គណបក្សកាន់អំណាចប្រកាសថាខ្លួនទទួលជោគជ័យក្នុងការបោះឆ្នោតប្រជាមតិ
នៅប្រទេសអេហ្ស៊ីប គណបក្សកាន់អំណាចបាន ប្រកាសយ៉ាងរហន់ តាំងពីព្រឹកថ្ងៃអាទិត្យនេះរួចទៅហើយថា ខ្លួនគឺជាអ្នកឈ្នះក្នុងការបោះឆ្នោតប្រជាមតិ លើកទីពីរដែលបានប្រព្រិត្តិទៅ កាលពីថ្ងៃសៅរ៍ម្សិលមិញ ដោយទទួលបានសន្លឹកឆ្នោត ៦៤ភាគរយ។ ដោយឡែក លទ្ធផលបោះឆ្នោត នឹងប្រកាសជាផ្លូវការ នៅថ្ងៃចន្ទស្អែក ដើម្បីសំរេចថា តើគំរោងធម្មនុញ្ញដែល ដាក់ស្នើដោយ ប្រធានាធិបតីអ៊ីស្លាម មរស៊ី នឹងត្រូវអនុម័តដែររឺទេ។ទោះយ៉ាងណា គំរោងធម្មនុញ្ញរបស់លោក មរស៊ី ប្រហែលជានឹងត្រូវអនុម័ត នៅថ្ងៃចន្ទស្អែក ជាមួយនឹងលទ្ធផល ៦៤ភាគរយ ដែលគណបក្សកាន់អំណាច ដណ្តើមបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
កាលពីថ្ងៃសៅរ៍ម្សិលមិញ ប្រជាជនអេហ្ស៊ីប ២៦លាននាក់ បាននាំគ្នាទៅបោះឆ្នោតប្រជាមតិ លើកទីពីរ លើគំរោងធម្មនុញ្ញរបស់ ប្រធានាធិបតី មរស៊ី។ ការបោះឆ្នោត បានប្រព្រិត្តិទៅ ដោយគ្មានអំពើហិង្សា ប៉ុន្តែ គណបក្សប្រឆាំង នៅតែបរិហារថា ដំណើរការបោះឆ្នោតនៅតែមានភាព មិនប្រក្រតី។
តាំងតែពីព្រឹកថ្ងៃអាទិត្យនេះ គណបក្សកាន់អំណាចអេហ្ស៊ីប បានប្រកាសរួចទៅហើយថា ខ្លួនជាអ្នកឈ្នះ ក្នុងការបោះឆ្នោតនេះ ហើយគំរោងធម្មនុញ្ញរបស់ ប្រធានាធិបតី មរស៊ី នឹងត្រូវអនុម័ត ជាមួយនឹងសម្លេងឆ្នោត ៦៤ភាគរយ ដែលខ្លួនដណ្តើមបាន។
កាលពីដំបូងឡើយ គណបក្សកាន់អំណាចអេហ្ស៊ីបប្រកាសថា ប្រជាជននឹងបោះឆ្នោតអោយខ្លួន បានជោគជ័យ ៨០ភាគរយ ប៉ុន្តែយោងតាមលទ្ធផលបណ្តោះជាអាសន្ន តួលេខនេះធ្លាក់មកនៅត្រឹមតែ ៦៤ ភាគរយប៉ុណ្ណោះ។ វាជាការខកចិត្ត សំរាប់គណបក្សកាន់អំណាច ព្រោះលទ្ធផលនេះ មិនបានឡើងទៅដល់ ៦៦ភាគរយ មានន័យថា អ្នកបោះឆ្នោត ដែលគាំទ្រគណបក្សកាន់អំណាច មានមិនដល់ពីរភាគបី នៃអ្នកបោះឆ្នោតសរុបឡើយ។
ទោះយ៉ាងណា គំរោងធម្មនុញ្ញរបស់លោក មរស៊ី ប្រហែលជានឹងត្រូវអនុម័ត នៅថ្ងៃចន្ទស្អែក នៅពេលដែលគណកម្មការបោះឆ្នោត ប្រកាសលទ្ធផល នៃការបោះឆ្នោត ជាមួយនឹងជោគជ័យ ៦៤ភាគរយ ដែលគណបក្សកាន់អំណាច ដណ្តើមបាន។
ការអនុម័ត គំរោងធម្មនុញ្ញរបស់លោក មរស៊ី ប្រហែលមិនអាចជួយអោយស្ថានភាពនយោបាយអេហ្ស៊ីប មានភាពនឹងនរ ដូចជាការស្មានទុករបស់ប្រធានាធិបតី នោះឡើយ។
លទ្ធផលនៃការបោះឆ្នោតប្រជាមតិជិត៤០ ភាគរយ ដែលទទួលបានដោយ គណបក្សប្រឆាំង បានបង្ហាញច្បាស់ ថា ប្រជាជន ៤០ភាគរយ អេហ្ស៊ីបច្រានចោលនូវគំរោងធម្មនុញ្ញរបស់ប្រធានាធិបតី ដែលធ្វើអោយ ប្រទេសអេហ្ស៊ីប នៅតែបែងចែកជាពីរបក្សពួកដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ