ក្រសួងការពារជាតិកម្ពុជាបង្កើនការហ្វឹកហាត់និងធ្វើទំនើបកម្មយោធា
ប្រឈមនឹងការឈ្លានពានទឹកដីពីសំណាក់ប្រទេសថៃ ក្រសួងការពារជាតិកម្ពុជាបានបង្ហាញមហិច្ឆតាធ្វើទំនើបកម្មខាងវិស័យយោធាឲ្យបានខ្លាំងជាងនេះ ដើម្បីទប់ទល់ការគំរាមកំហែង។ ការអះអាងបែបនេះត្រូវបានធ្វើឡើងជាសាធារណៈដោយលោកទៀ បាញ់ រដ្ឋមន្ត្រីក្រសួងការពារជាតិកម្ពុជា នៅចំពោះមុខនាយទាហាន និងពលទាហាន នៅក្នុងពិធីលំហាត់បាញ់គ្រាប់ពិតកាំភ្លើងត្បាល់គាំទ្រ ដែលត្រូវបានរៀបចំឡើងកាលពីថ្ងៃទី១៦មិថុនា។ ប្រមុខយោធាកម្ពុជាក៏បានបញ្ជាក់ថា កម្ពុជាសុំរក្សាសិទ្ធិពិចារណាក្នុងការចូលជាសមាជិកអនុសញ្ញាហាមប្រាមការប្រើប្រាស់គ្រាប់បែកចង្កោមផងដែរ ខណៈដែលប្រទេសជិតខាងមិនទាន់បានចូលជាសមាជិកអនុសញ្ញានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
សង្គ្រាមឈ្លានពានទឹកដីពីសំណាក់ប្រទេសថៃរយៈពេលចុងក្រោយនេះបានបង្ហាញច្បាស់ពីសារៈសំខាន់នៃការពង្រឹងវិស័យយោធាកម្ពុជា។ លោក ទៀ បាញ់ រដ្ឋមន្ត្រីក្រសួងការពារជាតិមិនបានលាក់លៀមពីមហិច្ឆតាចង់ធ្វើទំនើបកម្មយោធា តាមរយៈការបំពាក់គ្រឿងសព្វាវុធទំនើបៗថែមទៀតនោះឡើយ។ លោកអះអាងថា កម្ពុជាត្រូវការបំពាក់សព្វាវុធទំនើបជាងនេះនៅចំពោះមុខស្ថានការណ៍បច្ចុប្បន្ន ដែលត្រូវគំរាមកំហែងដោយការឈ្លានពានពីប្រទេសជិតខាង។
សេចក្តីថ្លែងការណ៍របស់ប្រមុខយោធាកម្ពុជាបានធ្វើឡើង កាលពីថ្ងៃទី១៦មិថុនា ខណៈពេលដែលក្រសួងការពារជាតិបានរៀបចំហ្វឹកហាត់បាញ់គ្រាប់ពិតកាំភ្លើងត្បាល់ធុន៨២ និង ១០០ មីល្លីម៉ែត្រ នៅក្នុងបន្ទាយខេត្តកំពង់ស្ពឺ។ លំហាត់បាញ់គ្រាប់កាំភ្លើងត្បាល់គាំទ្រទ័ពថ្មើរជើងនេះបានទទួលលទ្ធផលល្អប្រសើរ ដោយបាញ់ចំគោលដៅយ៉ាងល្អ។
គួរកត់សម្គាល់ថា ទោះបីជាកម្ពុជាចាញ់ប្រៀបថៃយ៉ាងខ្លាំងខាងផ្នែកសព្វាវុធ និងចំនួនកងទ័ពប៉ុន្តែ តាមរយៈការផ្ទុះសង្គ្រាមជាយដែនជាមួយថៃរយៈពេលចុងក្រោយនេះ កងទ័ពកម្ពុជាមិនត្រឹមតែការពារបានយ៉ាងរឹងមាំទីតាំងឈរជើងរបស់ខ្លួនប៉ុណ្ណោះទេ ប៉ុន្តែ ក៏បានបង្ហាញប្រៀបខ្លាំងខាងផ្នែកយុទ្ធសាស្ត្រយោធាលើភាគីថៃដែរ។ ការប្រើប្រាស់កាំភ្លើងគាំទ្រតិចតួចតែចំគោលដៅជាចំណុចខ្លាំងមួយធ្វើឲ្យបច្ចាមិត្តកោតខ្លាច។
ទោះជាយ៉ាងនេះក្តី ការហ្វឹកហាត់បន្ថែម និងការបំពាក់សព្វាវុធធុនទំនើបត្រូវបានក្រសួងការពារជាតិចាត់ទុកជាអាទិភាពចំពោះមុខ។ ក្នុងគោលដៅរក្សាសិទ្ធិតទល់ជាមួយអ្នកឈ្លានពាន លោកទៀ បាញ់ ក៏បានអះអាងដែរថា កម្ពុជានឹងមិនប្រញាប់ប្រញាល់ចូលជាសមាជិកអនុសញ្ញាហាមប្រាមការប្រើប្រាស់គ្រាប់បែកចង្កោមទេ ខណៈដែលប្រទេសជិតខាងជាពិសេសថៃមិនទាន់បានចូលជាសមាជិកអនុសញ្ញានេះនៅឡើយ។ គួរបញ្ជាក់ថា ក្នុងអំឡុងពេលផ្ទុះសង្គ្រាមនៅព្រះវិហារកាលពីខែកុម្ភៈ ថៃបានបាញ់គ្រាប់បែកចង្កោមរាប់រយគ្រាប់ចូលតំបន់ព្រះវិហារ។
គួរកត់សម្គាល់ដែរថា ស្របពេលដែលលោកទៀ បាញ់បង្ហាញពីគោលដៅនៃការធ្វើទំនើបកម្មយោធា រដ្ឋាភិបាលទើបតែសម្រេចឲ្យក្រសួងការពារជាតិជ្រើសរើសកងទ័ពចំនួន ៥០០០នាក់ ដើម្បីបំពេញបន្ថែម ខណៈដែលមន្ត្រីយោធាជាច្រើនបានចូលនិវត្តន៍។ ទោះបីជាក្រសួងការពារជាតិអះអាងថា ការជ្រើសរើសទ័ពបន្ថែមនេះមិនពាក់ព័ន្ធនឹងបញ្ហាព្រំដែនជាមួយថៃក៏ដោយ ក៏ប៉ុន្តែ ការជ្រើសរើសកងទ័ពក៏ជាចំណែកមួយនៃការពង្រឹងវិស័យយោធាកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ