សេណារីយោនៃដំណោះស្រាយអធិករណ៍នៅលីប៊ី
នៅក្នុងអធិករណ៍ដ៏ស្មុគស្មាញនិងដ៏សោកសង្រេងនៅប្រទេសលីប៊ី មកទល់ពេលនេះ គេកត់សម្គាល់ឃើញមានសេណារីយោបួនដែលអាចមកជួយរិះរកដំណោះស្រាយឲ្យអធិករណ៍នៅប្រទេសលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
សេណារីយោទាំងបួនដែលអាចមកជួយរិះរកដំណោះស្រាយឲ្យអធិករណ៍នៅប្រទេសលីប៊ីមាន៖
សេណារីយោទី១
ការដួលរលំនៃរបបផ្តាច់ការកាដាហ្វី
ប៉ុន្មានថ្ងៃក្រោយពីមានការវាយប្រហារយ៉ាងខ្លាំងក្លាពីសំណាក់ កងកម្លាំងសម្ព័ន្ធភាពនៃប្រទេសលោកខាងលិចទាំងប្រាំដែលក្នុងនោះមាន៖ ប្រទេសបារាំង ប្រទេសអង់គ្លេស សហរដ្ឋអាមេរិក ប្រទេសអ៊ីតាលី និងប្រទេសកាណាដា កងកម្លាំងស្មោះស្ម័គ្រនឹងមូអាម៉ារកាដាហ្វីស្រាប់តែបាក់ទ័ពរត់ទៅចូលជាមួយពួកអ្នកបះបោរ ហើយបាននាំគ្នាវាយយកទីក្រុងបានមួយម្តងៗ។ នៅទីបំផុត មេដឹកនាំផ្តាច់ការមូអាម៉ារកាដាហ្វីសម្រេចចិត្តលាចាកចេញពីមុខតំណែង។
សេណារីយោទី២
ដំណោះស្រាយបយោបាយ
សេណារីយោនេះនឹងអាចកើតមានទៅបាន លុះត្រាណាតែកងកម្លាំងស្មោះស្ម័គ្រនឹងមូអាម៉ារកាដាហ្វីបានត្រូវទទួលរងការវាយប្រហារតាមផ្លូវអាកាសយ៉ាងដំណំពីសំណាក់កងកម្លាំងសម្ព័ន្ធភាពនៃប្រទេសលោកខាងលិចទាំងប្រាំ រហូតដល់ទៅថ្នាក់បាក់ទ័ពរប៉ាត់រប៉ាយ។ នៅពេលនោះ កាដាហ្វីត្រូវបង្ខំចិត្តប្រកាសឈប់បាញ់គ្នាហើយសុំចរចា ដោយប្រកាសយល់ព្រមសាងផ្ទេរអំណាចដោយសន្តិវិធីឲ្យទៅក្រុមប្រឹក្សាជាតិអន្តរកាលដែលតំណាងក្រុមលីប៊ីបះបោរប្រឆាំង។
នៅក្នុងរយៈកាលនេះ ក្រុមប្រឹក្សាជាតិអន្តរកាលដែលតំណាងក្រុមលីប៊ីបះបោរប្រឆាំងអាចជួបនឹងបញ្ហាជាច្រើន។ ក៏ប៉ុន្តែប្រាក់ដ៏ច្រើនសន្ធឹកសន្ធាប់ដែលបានមកពីការលក់ប្រេងកាតហើយនិងជំនួយសព្វបែបយ៉ាងពីសំណាក់សហគមន៍អន្តរជាតិអាចជាជំនួយដ៏ឧត្តមសម្រាប់ក្រុមលីប៊ីបះបោរប្រឆាំងក្នុងការរិះរកដំណោះស្រាយ។
សេណារីយោទី៣
សង្គ្រាមរ៉ាំរ៉ៃ
នៅខណៈពេលដែលការវាយប្រហារតាមផ្លូវអាកាសនៃកងកម្លាំងសម្ព័ន្ធភាពនៃប្រទេសលោកខាងលិចទាំងប្រាំពុំបានធ្វើឲ្យកងកម្លាំងស្មោះស្ម័គ្រនឹងមូអាម៉ារកាដាហ្វីបាក់ទ័ពបរាជ័យ កងកម្លាំងនៃក្រុមលីប៊ីបះបោរប្រឆាំងដែលខ្វះការពិសោធន៍គ្រប់គ្រាន់នៅលើសមរភូមិក៏គ្មានលទ្ធភាពនឹងយកជ័យជំនះលើកងកម្លាំងស្មោះស្ម័គ្រនឹងមូអាម៉ារកាដាហ្វីបាន។ ដូច្នេះ សង្គ្រាមរវាងគូបដិបក្សក៏នឹងក្លាយទៅជាសង្គ្រាមរ៉ាំរ៉ៃដែលជាកត្តាមួយគំរាមដល់ឯកភាពនៃប្រទេសជាតិ។
សេណារីយោទី៤
សង្គ្រាមប្តូរផ្តាច់
សេណារីយោទី៤នៃសង្គ្រាមប្តូរផ្តាច់នេះនឹងអាចកើតមាននៅខណៈពេលដែលមេដឹកនាំផ្តាច់ការមូអាម៉ារកាដាហ្វីបានវាយបង្ក្រាបនិងវាយដណ្តើមយកបានទីក្រុងដែលកាន់កាប់ដោយក្រុមបះបោរលីប៊ី ទោះបីជាមានការគាំទ្រយ៉ាងខ្លាំងក្លាពីសំណាក់សហគមន៍អន្តរជាតិក៏ដោយ។
គឺសេណារីយោនេះហើយដែលបានបណ្តាលឲ្យកូនប្រុសរបស់កាដាហ្វីឈ្មោះSaïf al-Islam ថ្លែងប្រកាសថា “ស្លាប់ឬរស់ដើម្បីលីប៊ី”។ របបគ្រប់គ្រងរបស់កាដាហ្វីបានត្រូវការពារដោយទាហានប្រមាណ២០ ០០០នាក់ហើយនិងឆ្មាំបដិវត្តន៍ប្រមាណ៣០ ០០០នាក់។
ពិតមែនតែសេចក្តីសម្រចចិត្ត១៩៧៣របស់អ ស ប បានហាមឃាត់កុំឲ្យដាក់ទ័ពអន្តរជាតិនៅលើដែនដីលីប៊ី ក៏ប៉ុន្តែអ ស ប អាចនឹងចេញសេចក្តីសម្រេចចិត្តមួយថ្មីទៀតដើម្បីអនុញ្ញាតឲ្យមានលទ្ធភាពដាក់ទ័ពអន្តរជាតិនៅប្រទេសលីប៊ីក្នុងបំណងផ្តួលរំលំរបបផ្តាច់ការកាដាហ្វីដែលបានវាយបង្ក្រាបប្រជាពលរដ្ឋស្លូតត្រង់របស់ខ្លួនយ៉ាងហិង្សា។ ទាំងនេះហើយដែលធ្វើឲ្យគេបារម្ភខ្លាចកើតមានសេណារីយោសង្គ្រាមរ៉ាំរ៉ៃដូចនៅប្រទេសអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ