រដ្ឋធម្មនុញ្ញថ្មីអេហ្ស៊ីប បានចូលជាផ្លូវការ
នៅប្រទេសអេហ្ស៊ីប ប្រធានាធិបតីមរស៊ី ផ្តល់សច្ចាប័នលើរដ្ឋធម្មនុញ្ញថ្មីជាផ្លូវការ កាលពី ល្ងាចថ្ងៃអង្គារម្សិលមិញ ជាមួយនឹងជោគជ័យជិត ៦៤ភាគរយ នៃការបោះឆ្នោតប្រជាមតិ ដណ្តើមបានដោយគណបក្សកាន់អំណាច។ រដ្ឋធម្មនុញ្ញថ្មីនេះ ឆ្លើយតបនឹងការប្រកាស របស់គណបក្សកាន់អំណាច កាលពីចុងសប្តាហ៍កន្លងទៅ ប៉ុន្តែគេសង្កេតឃើញថា ក្នុងចំណោមអ្នកចុះឈ្មោះបោះឆ្នោតសរុប អ្នកដែលមកបោះឆ្នោតពិតប្រាកដ មានតែ ៣៣ភាគរយប៉ុណ្ណោះ។ លើសពីនេះ គណកម្មការបោះឆ្នោតអេហ្ស៊ីប បានច្រានចោលនូវ បណ្តឹងរាប់ពាន់ទាក់ទងនឹង ភាពមិនប្រក្រតីនៃដំណើរការបោះឆ្នោត ដោយថ្លែងថា ភាពមិនប្រក្រតីមិនមានអ្វីជាធំដុំ ហើយបណ្តឹងទាំងអស់នេះ គ្មានមូលដ្ឋានអ្វីច្បាស់លាស់សោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
រដ្ឋធម្មនុញ្ញថ្មីរបស់អេហ្ស៊ីប បានចូលជាផ្លូវការ កាលពីល្ងាចថ្ងៃអង្គារម្សិលមិញ បានបង្កអោយមានការខឹងសម្បារខ្លាំង នៅក្នុងប្រទេស។ យុវជនអេហ្ស៊ីប បានដុតកង់ឡាន បង្កអោយស្ទះចរាចរប្រហែលជា កន្លះម៉ោង នៅលើស្ពានមួយ ដែលភ្ជាប់ ភាគខាងកើតទីក្រុងគែរ ទៅកាន់សង្កាត់នានាផ្សេងទៀត នៅភាគខាងលិច។
ក្រៅពីគណបក្សប្រឆាំង អង្គការក្រៅរដ្ឋាភិបាលនានា ដែលចូលរួមសង្កេតការបោះឆ្នោតប្រជាមតិកន្លងមក ក៏មិនទទួលស្គាល់លទ្ធផលនៃការបោះឆ្នោត និងរដ្ឋធម្មនុញ្ញថ្មីរបស់អេហ្ស៊ីបផងដែរ ដោយសារតែ អ្នកមកបោះឆ្នោត មានតែ ៣៣ភាគរយប៉ុណ្ណោះ ក្នុងចំណោមអ្នកចុះឈ្មោះបោះឆ្នោតសរុប ៥១លាននាក់។ អង្គការក្រៅរដ្ឋាភិបាលទាំងនេះ បានចោទថា ការបោះឆ្នោតកន្លងមក ខ្វះនូវតម្លាភាព ហើយបានប្រកាសថា ខ្លួននឹងស្វែងរកគ្រប់មធ្យោបាយ ស្របទៅតាមផ្លូវច្បាប់ ដើម្បីធ្វើអោយរដ្ឋធម្មនុញ្ញថ្មីនេះ ត្រូវលុបចោលជាផ្លូវការវិញ។
ផ្ទុយទៅវិញ គណកម្មការបោះឆ្នោតអេហ្ស៊ីប ដែលបានច្រានចោលនូវ បណ្តឹងរាប់ពាន់ទាក់ទងនឹង ភាពមិនប្រក្រតីនៃដំណើរការបោះឆ្នោត បានឆ្លើយពន្យល់វិញថា ខ្លួនក៏បានច្រានចោល នូវលទ្ធផលបោះឆ្នោតមួយចំនួន ដែលមានភាពក្លែងបន្លំផងដែរ។
ធម្មនុញ្ញថ្មីដែលចងក្រងដោយ គណបក្សកាន់អំណាចអ៊ីស្លាម គឺជាធម្មនុញ្ញដំបូងក្នុងប្រទេស បន្ទាប់ពីការទំលាក់អតីត ប្រធានាធិបតី អូស្ន៊ី មូបារ៉ាក់ ចេញពីអំណាចកាលពីឆ្នាំ ២០១១។ ក្រុមប្រឹក្សាធម្មនុញ្ញថ្មី អេហ្ស៊ីប ដែលមានសមាជិកភាគច្រើន ជាអ៊ីស្លាមជ្រុលនិយម នឹងរៀបចំនូវការបោះឆ្នោតសភា ក្នុងពីរខែខាងមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ