ទំនាក់ទំនងយោធាអាមេរិក-កម្ពុជាកាន់តែស្អិតល្មួត
ប្រតិភូមេបញ្ជាការកងទ័ពជើងទឹកអាមេរិកកំពុងធ្វើទស្សនកិច្ច២ថ្ងៃ នៅកម្ពុជា ដើម្បីពង្រឹងសហប្រតិបត្តិការយោធាទ្វេភាគី និងបញ្ហាសន្តិសុខតំបន់។ ប្រតិភូយោធាជើងទឹកសហរដ្ឋអាមេរិកនឹងចុះពិនិត្យមើលអង្គភាពកងទ័ពជើងទឹក ប្រចាំការនៅសមុទ្ររាម ខេត្តព្រះសីហនុផងដែរ នៅថ្ងៃព្រហស្បតិ៍ស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ដំណើរទស្សនកិច្ចរបស់ឧត្តមនាវីឯក Scott Van Buskirk មេបញ្ជាការនៃកងនាវាទី៧របស់សហរដ្ឋអាមេរិកនៅកម្ពុជានៅពេលនេះ គឺជាសក្ខីភាពមួយទៀតដែលបញ្ជាក់អំពីទំនាក់ទំនងល្អក្នុងវិស័យយោធារវាងភ្នំពេញ និងទីក្រុងវ៉ាស៊ីនតោន។
ក្នុងដំណើរទស្សនកិច្ច២ថ្ងៃ គឺថ្ងៃទី៣ ទី៤ខែសីហានេះ ប្រតិភូកងនាវាទី៧របស់អាមេរិកបានជួបមន្ត្រីកងទ័ពជើងទឹក និងមន្ត្រីក្រសួងការពារជាតិកម្ពុជា ដើម្បីពិភាក្សាអំពីសហប្រតិបត្តិការទ្វេភាគី និងក្នុងក្របខ័ណ្ឌតំបន់ក្នុងវិស័យយោធា។ ការពិភាក្សាក៏នឹងផ្តោតទៅលើការហ្វឹកហ្វឺននិងការត្រៀមខ្លួនជាស្រេច សម្រាប់ប្រតិបត្តិការលើផ្ទៃទឹកក្នុងឆ្នាំនេះ ការពង្រឹងចំណងទាក់ទងនយោបាយអោយកាន់តែជិតស្និទ្ធថែមទៀត ដំណើរការលំហាត់ហ្វឹកហ្វឺនបន្ថែម ដែលផ្តល់ផលប្រយោជន៍ទៅវិញទៅមកក្នុងផ្នែកសន្តិសុខលំហសមុទ្រ ការរុករក និងការជួយសង្គ្រោះបន្ទាន់ក្នុងគ្រោះធម្មជាតិ។
អ្នកនាំពាក្យក្រសួងការពារជាតិ លោកឧត្តមសេនីយឯកឈុំ សុជាតិបានអត្ថាធិប្បាយថាលោកមើលឃើញអំពីកិច្ចសហប្រតិបត្តិការកាន់តែល្អរវាងប្រទេសទាំងពីរ។ អ្នកនាំពាក្យរូបនេះបានប្រាប់អោយដឹងថា ប្រតិភូនឹងចេញដំណើរទៅទស្សនកិច្ចកងទ័ពជើងទឹកកម្ពុជានៅសមុទ្ររាមនៅថ្ងៃស្អែក។
ទីក្រុងវ៉ាស៊ីនតោនបានចាប់អារម្មណ៍យ៉ាងខ្លាំងក្នុងការចាប់ដៃជាមួយទីក្រុងភ្នំពេញក្នុងវិស័យយោធា។ ជាញឹកញាប់នាវាចម្បាំងរបស់អាមេរិកបានចូលចតច្រាំងកម្ពុជា ដើម្បីធ្វើសកម្មភាពមនុស្សធម៌ជួយព្យាបាល និងសាងសង់មជ្ឈមណ្ឌលសុខភាពនិងសាលារៀនអោយពលរដ្ឋខ្មែរនៅតាមតំបន់ឆ្នេរ។ នេះមិនរាប់បញ្ចូលទស្សនកិច្ចជាច្រើននៃប្រតិភូយោធាអាមេរិកនៅកម្ពុជាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ