មន្ត្រីយោធាអាមេរិកមួយរូបទៀត បំពេញទស្សនកិច្ចនៅកម្ពុជា
មន្ត្រីយោធាអាមេរិកលោកឧត្តមសេនីយត្រី Richard Simcock នឹងបំពេញទស្សនកិច្ច ៣ថ្ងៃនៅកម្ពុជានាសប្តាហ៍ក្រោយនេះ ដើម្បីរឹតចំណងទ្វេភាគីបន្ថែមទៀតនៅលើវិស័យយោធា។ លោក Richard Simcock នាយកទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍នៃការិយាល័យរដ្ឋមន្ត្រីការពារជាតិអាមេរិក នឹងគ្រោងជួបជាមួយមន្ត្រីយោធាកម្ពុជាផង និងចូលរួមក្នុងសិក្ខាសាលារបស់ក្រសួងការពារជាតិកម្ពុជាផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
មានការងារជាច្រើនដែលមន្ត្រីយោធាអាមេរិកលោកឧត្តមសេនីយ Richard Simcock គ្រោងលើកយកមកពិភាក្សានៅក្នុងជំនួបជាមួយមន្ត្រីយោធាកម្ពុជា។
នៅក្នុងដំណើរទស្សនកិច្ច៣ថ្ងៃចាប់ពីថ្ងៃទី២៩ដល់ថ្ងៃទី៣១សីហា លោកSimcock នាយកទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍ប្រចាំការិយាល័យរដ្ឋមន្ត្រីការពារជាតិអាមេរិកនឹងនិយាយអំពីឱកាសសហប្រតិបត្តិការនាពេលអនាគតជាមួយកម្ពុជាក្នុងវិស័យថែរក្សាសន្តិភាព សន្តិសុខដែនសមុទ្រ ជំនួយមនុស្សធម៌ កំណែទម្រង់ក្នុងវិស័យការពារប្រទេស និងការប្រឆាំងភេរវកម្ម។
យោងតាសេចក្តីថ្លែងការណ៍របស់ស្ថានទូតអាមេរិកប្រចាំកម្ពុជា លោកឧត្តមសេនីយSimcock បានថ្លែងថា ក្រសួងការពារជាតិអាមេរិកសង្ឃឹមថា នឹងជួយកសាងសមត្ថភាពជំនាញរបស់យោធាខ្មែរដោយលើកទឹកចិត្តអោយយោធាខ្មែរបន្តដើរលើគន្លងផ្លូវនៃតម្លាភាព ការគោរពសិទ្ធិមនុស្ស និងអភិបាលកិច្ចបានល្អប្រសើរឡើង។ លោកបន្តថា អាមេរិកនឹងបន្តធ្វើការជាមួយកងយោធពលខេមរភូមិន្ទ ដើម្បីអភិវឌ្ឍកងទ័ពមួយប្រកបដោយវិជ្ជាជីវៈ និងរួមចំណែកដល់ស្ថេរភាព និងសន្តិភាពអន្តរជាតិ និងតំបន់។
គួរបញ្ជាក់ថានៅពេលមានវត្តមាននៅប្រទេសកម្ពុជានៅសប្តាហ៍ក្រោយនេះ លោកឧត្តមសេនីយទទួលបន្ទុកអាស៊ីខាងត្បូង និងអាស៊ីអាគ្នេយ៍របស់ការិយាល័យរដ្ឋមន្ត្រីការពារជាតិអាមេរិក ក៏នឹងចូលរួមក្នុងសិក្ខាសាលាមួយរបស់ក្រសួងការពារជាតិនៅក្រុងព្រះសីហនុ ដើម្បីពិភាក្សាអំពីការរៀបចំយុទ្ធសាស្ត្រសន្តិសុខដែនសមុទ្រកម្ពុជាផងដែរ។
លើសពី នេះលោកនឹងទស្សនកិច្ចទីតាំងនានាដែលបានទទួលកិច្ចសហប្រតិបត្តិការក្នុងវិស័យការពារជាតិអាមេរិកនិងកម្ពុជា ដូចជាកំលាំងពិសេសជាតិប្រឆាំងភេរវកម្មមជ្ឈមណ្ឌលហ្វឹកហ្វឺន ការថែរក្សាសន្តិភាព និងមជ្ឈមណ្ឌលប្រតិបត្តិការសន្តិសុខដែនសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ