រុស្ស៊ី និងបេឡូរុស្ស៊ី ដែលតែងជាសម្ព័ន្ធមិត្តនឹងគ្នា បែរទៅជាមើលមុខគ្នាលែងចំ
ប្រធានាធិបតីរុស្ស៊ី លោក Medvedev ថ្ងៃនេះ បានធ្វើសេចក្តីថ្លែងការណ៍ទិតៀនយ៉ាងខ្លាំង លោកប្រធានាធិបតីបេឡូរុស្ស៊ី Loukachenko ដែលក្នុងយុទ្ធនាការឃោសនា សំរាប់ការបោះឆ្នោតប្រធានាធិបតី នៅបេឡូរុស្ស៊ី ថ្ងៃ១៩ធ្នូឆ្នាំនេះ ស្រាប់តែប្រើគ្មានឈប់ឈ្មោះប្រទេសរុស្ស៊ី រហូតដល់ដាក់បណ្តាសាថ្នាក់ដឹកនាំរុស្ស៊ី ធ្វើជាកម្មវត្ថុនៃការបរិហារអាក្រាតយកពិន្ទុ ដោយចោទរុស្ស៊ីថា ជាខ្មាំងដែលនាំឲ្យខូចដល់ផលប្រយោជន៍សេដ្ឋកិច្ចបេឡូរុស្ស៊ីតែ ម្តង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ប្រមុខរដ្ឋរុស្ស៊ី លោក Medvedev ធ្វើសេចក្តីថ្លែងការណ៍ថ្ងៃនេះ គឺជាចម្លើយតបនឹងពាក្យមិនគប្បីបន្លឺឡើង ចេញពីបបូរមាត់លោកប្រធានាធិបតីបេឡូរុស្ស៊ី Loukachenko ដែលហៅថ្នាក់ដឹកនាំរុស្ស៊ី ថាជា “អ្នកនយោបាយមួយក្តាប់” ដែលប៉ុនប៉ងបង្ខូចឈ្មោះគាត់ និងដែលកំពុងប្រែខ្លួន ទៅជា “Sponsor” របស់បក្សប្រឆាំងនៅបេឡូរុស្ស៊ី។
លោក Medvedev ចាត់ទុកអាកប្បកិរិយារបស់សមភាគីបេឡូរុស្ស៊ី លោក Loukachenko ដែលធ្វើយុទ្ធនាការឃោសនាបោះឆ្នោត ក្រោមពាក្យស្លោកប្រឆាំងរុស្ស៊ីតាំងពីដើមដល់ចុងថា ជាអាកប្បកិរិយាអប្បយស ពីព្រោះក្នុងឋានៈជាប្រទេសដៃគូ គេមិនដែលប្រព្រឹត្តអំពើយ៉ាងនុ៎ងឡើយ។ លោក Medvedev សង្កត់ធ្ងន់ថា ទីក្រុងម៉ូស្គូ ក្នុងនយោបាយក្រៅប្រទេសខ្លួននឹងគន់គិតអំពីអាកប្បកិរិយារបស់មេដឹកនាំបេឡូរុស្ស៊ីនោះ។
ប្រធានាធិបតីរុស្ស៊ីទូន្មានលោក Loukachenko ដែលកាន់អំណាចតាំងពីឆ្នាំ ១៩៩៤ មក ហើយដែលឥឡូវបញ្ឈរឈ្មោះជាថ្មី ដើម្បីអោបក្រសោបតំណែងកំពូលនោះ នៅជាប់នឹងខ្លួនដដែលឲ្យជាប់ដៃរវល់នឹងបញ្ហាផ្ទៃក្នុងប្រទេសខ្លួនទៅបូកទាំង នៅទីបំផុត ធ្វើការស៊ើបអង្កេតទៅផងទៅអំពីសំណុំរឿងជនបាត់ខ្លួនច្រើនឥតគណនា មានពួកអ្នកកាសែត និង អ្នកនយោបាយជាដើម ដែលជាក្តីកង្វល់របស់រុស្ស៊ី និងប្រទេសផ្សេងៗទៀត។
លោក Medvedev កត់សំគាល់ថា បើកាលមុន រូបលោក Loukachenko ដែលត្រូវបស្ចិមលោកប្រសិទ្ធិនាមថាជា អ្នកកាន់អំណាចផ្តាច់ការចុងក្រោយនៅទ្វីបអឺរ៉ុប រមែងចាត់ទុកសហភាពអឺរ៉ុប និងសហរដ្ឋអាមេរិក ជាខ្មាំងរបស់ខ្លួន នោះឥឡូវស្ថានភាពជាខ្មាំងបែបនេះ គឺត្រូវគាត់បំពាក់មកលើប្រទេសរុស្ស៊ីទៅវិញ។
ប្រមុខរដ្ឋរុស្ស៊ីក៏ទិតៀនលោក Loukachenko ថាជាមនុស្សមិនកាន់សំដី ពីព្រោះរហូតមកទល់ឥឡូវ កន្លងផុតជាង១ឆ្នាំកន្លះហើយ តាំងពីគាត់បានសន្យាក្តែងៗ នៅពីមុខប្រធានាធិបតីនៃ៥ប្រទេសអតីតសហភាពសូវៀត ក្នុងសម័យប្រជុំកំពូលនៃ “អង្គការសន្ធិសញ្ញាស្តីអំពីសន្តិសុខរួម” ថាគាត់នឹងទទួលស្គាល់ដែនដីអបគម២នៃរដ្ឋGeorgie គឺ Abkhazie និងOssetieខាងត្បូង ជារដ្ឋឯករាជ្យ ប៉ុន្តែពាក្យសន្យានោះរបស់ប្រធានាធិបតីបេឡូរុស្ស៊ីបន្តស្ថិតនៅជាសំដីប្រហោងក្នុងដដែល។ តាមប្រសាសន៍លោក Medvedev រុស្ស៊ីថែមទាំងមានឯកសារVideo ជាតឹកតាងបញ្ជាក់ពីសំដីសន្យានោះទៅផង។
ទាក់ទងនឹងការតថ្លៃពីខាងលោក Loukachenko ក្នុងឋានៈជាល័ក្ខខ័ណ្ឌសំរាប់ទទួលស្គាល់នោះ លោក Medvedev ថ្លែងថារុស្ស៊ីផ្ទាល់ មិនដែលបង្ខំនរណាឲ្យទទួលស្គាល់ឯករាជ្យដែនដីទាំង២នោះឡើយ ដ្បិតបញ្ហានេះជាសិទ្ធិអធិបតេយ្យរបស់រដ្ឋនីមួយៗទេតើ។ ប៉ុន្តែប្រមុខរដ្ឋរុស្ស៊ីរំលឹកថា គ្រាន់តែក្នុងឆ្នាំ២០១០នេះ តាមរយៈការទិញប្រេងកាតឆៅដ៏ធូរថ្លៃពីខាងរុស្ស៊ី ភាគីបេឡូរុស្ស៊ីចេះសំចៃបានធនធាន ២.០០០លានដុល្លារអាមេរិកទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ