លោកស៊ីសស៊ី ប្រធានាធិបតីអេហ្ស៊ីបថ្មីដែលបានទទួលសំឡេងឆ្នោតដ៏ច្រើនលើសលុបមិនធ្លាប់មាន
ជាផ្លូវការហើយ ! លោក អាប់ឌែល ហ្វាតា អាល-ស៊ីសស៊ី (Abdel Fattah al-Sissi) អតីតមេទ័ពអេហ្ស៊ីប ជាអ្នកជាប់ឆ្នោត ប្រធានាធិបតីថ្មីក្នុងសំឡេង ៩៧%។ ពលរដ្ឋអេហ្ស៊ីបរាប់លាននាក់បានផ្ទុះអំណរ រីករាយ ក្រោយពីបានឮការប្រកាសលទ្ធផលរបស់គណៈកម្មការបោះឆ្នោត និងបាននាំគ្នាចុះដង្ហែក្បួនអបអរជ័យជំនះ ស្វាគមប្រធានាធិបតីថ្មី តាមគ្រប់ដងវិថីនិងទីលានសំខាន់ៗរបស់ប្រទេស។ មិនតែប៉ុណ្ណោះសហគមន៍អន្តរជាតិ បណ្តាប្រទេសក្នុងពិភពអារ៉ាប សុទ្ធតែអបអរគ្រប់គ្នា។ ឯសហរដ្ឋអាមេរិកបានអះអាងថារង់ចាំយ៉ាងអន្ទះសាចង់ធ្វើការប្រធានាធិបតីថ្មី។
ចុះផ្សាយនៅថ្ងៃ៖
លោក Abdel Fattah al-Sissi បានឡើងថ្លែងសុន្ទរកថា ខ្លី តែខ្លឹម ! អរគុណបណ្តាជនអេហ្ស៊ីប និងអរគុណគូប្រជែង ដែលបានផ្តល់ទំនុកចិត្តលើលោក ដោយបានចូលរួមបោះឆ្នោត។ ជាការបើកទំព័រ ថ្មី ដែលទាមទារការងារច្រើន ការរួមរួបគញនាខ្លាំងដើម្បីអនាគតភ្លឺស្វាងសម្រាប់អេហ្ស៊ីប ! នេះជាសាររបស់លោកស៊ីសស៊ី។
ក្រៅពីមានអត្រាគាំទ្រដ៏លើសលុប ដាច់ឆ្ងាយស្រឡះពីគូប្រជែង ដល់ទៅជិត៩៧% សកម្មជនរបស់លោកស៊ីសស៊ីកាន់តែមានមោទនភាពខ្លាំងថែមទៀត ដោយចំនួនសន្លឹកឆ្នោតបានការ បោះជូនលោកស៊ីស៊ី មានកំរិតខ្ពស់បំផុត (២៣ ៧៨០ ០០០ លើសន្លឹកឆ្នោតបានការសរុប ២៤ ៥៧៨ ០០០)។ ស្ទើរតែទ្វេមួយជាពីរ បើប្រៀបទៅនឹងសំឡេងឆ្នោតឆ្នាំ២០១២ ដែលបាននាំលោក មហាមេដ ម័រស៊ី នៃបក្សភាតរអ៊ីស្លាមឱ្យជាប់ជាប្រធានាធិបតី មុននឹងត្រូវទម្លាក់ចេញពីអំណាចដោយលោកសេនាប្រមុខស៊ីសស៊ី។ ថ្វីដ្បិតតែអត្រាអ្នកចូលរួមបោះឆ្នោត ឆ្នាំ២០១៤នេះ តិចជាង ៤៧% ទល់នឹង៥២% កាលពីឆ្នាំ២០១២មែន ប៉ុន្តែសំឡេងឆ្នោតមានទំហំប្រដំប្រសងគ្នា ២៦លានបីសែន នៅឆ្នាំ២០១២ និង២៥លានកន្លះនៅឆ្នាំ២០១៤នេះ។
អត្រាអ្នកចូលរួមបោះឆ្នោតធ្លាក់ចុះបន្តិចនេះ ដោយសារមូលហេតុបីសំខាន់ៗ ៖ ទីមួយ គេបានដឹងជាមុនអំពីប្រជាប្រិយភាពរបស់លោកមេទ័ពស៊ីស៊ី។ បន្ទាប់មក បណ្តាជនអេហ្ស៊ីបប្រមាណ៥លាននាក់ធ្វើការឆ្ងាយពីទីស្នាក់នៅមិនអាចបោះឆ្នោតបាន មិនដូចសម័យឆ្នាំ២០១២ ដែលអាចបោះឆ្នោតនៅកន្លែងធ្វើការ។ ហេតុផលទីបីនិងចុងក្រោយ គឺការអំពាវនាវឱ្យធ្វើពហិការមិនចូលរួមបោះឆ្នោតពីសំណាក់ក្រុម Freres musulmans និងកម្លាំងបដិវត្តន៍។ ក្រុមនេះបើទៅក៏បញ្ចេញសំឡេងតាមសន្លឹកឆ្នោតមិនបានការ ពោលគឺប្រមាណជាងមួយលានសន្លឹក។
ប៉ុន្តែជាទូទៅ ការបោះឆ្នោតនេះបានទទួលការស្វាគមន៍ ! ព្រះចៅ Abdallah នៃអារ៉ាប៊ីសាអ៊ូឌីត អេមៀរ៉ា និងគុយវេត បានថ្លែងសារកោតសរសើរភ្លាម ប្រធានាធិបតីទី៧នៃសាធារណរដ្ឋអេហ្ស៊ីប។ បងប្អូនពិភពអ៊ីស្លាមនេះ ប្រកាសបើកសន្និសីទមិត្តអេហ្ស៊ីប ដើម្បីជួយប្រទេសនេះបានចេញផុតពីវិបត្តិសេដ្ឋកិច្ច។ លើសពីនេះទៅទៀត សហរដ្ឋអាមេរិក បានសម្តែងភាពអន្ទះសាចង់ធ្វើការជាមួយអេហ្ស៊ីបដែលទើបមានប្រធានាធិបតីថ្មី។ លោកបារ៉ាក់អូបាម៉ា នឹងជួបសន្ទនាជាមួយលោកអតីតមេទ័ព ក្លាយជាប្រមុខរដ្ឋអេហ្ស៊ីប ក្នុងពេលប៉ុន្មានថ្ងៃទៀតខាងមុខ។ នេះបើតាមសេតវិមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ