ម៉ូស្គូថ្កោលទោសអ៊ីរ៉ង់ ចំពោះការចម្រើនធាតុ Uranium
ការថ្កោលទោសនេះ មានចែងក្នុងសេចក្តីថ្លែងការណ៍យប់មិញរបស់ក្រសួងការបរទេសរុស្ស៊ី ដែលសំដែងនូវក្តីព្រួយបារម្ភ រួមជាមួយសហគមន៍អន្តរជាតិ ចំពោះដំណឹង ស្តីអំពីការចាប់ដំណើរការមែននៃសហគ្រាសអ៊ីរ៉ង់ខាងចម្រើនធាតុអ៊ុយរ៉ានីញ៉ូម។ ប៉ុន្តែ ខុសពីបស្ចិមលោក រុស្ស៊ីនៅតែឥតបង្ហើបឲ្យឃើញឡើយ ពីគម្រោងដាក់ទណ្ឌកម្មស្អីណា លើអៀរ៉ង់។
ចុះផ្សាយនៅថ្ងៃ៖
ស្តាប់ - ០២:២៧
ជាបឋម គួរនិយាយថា ទីក្រុងម៉ូស្គូបញ្ចេញប្រតិកម្មអវិជ្ជមាននេះ គឺបន្ទាប់ពីទីក្រុងវ៉ាស៊ីនតោន បានថ្លែងថ្កោលទោសអ៊ីរ៉ង់ភ្លាមភ្លែត ដោយចាត់ទុកសកម្មភាពអ៊ីរ៉ង់ ខាងចាប់ផ្តើមចម្រើនធាតុ អ៊ុយរ៉ានីញ៉ូម ថាជាការរំលោភត្រង់ៗលើសេចក្តីសម្រេចរបស់ក្រុមប្រឹក្សាសន្តិសុខ អ.ស.ប.។
សេចក្តីថ្លែងការណ៍ របស់ក្រសួងការបរទេសរុស្ស៊ី លើកឡើងថា៖
- ទីក្រុងម៉ូស្គូ បានដឹងឮ ដោយសោកស្តាយ និងដោយក្តីព្រួយបារម្ភ ដំណឹងស្តីអំពីការចាប់ផ្តើម មែនដោយអ៊ីរ៉ង់ នូវការចម្រើនធាតុ អ៊ុយរ៉ានីញ៉ូម ក្នុងមជ្ឈមណ្ឌលនុយក្លេអ៊ែរ ដែលស្ថិតនៅ ក្រោមដីជិតទីក្រុង Qom ប៉ែកខាងជើង ប្រទេសអ៊ីរ៉ង់។
- ម៉ូស្គូ បង្ខំចិត្តសង្កេតឃើញថា ទីក្រុងតេអេរ៉ង់ ចេះតែបន្តធ្វើថ្លង់ធ្វើខ្វាក់ ចំពោះការទាមទាររបស់សហគមន៍អន្តរជាតិ ឲ្យអ៊ីរ៉ង់រំសាយទៅនូវក្តីថប់កង្វល់របស់គេ ជុំវិញកម្មវិធីនុយក្លេអ៊ែរ អ៊ីរ៉ង់ ដែលក្នុងចំណោមការទាមទារនោះ គឺឲ្យអ៊ីរ៉ង់ផ្អាកឈប់ទៅនូវការសាងសង់សហគ្រាស ខាងចម្រើនធាតុ អ៊ុយរ៉ានីញ៉ូម នោះ ដូចដែលតម្រូវ ទី១-ដោយសេចក្តីសម្រេច របស់”ទីភ្នាក់ងារអន្តរជាតិខាងថាមពលបរមាណូ” AIEA និង ទី២-ដោយសេចក្តីសម្រេច របស់ក្រុមប្រឹក្សាសន្តិសុខអ.ស.ប. លេខ ១៩២៩។
ប៉ុន្តែ ព្រមជាមួយនេះ ក្រសួងការបរទេសរុស្ស៊ី ក៏កត់សម្គាល់ជារឿងសំខាន់ ដែលអ៊ីរ៉ង់ បាន ជូនជាដំណឹងទៅទីភ្នាក់ងារ AIEA ថាខ្លួនចាប់ផ្តើមមែន ការងារខាងចម្រើនធាតុ អ៊ុយរ៉ានីញ៉ូម នៅ ក្នុងសហគ្រាសនេះ សហគ្រាសដែលស្ថិតនៅក្រោមការត្រួតពិនិត្យរបស់ AIEA តែម្តង។
ក្រសួងការបរទេសរុស្ស៊ី សង្ឃឹមថា មជ្ឈដ្ឋានកាន់អំណាចនៅក្រុងតេអេរ៉ង់ មុខជានឹងយក ត្រចៀកផ្ទៀងស្តាប់មតិម៉ូស្គូ ស្តីអំពីភាពចាំបាច់ត្រូវតែបន្តកិច្ចសហប្រតិបត្តិការ យ៉ាងជិតស្និទ្ធ តទៅទៀតជាមួយទីភ្នាក់ងារ AIEA ហើយចាប់ផ្តើមឡើងវិញឲ្យបានយ៉ាងឆាប់បំផុត កិច្ចចរចាដ៏មធ្យ័ត ដោយគ្មានលក្ខខណ្ឌអ្វីណាជាមុនឡើយ ជាមួយ ៦អន្តការីអន្តរជាតិ ពោលគឺ ៥ប្រទេសសមាជិកអចិន្ត្រៃយរបស់ក្រុមប្រឹក្សាសន្តិសុខអ.ស.ប. មាន រុស្ស៊ី ស.រ.អា. ចិន បារាំង អង់គ្លេស និង ប្រទេសដែលនាំមុខសហភាពអឺរ៉ុប គឺអាល្លឺម៉ង់។
ទីក្រុងម៉ូស្គូ គូសបញ្ជាក់ថា បញ្ហាទាក់ទងនឹងកម្មវិធីនុយក្លេអ៊ែររបស់អ៊ីរ៉ង់ ត្រូវតែដោះស្រាយ ដោយសន្តិវិធី តាមផ្លូវធ្វើសំវាទ ក្នុងស្មារតីគោរពគ្នាទៅវិញទៅមក និង មួយដំណាក់ម្តងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ