ភ្នំភ្លើងអ៊ីស្លង់ ៖ អាល្លឺម៉ង់បិទចរាចរណ៍ផ្លូវអាកាស
អាកាសយានដ្ឋានបីធំៗ របស់ប្រទេសអាល្លឺម៉ង់ ដែលស្ថិតនៅភាគខាងជើងប្រទេស ត្រូវបិទទ្វារនៅថ្ងៃពុធទី ២៥ ឧសភា នេះ ដោយហេតុតែពពកផេះនៃភ្នំភ្លើង Grimsvötn ប្រទេសអ៊ីស្លង់។ ពពកផេះដែលពេលនេះរសាត់នៅកម្ពស់តែពី ២គីឡូម៉ែត្រពីដី លើផ្ទៃអាកាសអឺរ៉ុបខាងជើង។ ម្សិលមិញ ការហោះហើរប្រមាណ៥០០ជើង នៅអង់គ្លេស និងអេកូស ត្រូវបានលុបចោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
បន្ទាប់ពីប្រទេសអង់គ្លេស និងអេកូស គឺដល់វេនប្រទេសអាល្លឺម៉ង់ម្តង ដែលត្រូវទទួលរងផលប៉ះពាល់ពីពពកផេះនៃភ្នំភ្លើងអ៊ីស្លង់។ មានយ៉ាងហោចណាស់អាកាសយានដ្ឋានបីរបស់អាល្លឺម៉ង់ រួមទាំងអាកាសយានដ្ឋានក្រុងប៊ែរឡាំងផង បានប្រកាសបិទទ្វារនៅក្នុងថ្ងៃពុធទី ២៥ឧសភានេះ។
មួយឆ្នាំគត់បានកន្លងផុត អាកាសយានដ្ឋានមួយភាគ នៃបណ្តាប្រទេសអឺរ៉ុបខាងជើង ត្រូវបិទទ្វារទៀត ដូចឆ្នាំទៅមិញដែរ ដោយហេតុតែភ្នំភ្លើងអ៊ីស្លង់ ផ្ទុះ ជះផេះ រសាត់តាមខ្សល់ លើផ្ទៃអាកាស។ កម្ទេចពពកផេះដែល រំខានយ៉ាងខ្លាំងដល់ចរាចរណ៍ផ្លូវអាកាស។ ម្សិលមិញ ក្រុមអាកាសចរណ៍អង់គ្លេសបានលុបចោលការហោះហើរ ទៅកាន់ និងមកពី អេកូស (ភាគខាងជើងប្រទេសអង់គ្លេស) ប្រមាណ៥០០ជើង ក្នុងចំណោមការហោះហើរសរុប២៩០០០ជើង។
គណៈកម្មការអឺរ៉ុបទទួលបន្ទុកសុវត្ថិភាពចរាចរណ៍ផ្លូវអាកាស មានសុទិដ្ឋិនិយម បានសម្តែងការធានាអះអាងថា នឹងគ្មានការបិទអាកាសយានដ្ឋាន យ៉ាងសន្ធឹកសន្ធាប់ ដូចឆ្នាំ២០១០ទេ។ ប៉ុន្តែដោយចៀសមិនរួច ការហោះហើរនឹងមានការរអាក់រអួលខ្លាំងនៅក្នុងសប្តាហ៍នេះ។
បើតាមអាជ្ញាធរអ៊ីស្លង់ នៅល្ងាចថ្ងៃអង្គារម្សិលមិញ ភ្នំភ្លើងហ្គ្រីមស្វូត (Grimsvötn) ដ៏សកម្មបំផុតមួយនេះ បានចុះថយកម្លាំងបន្តិច ដោយព្រួសភ្លើងនិងជះផេះ ក្នុងកម្ពស់តែពីរគីឡូម៉ែត្រ ប៉ុណ្ណោះ។ ប៉ុន្តែផ្សែងពពកផេះ ដែលភ្នំភ្លើងបានខ្ជាក់កាលពីថ្ងៃសៅរ៍ ក្នុងកម្ពស់២០គីឡូម៉ែត្រ កំពុងបន្តរសាត់ នៅលើផ្ទៃអាកាសអឺរ៉ុប។ គេត្រូវរង់ចាំពីរបីថ្ងៃទៀត ទើបមេឃអាចស្រឡះ ពពកផេះរសាត់អស់។ ដូច្នេះទំហំនៃការប៉ះពាល់ពិតជាមិនអាចប្រៀបធៀបនឹងមហន្តរាយភ្នំភ្លើងកាលពីឆ្នាំមុនបានទេ លើកលែងតែភ្នំភ្លើងហ្គ្រីមស្វូតនេះកម្រើក ធ្វើសកម្មភាពឡើងវិញ ...
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ