អេហ្ស៊ីប៖សេដ្ឋកិច្ច និងសន្តិសុខ ជាសំណុំរឿងអាទិភាពរបស់លោកប្រធានាធិបតីថ្មី
ចុះផ្សាយនៅថ្ងៃ៖
ស្តាប់ - ០៥:៥៧
នៅថ្ងៃអាទិត្យ ទី៨ មិថុនានេះ លោកអាប់ដែល ហ្វាតា អាល់ស៊ីស៊ីបានធ្វើសច្ចាប្រណិធានចូលកាន់តំណែងប្រធានាធិបតីអេហ្ស៊ីបជាផ្លូវការ។ តំណែងប្រធានាធិបតីដែលលោកអាល់ស៊ីស៊ីបានមកពីការបោះឆ្នោតនាពេលថ្មីៗកន្លងទៅ ដោយទទួលបានសម្លេងគំាទ្រជិត ៩៧%។ អ្វីជាការកត់សម្គាល់គឺថា ការចូលកាន់តំណែងជាផ្លូវការរបស់លោកអាល់ស៊ីស៊ីពេលនេះបានធ្វើឡើង ចំពេលដែលប្រទេសអេហ្ស៊ីបកំពុងពើបប្រទះនឹងវិបត្តិសេដ្ឋកិច្ច និងសនិ្តសុខយ៉ាងធ្ងន់ធ្ងរ។
ពិធីផ្ទេរតំណែងរវាងលោកប្រធានាធិបតីស្តីទីអាដ៏លី មែនស៊ូ និងលោកប្រធានាធិបតីទើបជាប់ឆ្នោតអាប់ដែល ហ្វាតា អាល់ស៊ីស៊ីថ្ងៃនេះ គឺជាព្រឹត្តិការណ៍ប្រវត្តិសាស្រ្តលើកទី១ នៅក្នុងប្រទេសអេហ្ស៊ីប។ ជាទូទៅ ការផ្ទេរអំណាចរវាងប្រធានាធិបតីផុតអណត្តិ និងប្រធានាធិបតីជាប់ឆ្នោតថ្មី ឬមួយក៏ជាមួយនឹងប្រធានាធិបតីស្តីទី គឺជាព្រឹត្តិការណ៍មួយដែលពុំធ្លាប់មានទាល់តែសោះនៅក្នុងប្រទេសអេហ្ស៊ីប។ កន្លងមក ប្រធានាធិបតីថ្មីច្រើនឡើងកាន់អំណាចជាស្វ័យប្រវត្តិ ជំនួសកន្លែងប្រធានាធិបតីដែលបានទទួលមរណៈភាពក្នុងពេលកាន់អំណាច ឬមួយក៏ត្រូវបានគេធ្វើរដ្ឋប្រហារទម្លាក់។ ជាក់ស្តែងថ្មីៗនេះ លោកម័រស៊ីដែលបានជាប់ឆ្នោតបានឡើងជំនួសកន្លែងលោកមូបារ៉ាក់ក្នុងឆ្នំា ២០១២ ក៏ដោយសារតែលោកមូបារ៉ាក់ត្រូវបានគេធ្វើបដិវត្តន៍ទម្លាក់ក្នុងឆ្នំា ២០១១។ បន្ទាប់មកក្នុងខែកក្កដា ឆ្នំា ២០១៣ លោកម័រស៊ីក៏ត្រូវបានឧត្តមសេនីយអាប់ដែល ហ្វាតា អាល់ស៊ីស៊ីទម្លាក់ពីអំណាច ដោយដាក់លោកអាដ៏លី មែនស៊ូឲ្យធ្វើជាប្រធានាធិបតីស្តីទី។
ឃើញថា រវាងលោកម៉ូបារ៉ាក់ និងលោកម័រស៊ី ក៏ដូចជារវាងលោកម័រស៊ី និងលោកអាដ៏លី មែនស៊ូ គឺមិនមានការរៀបចំពិធីផ្ទេរតំណែងអ្វីទំាងអស់។ គឺទើបតែនៅពេលនេះទេដែលគេឃើញមានការរៀបចំពិធីផ្ទេរតំណែងជាផ្លូវការ និងលើកទី១រវាងលោកអាដ៏លី មែនស៊ូ និងលោកប្រធានាធិបតីថ្មីអាប់ដែល ហ្វាតា អាល់ស៊ីស៊ី។ មានអាយុ ៥៩ឆ្នំា ប្រធានាធិបតីថ្មីអេហ្ស៊ីបរូបនេះ គឺជាអតីតឧត្តមសេនីយ និងជាអតីតសេនាប្រមុខដ៏មានឥទ្ធិពលជាងគេនៅក្នុងប្រទេសអេហ្ស៊ីប។
អាទិភាពចម្បងរបស់លោកអាល់ស៊ីស៊ី គឺសេដ្ឋកិច្ច និងសន្តិសុខ
វិបត្តិសេដ្ឋកិច្ចដែលអេហ្ស៊ីបកំពុងជួបប្រទះសព្វថ្ងៃ គឺជាបញ្ហាប្រឈមខ្លំាងដែលលោកអាល់ស៊ីស៊ីត្រូវដោះស្រាយជាបន្ទាន់។ តំាងពីក្រោយបដិវត្តន៍ផ្តួលរំលំរបបរបស់ប្រធានាធិបតីមូបារ៉ាក់ក្នុងឆ្នំា ២០១១ មក កំណើនសេដ្ឋកិច្ចអេហ្ស៊ីបមានប្រមាណតែ ២% ប៉ុណ្ណោះ ពោលគឺមានអត្រាសឹងតែស្មើនឹងកំណើនចំនួនប្រជាពលរដ្ឋទៅហើយ។ វិនិយោគបរទេស និងវិស័យទេសចរណ៍ដែលជាប្រភពដង្ហើមសេដ្ឋកិច្ចជាតិបានស្លាប់ស្តូកមួយកន្លែង។ ចំណូលបានមកពីវិស័យទំាងពីរនេះបានធ្លាក់ចុះចំនួនពាក់កណ្តាលតំាងពីថ្ងៃផ្តើមផ្ទុះវិបត្តិ។
ទន្ទឹមគ្នានេះ លោកប្រធានាធិបតីថ្មីក៏ត្រូវចាត់វិធានការប្រឆំាងនឹងភាពក្រីក្រ ព្រមទំាងទប់ស្កាត់ការឡើងថ្លៃទំនិញគ្រប់សារពើ។ ទំាងនេះមិនភ្លេចនិយាយទេ ពីការកាត់បន្ថយអត្រាអតិផរណាដែលមានរហូតដល់ទៅ ១២% និងចំនួនអ្នកអត់ការងារធ្វើដ៏ច្រើនសម្បើម ពិសេសក្រុមយុវវ័យ។ សព្វថ្ងៃនេះ តួលេខផ្លូវការឲ្យដឹងថា មានយុវវ័យ ៤នាក់ក្នុងចំណោមយុវវ័យ ១០នាក់ដែលមានអាយុពី ២០ ទៅ ២៥ឆ្នំាកំពុងដើរទាត់ខ្យល់។ តែបើផ្អែកតាមតួលេខរបស់ក្រុមអ្នកឯកទេសឯករាជ្យវិញ គឺមាន ២ដងច្រើនជាងនេះ។ ដោយឡែក មានប្រជាជនអេហ្ស៊ីបចំនួន ៣៤លាននាក់កំពុងរស់នៅជាមួយនឹងចំណូលប្រមាណជា ២ដុល្លារក្នុងមួយថ្ងៃ។
ក្រៅពីនោះ លោកអាល់ស៊ីស៊ីក៏ត្រូវដោះស្រាយបញ្ហាបំណុលក្រៅប្រទេស និងក្នុងប្រទេសដែលអេហ្ស៊ីបកំពុងជំពាក់គេវ័ន ក។ តែដើម្បីអាចឲ្យប្រទេសមានដំណើរការទៅមុខបាន លោកអាល់ស៊ីស៊ីអាចពឹងលើជំនួយរបស់ប្រទេសអារ៉ាប៊ីសាអូឌីតចំនួន ៥ ០០០លានដុល្លារ និងរបស់ប្រទេសគូវ៉ែត និងអេមីរ៉ា អារ៉ាប់រួមដែលមានទឹកប្រាក់សរុប ៧ ០០០លានដុល្លារ។ ទន្ទឹមគ្នានេះ អង្គការមូលនិធិរូបិយវត្ថុអន្តរជាតិក៏ត្រៀមខ្លួននឹងបើកកិច្ចចរចាជាថ្មីជាមួយរដ្ឋាភិបាលទីក្រុងគែរដើម្បីបន្តនិយាយពីទឹកប្រាក់ជំនួយជិត ៥ ០០០លានដុល្លារដែលបានផ្អាកមួយរយៈ នៅក្រោយព្រឹត្តិការណ៍ទម្លាក់លោកម័រស៊ី។
មួយវិញទៀត និងក្រៅពីបញ្ហាសេដ្ឋកិច្ច ក៏នៅមានបញ្ហាសន្តិសុខដែលលោកអាល់ស៊ីស៊ីត្រូវដោះស្រាយជាបន្ទាន់ដែរ។ សូមជម្រាបជូនថា តំាងពីក្រោយទម្លាក់លោកម័រស៊ីក្នុងខែកក្កដា ឆ្នំា ២០១៣ មក អេហ្ស៊ីបបានទទួលរងរលកភេរវកម្មសឹងតែរាល់ថ្ងៃ ពិសេសការបន្តប្រឆំាងពីក្រុមភាតរអ៊ីស្លាម អ្នកគំាទ្រលោកម័រស៊ី។
ជាមួយលោកអាល់ស៊ីស៊ី អេហ្ស៊ីបនឹងរកឃើញវិញនូវស្ថានភាពប្រក្រតី !
បើគេមើលពីសំបកក្រៅទៅ អេហ្ស៊ីបជាមួយនឹងលោកប្រធានាធិបតីអាល់ស៊ីស៊ីហាក់ដូចជាកំពុងដើរលើគន្លងផ្លូវមួយដែលត្រួសត្រាយដោយបដិវត្តន៍ផ្តួលរំលំរបបយោធាផ្តាច់ការរបស់លោកហូស្ន៊ី មូបារ៉ាក់កាលពី ៣ឆ្នំាមុន។ តែបើគេពិនិត្យឲ្យបានស៊ីជម្រៅបន្តិចទៅឃើញថា អេហ្ស៊ីបសម័យលោកអាល់ស៊ីស៊ីក៏ប្រហែលជាមិនខុសអ្វីពីអេហ្ស៊ីបមុនបដិវត្តន៍ទេ ព្រោះចូរកុំភ្លេចថា មុននឹងក្លាយជាប្រធានាធិបតីថ្ងៃនេះ លោកអាល់ស៊ីស៊ី គឺជាឧត្តមសេនីយ និងជាសេនាប្រមុខដ៏មានឥទ្ធិពលជាងគេនៅក្នុងប្រទេសអេហ្ស៊ីប។ សួរថា តើលោកអាល់ស៊ីស៊ីនឹងអនុវត្តន៍នយោបាយផ្តាច់ការតាមបែបយោធា ដូចលោកមូបារ៉ាក់ ឬយ៉ាងណានោះ ជារឿងមួយដែលគេត្រូវរង់ចំាមើលនៅថ្ងៃខាងមុខ។
តែគេក៏មិនត្រូវភ្លេចនិយាយទេថា មានចរន្តនយោបាយធំៗពីរនៅក្នុងប្រទេសអេហ្ស៊ីប គឺចរន្តនយោបាយអ៊ីស្លាម និងចរន្តនយោបាយកងទ័ព។ តែជាទូទៅ និងអាចថាជាទម្លាប់មួយរបស់ប្រទេសអេហ្ស៊ីបក៏ថាបាន ចរន្តនយោបាយកងទ័ពកំពុងបន្តមានឥទ្ធិពលខ្លំាង ព្រោះកងទ័ពជាអ្នកដែលមានអំណាចពិតប្រាដក្នុងដៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ