“វេទិកាសេដ្ឋកិច្ចពិភពលោក” បើកកិច្ចប្រជុំប្រចាំឆ្នាំ នៅក្រុង Davos ប្រទេសស្វ៊ីស
ក្នុងថ្ងៃទី១ នៃការងារខ្លួន កិច្ចប្រជុំនេះ ពិភាក្សាអំពីអនាគតនៃនយោបាយសេដ្ឋកិច្ចរបស់រុស្ស៊ី ដែលឆ្នាំ២០១៣នេះ ជាម្ចាស់ផ្ទះ ទទួលជំនួបកំពូល នៃ២០ប្រទេសមានសេដ្ឋកិច្ចហំហួនជាងគេក្នុងលោក ហៅថា G-20។ មូលដ្ឋាននៃការពិភាក្សានេះ គឺរបាយការណ៍ ក្រោមឈ្មោះថា “Scenario បីនៃការអភិវឌ្ឍន៍ប្រទេសរុស្ស៊ី” តាក់តែងឡើងដោយ “ក្រុមប្រឹក្សាពួកអ្នកជំនាញការអន្តរជាតិ” របស់ “វេទិកាសេដ្ឋកិច្ចពិភពលោក” ហៅកាត់ថា WEF។
ចុះផ្សាយនៅថ្ងៃ៖
ស្តាប់ - ០២:៣៨
ជាបឋម គួរនិយាយថា ចូលរួមក្នុងកិច្ចប្រជុំលើកនេះ គឺប្រតិភូជិត២.០០០នាក់ ទៅពីជាង ១០០ប្រទេសក្នុងលោក ដែលពីក្នុងនោះ ៤៥ប្រទេស គឺតំណាងដោយប្រមុខរដ្ឋ និងប្រមុខរដ្ឋាភិបាលតែម្តង។ ប្រទេសរុស្ស៊ីផ្ទាល់ មានមុខ ដោយលោកនាយករដ្ឋមន្ត្រី Medvedev ដែលនឹងថ្លែងសុន្ទរកថា ស្តីអំពី ទិសដៅធំៗជាគោល នៃការអភិវឌ្ឍន៍សេដ្ឋកិច្ចជាតិ និងស្តីអំពី ប្រធានបទនានាជាអាទិភាព សម្រាប់ជំនួបកំពូល G-20 នៅខែកញ្ញាឆ្នាំនេះ ជ្រោងលើកឡើង ដោយរុស្ស៊ី ក្នុងឋានៈជាម្ចាស់ផ្ទះទទួលជំនួប។
ប៉ុន្តែ មុនដល់សុន្ទរកថារបស់ប្រមុខរដ្ឋាភិបាលរុស្ស៊ី កិច្ចប្រជុំក្រុង Davos ប្រទេសSuisse នឹងស្តាប់របាយការណ៍ស្តីអំពី Scenario បីនៃការអភិវឌ្ឍន៍ប្រទេសរុស្ស៊ី ដែលរៀបចំឡើងដោយ “ក្រុមប្រឹក្សាពួកអ្នកជំនាញការអន្តរជាតិ” របស់“វេទិកាសេដ្ឋកិច្ចពិភពលោក” ហៅកាត់ថា WEF ក្នុងន័យថា ស្ថានការណ៍សេដ្ឋកិច្ច និង នយោបាយនៅរុស្ស៊ី អាស្រ័យនឹងមុខព្រួញបី ពោលគឺ ទី១-អាស្រ័យនឹងតម្លៃនៃវត្ថុធាតុដើម ដែលរុស្ស៊ីលក់បាន នៅលើទីផ្សារពិភពលោក ទី២- អាស្រ័យនឹងសមត្ថភាពរុស្ស៊ីធ្វើកំណែទម្រង់បណ្តាញស្ថាប័នខ្លួន ទី៣- អាស្រ័យតើសង្គមរុស្ស៊ី ចេះរួមសម្បាច់គ្នា ក្នុងកម្រិតណា។
ស្របនឹង Scenario ទី១ នយោបាយរបស់ម៉ូស្គូ គឺរំពឹងលើកំណើនសេដ្ឋកិច្ចពិភពលោក ហេតុដែលញ៉ាំងឲ្យតម្រូវការនៃប្រេងឥន្ធនៈកើនឡើង ដូច្នេះ ប្រេងដែលរុស្ស៊ី លក់លើទីផ្សារ មុខជាឡើងថ្លៃ ហើយនាំចំណូលកាន់តែក្រាស់ក្រែលដល់ថវិការុស្ស៊ី។ ប៉ុន្តែ បើចំណូលនោះធ្លាក់ចុះ ថវិកាខេត្តទាំងឡាយ ដែលចំណុះសហព័ន្ធរុស្ស៊ីមុខជាលែងទទួលទាយជ្ជទាន ពីមជ្ឈឹម គឺពីម៉ូស្គូ ហើយខេត្តទាំងនោះ នឹងបង្ខំចិត្តរត់រកជំនួយពីឯកជន ខណៈនោះច្បាស់ជាកើតមានឡើងជាបរិយាកាសប្រជែង ដែលអាចជំរុញដល់ការអភិវឌ្ឈន៍ប្រទេសរុស្ស៊ីទៅវិញ។
Scenario ទី២ ក្រោមឈ្មោះថា “ស្ថិរភាពផុយស្រួយ” នឹងត្រូវប្រតិបត្តិ ពេលដែលតម្លៃប្រេងចេះតែធ្លាក់ចុះជានិច្ច លុះទាល់តែរដ្ឋាភិបាល លែងមានធនធាន សម្រាប់ធ្វើកំណែទម្រង់ ដែលព្យួរទុកយូរមកហើយ។ ប៉ុន្តែ ក្នុងនាមរក្សាទុកសុវត្ថិភាពសង្គម រដ្ឋាភិបាលនៅតែបន្តចំណាយយ៉ាងច្រើនដដែល សម្រាប់តម្រូវការសង្គម។
Scenario ទី៣ ក្រោមឈ្មោះថា “ទីអវសាននៃភាពអៀងអើយ” ចែងអំពីការកើនឡើងនៃតម្លៃវត្ថុធាតុដើមរបស់រុស្ស៊ី លើទីផ្សារពិភពលោក និង អំពីក្តីទោមនស្សរបស់សង្គម ចំពោះ ការរិយាធិបតេយ្យ ដែលដំណើរការដោយគ្មានប្រសិទ្ធិភាពទេ។ វិសមភាពសង្គមនឹងកើនកម្រិត បណ្តាជនដូចមុនដដែល បន្តប៉ះទង្គិចនឹងអំពើពុករលួយ នឹងគុណភាពទាបនៃសេវារដ្ឋ។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ