ទស្សនកិច្ចគួរអោយភ្ញាក់ផ្អើលរបស់លោកបាន គីមូន នៅអាហ្វ្រិកកណ្តាល
នៅថ្ងៃសៅរ៍នេះ អគ្គលេខាធិការអង្គការសហប្រជាជាតិ បាន គីមូន បានចុះទៅបំពេញទស្សនកិច្ចនៅក្រុងបង់ហ្គី សាធារណរដ្ឋអាហ្វ្រិកកណ្តាល ដើម្បីគូសបញ្ជាក់ពីជំហរម៉ឹងម៉ាត់របស់អង្គការសហប្រជាជាតិក្នុងការពង្រាយកងទ័ពការពារសន្តិភាព នៅប្រទេសនេះ នៅមុនដំណាច់ឆ្នាំ២០១៤។ ដោយសារអំពើហិង្សាក្នុងស្រុកនៅតែកើតមានឥតឈប់ឈរ លោកបាន គីមូន ខ្លាចមានការសម្លាប់រង្គាលនៅអាហ្វ្រិកកណ្តាល ដូចជានៅរវ៉ាន់ដាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅថ្ងៃសៅរ៍នេះ ប្រធានាធិបតីអន្តរកាលអាហ្វ្រិកកណ្តាល លោកស្រី កាធ្រីន សាំបា ប៉ាន់ហ្សា បានទៅទទួលលោកបាន គីមូន ដល់អាកាសយានដ្ឋានក្រុងបង់ហ្គី។ អគ្គលេខាធិការអង្គការសហប្រជាជាតិត្រូវធ្វើដំណើរទៅក្រុងគីហ្កាលី ប្រទេសរវ៉ាន់ដា ដើម្បីចូលរួមខួបទី២០នៃការសម្លាប់រង្គាលនៅរវ៉ាន់ដា។ ប៉ុន្តែ លោកបាន គីមូន បានឆ្លៀតចូលទៅអាហ្វ្រិកកណ្តាល ដើម្បីបង្ហាញពីជំហរម៉ឹងម៉ាត់របស់អង្គការសហប្រជាជាតិ ក្នុងការដាក់ពង្រាយកងកម្លាំងការពារសន្តិភាព១ម៉ឺន២ពាន់នាក់ នៅអាហ្វ្រិកកណ្តាល មុនដំណាច់ឆ្នាំ២០១៤នេះ។
ប្រតិបត្តិការការពារសន្តិភាពនេះត្រូវធ្វើបន្តពីប្រតិបត្តិការសង់ហ្ការីរបស់កងទ័ពបារាំង និងប្រតិបត្តិការមីស្ការបស់កងកម្លាំងចម្រុះអាហ្វ្រិក។ ប្រទេសឆាដទើបតែបានប្រកាសដកទ័ពខ្លួនចេញពីប្រតិបត្តិការមីស្កានេះ កាលពីថ្ងៃព្រហស្បតិ៍ ដោយសារពាក់ព័ន្ធនឹងការចោទប្រកាន់ថា ទាហានឆាដបានបាញ់ប្រហារហ្វូងមនុស្សដោយឥតរើសមុខ ធ្វើអោយមនុស្សស្លាប់៣០នាក់ កាលពីថ្ងៃ២៩មីនា។
នៅចំពោះមុខអំពើហិង្សាសហគមន៍ និងសាសនាដែលកើតមានជាប្រចាំ នៅអាហ្វ្រិកកណ្តាល លោកបាន គីមូន បារម្ភថា អាហ្វ្រិកកណ្តាលអាចធ្លាក់ក្នុងហេតុការណ៍សម្លាប់រង្គាលដូចជានៅរវ៉ាន់ដាដែរ។ តាមធម្មតា នៅថ្ងៃសៅរ៍នេះ លោក បាន គីមូន ជជែកជាមួយប្រធានាធិបតីអន្តរកាលអាហ្វ្រិកកណ្តាល លោកស្រីប៉ាន់ហ្សា ដើម្បីរកធម្យោបាយបិទបញ្ចប់អំពើហិង្សាទាំងអស់នេះ។
គួររំលឹកថា អំពើហិង្សាអាហ្វ្រិកកណ្តាល កើតមានជាប្រចាំ ចាប់ពីពេលដែលអតីតក្រុមឧទ្ទាមអ៊ីស្លាមសេឡេកា បានទំលាក់ប្រធានាធិបតីហ្វ្រង់ស៊័រ បូស៊ីសេ នៅខែមិនា ឆ្នាំ២០១៣។ ជាអំពើហិង្សារវាងអ្នកកាន់សាសនាអ៊ីស្លាម និងអ្នកកាន់គ្រិស្តសាសនា។ នៅអាហ្វ្រិកកណ្តាល ប្រជាជន ប្រមាណជា៨០ភាគរយជាអ្នកកាន់គ្រិស្តសាសនា។
ក្នុងជំនួបកំពូលអឺរ៉ុប-អាហ្វ្រិកកាលពីថ្ងៃពុធកន្លងមក លោកបាន គីមូន ធ្លាប់បានជំរុញសហគមន៍អន្តរជាតិអោយបញ្ជូនទ័ពបន្ថែម និងផ្តល់មូលនិធិជួយប្រទេសអាហ្វ្រិកមួយនេះ។
កាលពីខែមិនា អគ្គលេខាធិការអង្គការសហប្រជាជាតិក៏ធ្លាប់បានបង្ហាញពីគំរោងប្រតិបត្តិការ ជួយរៀបចំរដ្ឋនិងរដ្ឋបាលអាហ្វ្រិកកណ្តាល អោយបានក្នុងកម្រិតអប្បបរមាផងដែរ បែបយ៉ាងដាក់អោយមានប៉ូលិសពង្រឹងសន្តិសុខ សណ្តាប់ធ្នាប់ ជាជាងធ្វើការបណ្តេញជនជ្រុលនិយម ដូចធ្លាប់ធ្វើនៅម៉ាលី ក្នុងពេលកន្លងមក។ ក្នុងគំរោងនោះ លោកបាន គីមូនក៏ចង់អោយរៀបចំផ្នែកស៊ីវិល ធានាអោយអាហ្វ្រិកកណ្តាលអាចរៀបចំការបោះឆ្នោតនៅដើមឆ្នាំ២០១៥ផងដែរ។ ប៉ុន្តែ ប្រទេសមួយចំនួនតែងញញើតនឹងទទួលយកគំរោងនេះ ព្រោះថា ថវិកាដែលត្រូវចាយវាយ គឺមានច្រើនលើសលុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ