អ៊ីរ៉ង់ស្វែងរកការគំាទ្រពីប្រទេសជាមិត្តនៅទ្វីបអាមេរិកឡាទីន
ចាប់ពីថ្ងៃអាទិត្យ ទី៨ មករានេះ និងមានរយៈពេល ៥ថ្ងៃ លោកប្រធានាធិបតីនៃប្រទេសអ៊ីរ៉ង់ Mahmoud Ahmadinejad បានផ្តើមបំពេញទស្សនកិច្ចមួយជុំទ្វីបអាមេរិកឡាទីន ក្នុងនោះមានប្រទេសវ៉េណេស៊ុយអេឡា នីការ៉ាហ្គា គុយបា និងប្រទេសអេក្វាទ័រដែលសុទ្ធសឹងជាប្រទេសប្រឆំាងនឹងសហដ្ឋអាមេរិក។ គោលដៅនៃទស្សនកិច្ចគឺដើម្បីពង្រឹងទំនាក់ទំនងជាមួយប្រទេសទំាង ៤នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៩
ប្រទេសវ៉េណេស៊ុយអេឡា គឺជាប្រទេសទីមួយដែលលោកប្រធានាធិបតីអ៊ីរ៉ង់ Mahmoud Ahmadinejad ត្រូវបំពេញទស្សនកិច្ចមុនគេក្នុងថ្ងៃនេះ។ នៅមុនពេលឡើងយន្តហោះចាកចេញពីទីក្រុងតេហេរ៉ង់ លោក Ahmadinejad បានថ្លែងប្រាប់ពីទំនាក់ទំនងល្អ និងកំពុងវិវឌ្ឍទៅមុខរវាងអ៊ីរ៉ង់ និងប្រទេសក្នុងទ្វីបអាមេរិកឡាទីន។ លោកប្រមុខរដ្ឋអ៊ីរ៉ង់បានប្រាប់ឲ្យដឹង អំពីវប្បធម៌ និងការចង់បានរបស់ប្រជាជននៅក្នុងតំបន់ដែលប្រឆំាងនឹងនយោបាយរបស់សហដ្ឋអាមេរិក។ អាមេរិកដែលបើតាមលោក Ahmadinejad តែងតែតំាងខ្លួនជាអាណាព្យាបាលនៅក្នុងតំបន់ និងតែងតែបានលូកដៃចូលជ្រៀតជ្រែកកិច្ចការផ្ទៃក្នុងរបស់ប្រទេសដទៃ។
ដូច្នេះ គោលដៅសំខាន់របស់លោកប្រមុខរដ្ឋអ៊ីរ៉ង់ គឺបន្តបញ្ចុះបញ្ចូល កៀរគរបណ្តាប្រទេសទំាងនេះឲ្យបន្តប្រឆំាងនឹងសហរដ្ឋអាមេរិក ដែលពួកគេហៅថាជាពួកចក្រពត្តិ។ គួរជម្រាបជូនថា ក្នុងរយៈពេលប៉ុន្មានឆ្នំាចុងក្រោយនេះ ប្រទេសទំាង ៤ និងអ៊ីរ៉ង់បានផ្តើមពង្រឹងទំនាក់ទំនងគ្នាយ៉ាងខ្លំាង ទំាងនៅលើវិស័យការទូត និងវិស័យសេដ្ឋកិច្ច។ សម្រាប់ប្រទេសវ៉េណេស៊ុយអេឡា លោកប្រធានាធិបតី Hugo Chavez បានទៅទស្សនកិច្ចនៅអ៊ីរ៉ង់រហូតដល់ទៅ ៩ដង ក្នុងរយៈពេល ១៣ឆ្នំាចុងក្រោយនេះ។
ម្យ៉ាងទៀត ដំណើរទស្សនកិច្ចរបស់លោកប្រធានាធិបតីអ៊ីរ៉ង់ទៅកាន់បណ្តាប្រទេសទំាងនេះ គឺដើម្បីចង់បង្ហាញពីសកម្មភាពការទូតដ៏មមាញឹករបស់អ៊ីរ៉ង់នៅក្នុងតំបន់ផង និងក៏ជាសារមួយប្រាប់ពិភពលោកថា អ៊ីរ៉ង់មិនមែនស្ថិតនៅឯកោទេ។ ទន្ទឹមគ្នានេះ វាក៏ជាសក្ខីកម្មមួយដែលអ៊ីរ៉ង់ចង់បញ្ចេញប្រតិកម្មតបនឹងសហរដ្ឋអាមេរិក ដែលបានអំពាវនាវឲ្យបណ្តាប្រទេសអាមេរិកឡាទីនបញ្ឈប់ពង្រឹងទំនាក់ទំនងជាមួយទីក្រុងតេហេរ៉ង់។
ក្រៅពីស្វែងរកការគំាទ្រពីប្រទេសជាមិត្ត លោក Ahmadinejad ក៏បានប្រកាសឲ្យដឹង ពីការបើកសម្ពោធគម្រោងជាច្រើន និងចុះហត្ថលេខាលើកិច្ចសន្យារកស៊ីថ្មីៗទៀតជាមួយប្រទេសទំាងនោះ។
យ៉ាងណាក៏ដោយ ក៏មានប្រទេសអាមេរិកឡាទីនខ្លះ ដូចយ៉ាងប្រេស៊ីល ឬមួយក៏អាហ្សង់ទីន មិនបានឈរនៅខាងអ៊ីរ៉ង់ដូចមុនទៀតឡើយ ហើយសូម្បីតែប្រទេសគុយបា និងនីការ៉ាហ្គាដែលពីមុនធ្លាប់បានការពារអ៊ីរ៉ង់ពេញមុខ ពេញមាត់នោះ ក៏មិនច្បាស់ជាបន្តគំាទ្រ ១០០% ដែរ ពីព្រោះពួកគេលែងចង់ធ្វើសង្រ្គាមជាចំហទល់នឹងសហរដ្ឋអាមេរិកដូចមុនទៀតឡើយ។
ដូច្នេះឃើញថា នៅលើឆាកអន្តរជាតិ អ៊ីរ៉ង់កំពុងជាប់ទណ្ឌកម្មសេដ្ឋកិច្ចដោយសារតែសំណុំរឿងនុយក្លេអ៊ែរដ៏ចម្រូងចម្រាសរបស់ខ្លួន។ ចំណែកនៅផ្ទៃក្នុងប្រទេសឯណោះវិញ លោកប្រមុខរដ្ឋអ៊ីរ៉ង់ក៏កំពុងទទួលរងការវាយប្រហារពីសំណាក់ក្រុមអ្នកប្រឆំាងជារៀងរាល់ថ្ងៃ។ អ្វីដែលលោក Ahmadinejad កំពុងបារម្ភខ្លំាងគេ គឺបដិវត្តន៍របស់ប្រជាជនអ៊ីរ៉ង់ ដោយយកតាមគំរូប្រទេសអារ៉ាប់មួយចំនួននាពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ