អាមេរិកដាក់ទណ្ឌកម្មអង្គភាពយោធាចិនដែលទិញយន្តហោះចម្បាំងនិងមីស៊ីលពីរុស្ស៊ី
សហរដ្ឋអាមេរិក នៅថ្ងៃព្រហស្បតិ៍ទី២០កញ្ញាម្សិលមិញ បានប្រកាសពង្រីកការដាក់ទណ្ឌកម្មរបស់ខ្លួនប្រឆាំងរុស្ស៊ី ទៅកាន់ប្រទេសចិន។ ចិន ដែលបានទិញយន្តហោះចម្បាំងនិងមីស៊ីលពីរុស្ស៊ី កាលពីពេលថ្មីៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
ការដាក់ទណ្ឌកម្មហិរញ្ញវត្ថុរបស់អាមេរិក ធ្វើឡើងចំពោះនាយកដ្ឋានអភិវឌ្ឍឧបករណ៍នៃក្រសួងការពារជាតិចិន និងថ្នាក់ដឹកនាំនៃស្ថាប័ននេះ។ ក្រសួងការបរទេសអាមេរិកបានឲ្យដឹងថា ការសម្រេចដូច្នេះ ធ្វើឡើងបន្ទាប់ពីស្ថាប័នយោធានៃប្រទេសចិន បានទិញយុទ្ធោបករណ៍ពីប្រទេសរុស្ស៊ី មានជាអាថិ៍៖ យន្តហោះចម្បាំងប្រភេទ Sukhoi Su-35 និងមីស៊ីលបាញ់ពីដីទៅលើអាកាសប្រភេទ S-400។
ដ្បិតតែទណ្ឌកម្មដាក់ទៅលើប្រទេសចិន ប៉ុន្តែមន្ដ្រីជាន់ខ្ពស់នៃក្រសួងការបរទេសអាមេរិកពន្យល់ថា គោលដៅពិតប្រាកដនៃទណ្ឌកម្ម គឺរុស្ស៊ីឯណោះទេ។ អាមេរិកចង់ដាក់សម្ពាធទៅលើរុស្ស៊ី ជាការឆ្លើយតបនឹងសកម្មភាពគគ្លើនរបស់រុស្ស៊ីនាពេលកន្លងមក រាប់ចាប់តាំងពីការឈ្លានពានយកគ្រីមៀពីអ៊ុយក្រែន ការវាយប្រហារតាមប្រព័ន្ធអ៊ីនធឺណែត ការលូកដៃចូលកកូរកកាយក្នុងការបោះឆ្នោតនៅអាមេរិកក្នុងឆ្នាំ២០១៦ និងសកម្មភាពផ្សេងៗទៀត។ នេះបើតាមមន្ដ្រីនៃក្រសួងការបរទេសអាមេរិក។
សូមជម្រាបថា នេះគឺជាលើកទីមួយហើយ ដែលអាមេរិកសម្រេចដាក់ទណ្ឌកម្មលើប្រទេសទីបី ដើម្បីប្រឆាំងនឹងរុស្ស៊ី។ ក្រសួងការបរទេសអាមេរិក បានជំរុញឲ្យប្រទេសដទៃទៀត កាត់បន្ថយទំនាក់ទំនងក្នុងវិស័យយោធាជាមួយប្រទេសរុស្ស៊ី បើមិនចង់រងទណ្ឌកម្មផ្នែកហិរញ្ញវត្ថុដូចប្រទេសចិន។ ទំនាក់ទំនងផ្នែកយោធាជាមួយរុស្ស៊ី ត្រូវបានអាមេរិកចាត់ទុកថា ជាការចូលដៃចូលជើងជាមួយរុស្សី បង្កសកម្មភាពទុច្ចរិតនៅលើសាកលលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ