ទស្សនកិច្ចរបស់ប្រធានាធិបតីបារាំងនៅប្រទេសក្រិក
នៅថ្ងៃអង្គារនេះ ប្រធានាធិបតីបារាំង លោក ហ្វ្រង់ស៊័រ ហូឡង់ បានបំពេញទស្សនកិច្ចរបស់ខ្លួន នៅប្រទេសក្រិក ដើម្បីបង្ហាញពីទំនុកចិត្តរបស់បារាំងក្នុងការប្រឹងប្រែងស្តារសេដ្ឋកិច្ចប្រទេសក្រិកអោយប្រសើរឡើងវិញ។ ប្រទេសក្រិកជាប្រទេសមួយដែលមានកម្រិតសេដ្ឋកិច្ចទន់ខ្សោយជាងគេ ក្នុងចំណោមបណ្តាប្រទេសក្នុងសហភាពអឺរ៉ុប។ គេប្រមើលមើលថា កំណើនសេដ្ឋកិច្ចប្រទេសក្រិកប្រហែលជានឹងធ្លាក់ចុះ ៤,៥ភាគរយ សំរាប់ឆ្នាំ២០១៣នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ទស្សនកិច្ចរបស់ប្រធានាធិបតីបារាំង លោក ហ្វ្រង់ស៊័រ ហូឡង់ នៅប្រទេសក្រិក នៅថ្ងៃអង្គារនេះ ត្រូវបានទទួលការស្វាគមន៍យ៉ាងកក់ក្តៅពីប្រជាជនក្រិក។ លោក ហ្វ្រង់ស៊័រ ហូឡង់ មានគំរោងជួបជាមួយនាយករដ្ឋមន្ត្រីក្រិក លោក Antonis Samara និងប្រធានាធិបតីក្រិក លោក Carolos Papoulias ដើម្បីបង្ហាញពីទំនុកចិត្តរបស់បារាំង ក្នុងដំណើរការស្តារសេដ្ឋកិច្ចរបស់ក្រិកអោយបានប្រសើរឡើងវិញ។
ប្រជាជនក្រិកមិនដែលបំភ្លេចសោះឡើយ នូវអំពើល្អរបស់ប្រធានាធិបតីបារាំង ដែលតែងតែការពារនិងគាំទ្រអោយប្រទេសខ្លួនទទួលបានទទួលជំនួយហិរញ្ញវត្ថុពីសហភាពអឺរុប។ ជំនួយហិរញ្ញវត្ថុនេះ បានធ្វើអោយប្រទេសក្រិក គេចផុតពីវិបត្តសេដ្ឋកិច្ចដ៏ធ្ងន់ធ្ងរ កាលពីចុងឆ្នាំកន្លងទៅ។
ប្រទេសក្រិកជាប្រទេសមួយដែលមានកម្រិតសេដ្ឋកិច្ចទន់ខ្សោយជាងគេ ក្នុងចំណោមបណ្តាប្រទេសនានាក្នុងសហភាពអឺរ៉ុប។ ប្រទេសក្រិក នៅតែបន្តដើរថយក្រោយ ក្នុងរយៈពេល៥ឆ្នាំកន្លងមកនេះ។ អត្រាអ្នកគ្មានការធ្វើ មានរហូតដល់ទៅ ២៧ ភាគរយ ក្នុងចំណោមប្រជាជនសកម្មក្នុងស្រុក។ អ្នកសេដ្ឋកិច្ចនានា គិតថាប្រទេសក្រិកនឹងបន្តប្រឈមមុខ នឹងការកាត់បន្ថយការងារធ្វើ នៅឆ្នាំ២០១៣ តទៅទៀត។
គួររំលឹកថា កាលពីឆ្នាំ២០១២ កន្លងទៅ កំណើនសេដ្ឋកិច្ចក្រិកបានធ្លាក់ចុះ ៦,៥ ភាគរយ។ ហើយគេប្រមើលមើលថា អត្រានេះនឹងធ្លាក់ចុះ ៤,៥ភាគរយ សំរាប់ឆ្នាំ២០១៣។
ប្រធានាធិបតីបារាំងបានបញ្ចេញយោបល់ កាលពីម្សិលមិញនេះថា ជំនួយហិរញ្ញវត្ថុសំរាប់ក្រុងអាថែនមិនទាន់គ្រប់គ្រាន់នៅឡើយទេ ដើម្បីស្តារវិស័យសេដ្ឋកិច្ចក្នុងប្រទេស។ ដើម្បីចូលរួមលើកស្ទួយកំណើនសេដ្ឋកិច្ចក្រិចកអោយបានឆាប់រហ័ស ក្រុងប៉ារីសនឹងចូលរួមសហប្រតិបត្តិការជួយក្រិក តាមរយៈសហគ្រាសបារាំង ផ្នែករដ្ឋបាលនានា និងតាមរយៈការស្វែងរកថវិកានៅអឺរ៉ុបជួយក្រុងអាថែន។
ការស្វាគមន៍របស់ក្រុងអាថែន បានផ្តល់មោទនភាពដល់ក្រុងប៉ារីស ដែលខុសពីដំណើរទស្សនកិច្ចរបស់លោកស្រី អង់ហ្កេឡា មែរគេល ដែលជាប្រមុខដឹកនាំប្រទេសអាល្លឺម៉ង់។ កាលពីខែកញ្ញាចុងឆ្នាំ ២០១២ ទស្សនកិច្ចរបស់ប្រមុខដឹកនាំអាល្លឺម៉ង់ នៅក្រុងអាថែន បានប្រឈមមុខនឹងបាតុកម្មរបស់ប្រជាជនក្រិក ដែលមិនពេញចិត្តនឹងការមិនអនុគ្រោះអត់ឧនរបស់អាល្លឺម៉ង់ ចំពោះដំណើរការសេដ្ឋកិច្ចក្រុងអាថែន។ អាល្លឺម៉ង់មិនមានទំនុកចិត្តលើប្រទេសក្រិក ក្នុងកិច្ចការស្តារសេដ្ឋកិច្ចនោះឡើយ។
នៅពេលដែលបារាំងបង្ហាញនូវទឹកចិត្តជួយក្រិក រដ្ឋាភិបាលរបស់លោក ហូឡង់ ត្រូវប្រឈមមុខនឹងគណកម្មការអឺរ៉ុប នៅថ្ងៃសុក្រនេះ ដើម្បីបកស្រាយថាហេតុអ្វីបានជា នៅសប្តាហ៍មុន ក្រុងប៉ារីសប្រកាសថាគ្មានលទ្ធភាពនឹងបន្ថយឧនភាពសាធារណៈ ទៅលើផលិតផលសរុបក្នុងស្រុកអោយបាន ៣ ភាគរយ ដូចជាការគ្រោងទុក។
ប្រទេសបារាំងខ្លួនឯងផ្ទាល់ ក៏មានគម្រោងកែទម្រង់លើការចាយវាយក្នុងស្រុកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ