ប្រជុំកោះសេនកាគូ៖ រដ្ឋាភិបាលជប៉ុនកោះហៅឯកអគ្គរដ្ឋទូតចិន
រដ្ឋាភិបាលជប៉ុន នៅថ្ងៃអង្គារ៨មករានេះ បានកោះហៅឯកអគ្គរដ្ឋទូតចិន ជាលើកទីមួយ ចាប់តាំងពីការចូលកាន់តំណែងរបស់លោកនាយករដ្ឋមន្ត្រីជប៉ុនShinzo Abeដើម្បីប្រឆាំងទល់នឹងវត្តមានជាញឹកញាប់នៃនាវាចិនដែលបើកចូលក្នុងដែនទឹកម្តុំប្រជុំកោះសេនកាគូ។
ចុះផ្សាយនៅថ្ងៃ៖
ស្តាប់ - ០២:៣៦
អនុរដ្ឋមន្ត្រីក្រសួងការបរទេស ជប៉ុន លោក Akitaka Saiki បានជួបសន្ទនាជាមួយលោក Cheng Yonghua នៅព្រឹកថ្ងៃអង្គារនេះ ដើម្បីសម្តែងការប្រឆាំងរបស់ជប៉ុនទល់នឹងវត្តមាននៃនាវាល្បាតចិន៤គ្រឿង ដែលបើកចូលកៀកម្តុំជុំវិញ ប្រជុំកោះសេនកាគូនេះដែលគ្រប់គ្រងដោយប្រទេសជប៉ុន។ ប្រជុំកោះ ដែល ប្រទេសចិនទាមទារជានិច្ចជាកាល ថាជាតំបន់កម្មសិទ្ធិរបស់ខ្លួនក្រោមឈ្មោះថា ទាវយូ ជាភាសាចិន។
នៅថ្ងៃចន្ទម្សិលមិញដែរ ក្រសួងការបរទេសជប៉ុន បានធ្វើការប្រឆាំងម្តងមករួចមកហើយតាមការហៅទូរស័ព្ទទៅស្ថានទូតចិនប្រចាំទីក្រុងតូគ្យូ។ បន្ទាប់មក ក្រសួងការបរទេសជប៉ុន បានកោះហៅ ឯកអគ្គរដ្ឋទូតចិន ដែលជាលើកទីមួយដែរ ចាប់តាំងពីលោកShinzo Abe ឡើងកាន់តំណែងជានាយករដ្ឋមន្ត្រីជប៉ុនចាប់តាំងពីថ្ងៃទី២៦ធ្នូ ដើម្បីបញ្ជាក់ពីចេតនាយ៉ាងមឺងម័តរបស់ជប៉ុននៅក្នុងការដោះស្រាយជម្លោះដែនទឹកនេះ។
ឯកអគ្ករដ្ឋទូតចិន បានឆ្លើយតបដោយនិយាយជាច្រើនដងថា ប្រជុំកោះសេនកាគូជាដែនអធិបតេយ្យរបស់ចិន។ ទន្ទឹមនេះដែរ ឯកអគ្គរដ្ឋទូតចិន បានគូសបញ្ជាក់ទៀតថា គាត់នឹងធ្វើសេចក្តីរាយការណ៍ អំពីការប្រឆាំងរបស់ជប៉ុនដល់ទីក្រុងប៉េកាំង អំពីបញ្ហានាវាចិនដែលបានបើកចូលក្នុងដែនទឹកជប៉ុនយ៉ាងយូរកាលពីថ្ងៃចន្ទម្សិលមិញនិងការទាមទាររបស់ជប៉ុនដើម្បីកុំឲ្យហេតុការនេះកើតមានឡើងជាថ្មីទៀត។
គួររំលឹកថាជំនាន់រដ្ឋាភិបាលឆ្វេងនិយមដឹកនាំលោក Yoshihiko Noda ធ្លាប់បានស្តីបន្ទោស ឯកអគ្គរដ្ឋទូតចិនកាលពីថ្ងៃទី១៣ធ្នូកន្លងមក ក្រោយពីមានយន្តហោះចិនមួយគ្រឿងបានបើកឈ្លានពានចូលដែនអាកាសជប៉ុនជិតតំបន់ប្រជុំកោះសេនកាគូដែលជប៉ុនកត់ត្រាទុកថាជាសកម្មភាពថ្មីទែងមួយនៅក្នុងប្រវត្តិសាស្ត្រនៃប្រទេសជប៉ុន។
មូលហេតុនាវារដ្ឋាភិបាលចិន បានបើកចូលជាញឹកញាប់ល្បាតនៅក្នុងដែនទឹកម្តុំប្រជុំកោះសេនកាគូ គឺក្រោយពី រដ្ឋាភិបាលជប៉ុនបានប្រមូលទិញកូនកោះ៣ក្នុងចំណោមកូនកោះទាំង៥នៃប្រជុំកោះនេះ ពីម្ចាស់កម្មសិទ្ធិឯកជន មកដាក់ជាសម្បត្តិរបស់រដ្ឋជប៉ុន។ មិនតែប៉ុណ្ណោះ បាតុកម្មជាច្រើនប្រឆាំងនឹងប្រទេសជប៉ុនដែលជួនកាលប្រកបដោយអំពើហិង្សា បានផ្ទុះឡើងនៅតាមក្រុងជាច្រើនក្នុងប្រទេសចិន អស់រយៈមួយសប្តាហ៍ទម្រាំតែរដ្ឋាភិបាលប៉េកាំង ចាត់វិធានការដើម្បីបញ្ឈប់សកម្មភាពបាតុកម្មប្រឆាំងជប៉ុននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ