បាកដាតចោទអារ៉ាប៊ី សាអ៊ូឌីតថា ជាអ្នកផ្តល់លុយដល់ក្រុមជីហាតនៅអ៊ីរ៉ាក់
កាលពីថ្ងៃអង្គារទី ១៧មិថុនា រដ្ឋាភិបាលអ៊ីរ៉ាក់បានចោទប្រកាន់ ទីក្រុងរីយ៉ាត ជាផ្លូវការថា ជាគាំទ្រផ្នែកហិរញ្ញវត្ថុ និងស្មារតីដល់ក្រុមជីហាត មកពីរដ្ឋអ៊ីស្លាមអ៊ីរ៉ាក់ និងឡឺវ៉ង់ ដែលកំពុងវាយចូលកាន់កាប់ទីក្រុងជាច្រើនរបស់ប្រទេសអ៊ីរ៉ាក់។ គិតមកត្រឹមថ្ងៃអង្គារទី ១៧មិថុនា ក្រុមអ៊ីស្លាមជ្រុលនិយម ជីហាតបានខិតចូលទីក្រុងបាកដាត និងវាយយកបានច្រកត្រួតពិនិត្យថ្មីមួយ នៅព្រំដែនអ៊ីរ៉ាក់ និងស៊ីរី បន្ទាប់ពីវាយយកបានទីក្រុងធំទីពីរ របស់អ៊ីរ៉ាក់ កាលពីសប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
រដ្ឋាភិបាលទីក្រុងបាកដាតមិនខ្វះសំដី និងអំណះអំណាងដើម្បីចោទប្រកាន់អារ៉ាប៊ី សាអ៊ូឌីត។ នៅក្នុងសេចក្តីថ្លែងការណ៍ចេញផ្សាយដោយខុទ្ធការល័យរបស់នាយករដ្ឋមន្រ្តី កាលពីថ្ងៃអង្គារ បាកដាតបាននិយាយចោទ រដ្ឋាភិបាលអារ៉ាប៊ី សាអូឌីតចំៗថា បានចូលដៃ ចូលជើងជាមួយ ក្រុមភេរវករដែលកំពុងវាយប្រហារ ចូលដណ្តើមកាន់កាប់ទីក្រុងរបស់រដ្ឋាភិបាលអ៊ីរ៉ាក់។
តាមសេចក្តីថ្លែងការណ៍របស់រដ្ឋាភិបាលអ៊ីរ៉ាក់ អារ៉ាប៊ី សាអ៊ូឌីត ដែលជាប្រទេសជិតខាងរបស់អ៊ីរ៉ាក់ ជាអ្នកទទួលខុសត្រូវ ផ្តល់លុយកាក់ និងលើកទឹកចិត្តផ្នែកស្មារតី ដល់ក្រុមជីហាត។ កាលពីខែមីនាកន្លងទៅ លោកនាយករដ្ឋមន្រ្តីអ៊ីរ៉ាក់ នូរី អាល់ម៉ាលិគិធ្លាប់បានចោទអារ៉ាប៊ី សាអ៊ូឌីត និងកាតារម្តងហើយ ពីបទជួយគាំទ្រក្រុមភេរវជននៅក្នុងទឹកដីអ៊ីរ៉ាក់។
រដ្ឋាភិបាលអ៊ីរ៉ាក់ចេញមុខចោទប្រកាន់ទីក្រុងរីយ៉ាត នៅថ្ងៃអង្គារ បន្ទាប់ពីអារ៉ាប៊ី សាអ៊ូឌីតបានរិះគន់ដោយចំហរ រដ្ឋអំណាចក្រុងបាកដាត កាលពីថ្ងៃចន្ទដើមសប្តាហ៍នេះ។ តាមរដ្ឋាភិបាលអារ៉ាប៊ី សាអ៊ូឌីត រដ្ឋាភិបាលអ៊ីរ៉ាក់បច្ចុប្បន្នកំពុងរុញច្រានប្រទេសឲ្យធ្លាក់ចូលក្នុងភ្នក់ភ្លើងសង្រ្គាម ដោយអនុវត្តនយោបាយបោះបង់ចោលក្រុមមនុស្សមកពីនិកាយស៊ុននីត។ ដូច្នេះ ទីក្រុងរីយ៉ាតទាមទារឲ្យគេបង្កើតរដ្ឋាភិបាលអ៊ីរ៉ាក់ថ្មីមួយ ដែលអាចនាំឯកភាពជាតិ មិនប្រកាន់និកាយសាសនា សម្រាប់ប្រទេសអ៊ីរ៉ាក់។
ក្នុងរយៈពេលមិនដល់មួយសប្តាហ៍ ក្រុមជីហាត មកពីរដ្ឋអ៊ីស្លាមអ៊ីរ៉ាក់ និងឡឺវ៉ង់ ដែលធ្លាប់សកម្មប្រយុទ្ធនៅក្នុងទឹកដីស៊ីរី បានវាយចូលកាន់កាប់ទីក្រុង និងខេត្តសំខាន់ៗរបស់រដ្ឋាភិបាលអ៊ីរ៉ាក់ យ៉ាងតិចចំនួន ៦។ មន្រ្តីអាមេរិកធ្លាប់វាយតម្លៃថា ក្រុមជីហាតនេះធ្លាប់ទទួលលុយពីក្រុមឯកជនរបស់ប្រទេសអារ៉ាប់ នៅសមុទ្រពែរ្ស៍ ដើម្បីធ្វើការប្រយុទ្ធជាមួយក្រុមប្រឆាំង នៅក្នុងទឹកដីស៊ីរី ដើម្បីប្រយុទ្ធតទល់នឹងរដ្ឋាភិបាលបាស្ហា អាល់អាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ