លីទុយអានីគ្រោងទារសំណងពីរុស្ស៊ីជារដ្ឋបន្តកេរ្តិ៍ពីសហភាពសូវៀត
ថ្ងៃពុធ២៣ឧសភានេះរដ្ឋាភិបាលលីទុយអានីលើកបញ្ហាដែលមានទៅពិភាក្សា។ សាច់រឿងគឺ អំពីទឹកប្រាក់ប្រមាណ ៣១.០០០លានដុល្លារអាមេរិកដែលតាមការបូកគុណឃើញនៃ”គណៈកម្មការរដ្ឋាភិបាល”លីទុយអានីជាទំហំនៃការខូចខាតរបស់ប្រទេសនេះបណ្តាលមកពី ការកាន់កាប់អស់កន្លះសតវត្សដោយអំណាចសូវៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
តាំងពីម្សិលមិញម៉្លេះ ដោយថ្លែងតាមវិទ្យុជាតិ លោកនាយករដ្ឋមន្ត្រីលីទុយអានី Andrius Kubilius សំដែងសេចក្តីសង្ឃឹមថា ម៉ូស្គូ នឹង ចេះ ទទួលខុសត្រូវ ចំពោះការខូចខាត នៅលីទុយអានី បណ្តាលមកពីការកាន់កាប់ប្រទេសនេះ ដោយសហភាពសូវៀត ពីឆ្នាំ១៩៤០ ដល់ឆ្នាំ១៩៩០។ តាមប្រសាសន៍គាត់ ៖
-“តាំងពីពេលនោះមក កន្លងផុត ជាង២០ឆ្នាំហើយ រួចក្នុងប្រទេសរុស្ស៊ីផ្ទាល់ ក៏មានការប្រែប្រួល យ៉ាងច្រើនបានកើតឡើង ហេតុដែលញ៉ាំង លីទុយអានី ឲ្យរំពឹងថា ឥឡូវប្រទេសរុស្ស៊ីសម័យថ្មី ខិត ដល់ចំណុចមួយ ចេះបែរមុខទៅពិចារណា លើប្រវត្តិសាស្ត្រខ្លួនទាំងមូល ហើយទាញយក សេចក្តីសន្និដ្ឋាន អំពីផលប៉ះពាល់ដ៏សែនធ្ងន់ធ្ងរ ដែលរបបផ្តាច់ការសូវៀត បានពាំនាំដល់ ប្រទេស បែបយ៉ាង លីទុយអានី។
-ការហ៊ាននិយាយ ដោយឥតលាក់បាំង អំពីប្រវត្តិខ្លួន ការហ៊ានបើកភ្នែកសម្លឹងត្រង់ៗ ទៅលើ ប្រវត្តិនេះ ជាទ្រនិច ចង្អុលឲ្យឃើញពី វឌ្ឍនភាពនៃលទ្ធិប្រជាធិបតេយ្យ ក្នុងប្រទេសនោះឯង។
តាមលោក Andrius Kubilius បញ្ហាទារសំណងពីក្រុងម៉ូស្គូ ចំពោះការខូចខាតនេះ គឺតែងស្ថិត នៅជានិច្ច ក្នុងរបៀបវារៈរបស់រដ្ឋាភិបាលលីទុយអានី នាកិច្ចចរចាជាមួយពួកអ្នកតំណាងរុស្ស៊ី។តួលេខនៃការខូចខាតនេះ តាមការបូកគុណឃើញនៃ ”គណៈកម្មការរដ្ឋាភិបាល”លីទុយអានី គឺ ប្រមាណ ៣១.០០០លានដុល្លារអាមេរិក។
លីទុយអានី បានប្រកាសឯករាជ្យពីសហភាពសូវៀត ក្នុងឆ្នាំ ១៩៩០ ហើយចាប់ពីឆ្នាំ២០០៤មកក្លាយជាសមាជិក សហភាពអឺរ៉ុបផង បក្សសម្ព័ន្ធ អូតង់ផង។
ថ្លែងក្នុងជំនួបកំពូលអូតង់នៅក្រុង Chicago ថ្ងៃ២០ ២១ ឧសភាកន្លងទៅប្រធានាធិបតីលីទុយអានី លោកស្រី Dalia Gribauskaiteជឿជាក់ថា ក្រោយពីលោកពូទីនឡើងកាន់អំណាចកំពូលនៅរុស្ស៊ីវិញ ទំនាក់ទំនងរវាង លីទុយអានី និង រុស្ស៊ី នឹងកាន់តែតានតឹង ជាបឋម មក ពី បញ្ហាជនជាតិភាគតិចរុស្ស៊ីដែលនៅសេសសល់លើទឹកដីលីទុយអានី។ ពីព្រោះអំណាច លោក ពូទីន ច្បាស់ជានឹងភ្ជង់ស្មារតីទៅលើចំណុចដែលថា លីទុយអានី ជាពួកជាតិនិយម ជាពួកមិន ចេះចុះញ៉ម ពួកដែលស្អប់ជាតិរុស្ស៊ី។ល។
ថ្ងៃ២២ឧសភាម្សិលមិញ រដ្ឋសភាលីទុយអានីបានអនុម័តសេចក្តីសម្រេចប្រកាសឆ្នាំ២០១៣ ថាជាឆ្នាំខួបផ្លូវការទី១៥០នៃកុប្បកម្មប្រជាជនទល់នឹងចក្រភពរុស្ស៊ី។ ជាការរំលឹកក្នុងសតវត្ស ទី១៨-១៩ លីទុយអានី ដោយរួមជាមួយប៉ូឡូញនិងបេឡារុសបានស្ថិតក្នុង អាណាចក្រដែល មានឈ្មោះថា “ អាណាចក្រប៉ូឡូញ”។ ហើយក្នុងឆ្នាំ១៨៦៣ ក្នុងអាណាចក្រនេះ មានផ្ទុះឡើង ជា “កុប្បកម្មរំដោះជាតិ” ចេញពីនឹមកាន់កាប់ របស់ស្តេច Tsar រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ