ក្រុមបូកូ អារ៉ាំបានទាមទារអោយមានការដោះលែងស្ត្រីនិងកុមារនានានៃក្រុមខ្លួន ដែលជាប់ឃុំឃាំងនៅនីហ្សេរីយ៉ា និងកាំម៉ឺរូន ជាថ្នូរនឹងការដោះលែងជនជាតិបារាំងទាំង៧រូប។
កាលពីថ្ងៃសុក្រម្សិលមិញ គ្រួសារ Moulin-Fournier ត្រូវបានដោះលែងហើយ។ បន្ទាប់មក ពួកគេ បានធ្វើដំណើរទៅក្រុងYaoundé ប្រទេសCameroun។ នៅទីនោះ ប្រមុខការទូតបារាំងលោក Laurent Fabius បានទៅទទួលយកពួកគេ ត្រលប់មកប្រទេសបារាំងវិញ។
ចុះពីយន្តហោះមក គេសង្កេតឃើញជនជាតិបារាំងទាំង៧រូប មានរូបរាងស្គមស្គាំង។ ប៉ុន្តែពួកគេមិនមានបញ្ហាសុខភាពអ្វីនោះទេ។ លោក Tanguy ដែលជាឳពុកនៃគ្រួសារ បានស្រកទម្ងន់អស់១៤គីឡូ។ លោកបានបង្ហាញពីការលំបាករបស់ពួកលោក នៅក្រោមការឃុំឃាំងពីរខែកន្លងមក ដោយរូបលោក និងក្រុមគ្រួសារត្រូវបានកាត់ផ្តាច់ពីពិភពខាងក្រៅ។ លោកមានការត្រេកអរដោយសារតែបានប្រធានាធិបតីបារាំង និងសមាជិកគ្រួសាររបស់លោកនានាផ្សេងទៀត បានមកទទួលរូបលោក និងក្រុមគ្រួសារយ៉ាងកក់ក្តៅ។ ទោះយ៉ាងនេះក្តី មេគ្រួសារ Moulin-Fournier រូបនេះ បានប្រាប់ថា នឹងត្រលប់ទៅប្រទេសCameroun ម្តងទៀត ដោយសារលោកស្រលាញ់ប្រទេសនេះ។
ប្រធានាធិបតីបារាំង François Hollande បានថ្លែងអំណរគុណដល់អាជ្ញាធរ Cameroun និងនីហ្សេរីយ៉ា ដែលបានស្វះស្វែងសំរេចបាននូវការដោះលែងជនជាតិបារាំងទាំង៧រូប។
ព័ត៌មានទាក់ទងនឹងលក្ខខណ្ឌដែលនាំអោយមានការដោះលែងមិនត្រូវបង្ហាញអោយដឹងជាផ្លូវការនោះទេ។ ប៉ុន្តែ ប្រធានាធិបតីបារាំងបានគូសបញ្ជាក់ថា បារាំងពុំបានបង់ប្រាក់កាសអ្វីជាថ្នូរនឹងការដោះលែងនេះទេ។
នៅទ្វីបអាហ្វ្រិក នៅមានជនជាតិបារាំងយ៉ាងហោចណាស់ក៏៧នាក់ទៀតដែរ ដែលស្ថិតនៅក្នុងការចាប់ជម្រិតនៅឡើយ។ ក្រុមភេរវកម្មអាល់កៃដា នៅម៉ាហ្ក្រេប បានប្រកាសថា ជនជាតិបារាំង៦នាក់ កំពុងស្ថិតក្នុងកណ្តាប់ដៃរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ