អាល្លឺម៉ង់អរគុណហ្វីលីពីនដែលបានប្រឹងប្រែងជួយដោះលែងចំណាប់ខ្មំាងពីដៃ Abu Sayyaf
ចំណាប់ខ្មំាងជនជាតិអាល្លឺម៉ង់ចំនួន ២នាក់ដែលចលនា Abu Sayyaf បានចាប់តំាងពី ៦ខែមុន និងដែលទើបបានដោះលែងឲ្យរួចខ្លួនវិញនោះ ត្រូវបានរដ្ឋអំណាចប្រទេសហ្វីលីពីនប្រគល់ទៅឲ្យស្ថានទូតអាល្លឺម៉ង់ប្រចំាទីក្រុងម៉ានីលនៅរសៀលថ្ងៃសៅរ៍ ទី១៨ តុលាម្សិលមិញ នេះបើតាមការបញ្ជាក់របស់អ្នកទទួលខុសត្រូវយោធាហ្វីលីពីនម្នាក់។ រហូតមកដល់ពេលនេះ ពួកឧទ្ទាមបានប្រកាសពីការទទួលលុយ ជាថ្នូរនឹងការដោះលែង តែនៅមិនទាន់មានប្រភពណាមួយហ៊ានបញ្ជាក់នៅឡើយទេ។ យ៉ាងណាក៏ដោយ រដ្ឋាភិបាលអាល្លឺម៉ង់បានអរគុណរដ្ឋាភិបាលហ្វីលីពីនដែលបានប្រឹងប្រែងជួយដោះលែងចំណាប់ខ្មំាងពីកណ្តាប់ដៃ Abu Sayyaf។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
អ្វីដែលកំពុងបន្តស្រពិចស្រពិលនៅក្នុងការដោះលែងចំណាប់ខ្មំាងជនជាតិអាល្លឺម៉ង់ពីពួក Abu sayyaf នោះនៅត្រង់ថា តើចលនាឧទ្ទាមមួយនេះមានបានទទួលលុយគ្រប់ចំនួនដូចដែលពួកគេបានទាមទារឬអត់។ គួររម្លឹកជូនថា គូ ស្រករជនជាតិអាល្លឺម៉ង់ទំាងពីរនាក់ដែលបុរសមានអាយុ ៧៤ឆ្នំា ជាគ្រូពេទ្យ និងស្រ្តីមានអាយុ ៥៥ឆ្នំាត្រូវបានពួក Abu Sayyaf ចាប់កាលពីថ្ងៃទី២៥ មេសាកន្លងទៅនៅពេលដែលអ្នកទំាងពីរកំពុងជិះកាណូតដើរលេងក្បែរកោះប៉ាឡាកានស្ថិតប៉ែកខាងលិចប្រទេសហ្វីលីពីន។ បន្ទាប់ពីចាប់រួចហើយ ចលនាឧទ្ទាមដែលបានប្រដូចខ្លួនទៅនឹងក្រុមរដ្ឋអ៊ីស្លាមមួយនេះបានទាមទារឲ្យរដ្ឋាភិបាលអាល្លឺម៉ង់បញ្ឈប់ការចូលរួមជាមួយបស្ចិមលោកដើម្បីវាយប្រហារពួកជីហាតនៅក្នុងប្រទេសស៊ីរី និងអ៊ីរ៉ាក់ ព្រមទំាងទារលុយចំនួន ៥លាន ៦សែនដុល្លារជាថ្នូរនឹងការដោះលែងចំណាប់ខ្មំាងទំាងពីរនាក់។ ពួក Abu Sayyaf បានទុកពេលរហូតដល់ថ្ងៃសុក្រ ទី១៧ តុលាដោយគំរាមសម្លាប់ចំណាប់ថ្នូរម្នាក់ បើទីក្រុងប៊ែរឡំាងមិនធ្វើតាមសំណូមពររបស់គេទេនោះ។
គឺនៅថ្ងៃសុក្រដដែលនោះដែលអ្នកនំាពាក្យរបស់ចលនា Abu Sayyaf បានប្រកាសបញ្ជាក់ពីដោះលែងចំណាប់ខ្មំាងអាល្លឺម៉ង់ទំាងពីរនាក់ និងថា ពួកគេបានទទួលអ្វីដូចដែលបានទាមទាររួចហើយ។ តែលោកប្រមុខកងទ័ពហ្វីលីពីនបានបញ្ជាក់ផ្ទុយវិញថា រដ្ឋាភិបាលមិនដែលចរចាជាមួយពួកភេរវជន និងថា លោកគ្មានព័ត៌មានណាមួយទាក់ទងនឹងការបង់លុយជាថ្នូរនឹងការដោះលែងនោះទេ។ ដោយឡែក មន្រ្តីក្រសួងស៊ើបការសម្ងាត់ហ្វីលីពីនម្នាក់ចូលនិវត្តន៍បានអះអាងច្បាស់ៗថា ពួក Abu Sayyaf មិនដែលដោះលែងចំណាប់ខ្មំាងដោយទទេៗ មិនបានលុយនោះឡើយ និងថា លោកមានការសោកស្តាយ ព្រោះវាជាទង្វើដែលបន្តលើកទឹកចិត្តពួកនេះឲ្យចាប់មនុស្សទារលុយដើម្បីយកទៅទិញអាវុធក្នុងគោលដៅពង្រឹងកម្លំាងរបស់ពួកគេ។
គួររម្លឹកជូនថា ចលនា Abu Sayyaf នៅហ្វីលីពីនមានជំនាញខាងចាប់មនុស្សទារលុយ ព្រមទំាងជាចលនាដែលអាមេរិក និងហ្វីលីពីនដាក់បញ្ចូលក្នុងបញ្ជីខ្មៅក្នុងក្រុមភេរវនិយមដែរ។ សព្វថ្ងៃ និងបើយោងតាមកងទ័ពហ្វីលីពីន Abu sayyaf កំពុងឃុំខ្លួនចំណាប់ថ្នូរ ១៣នាក់ទៀត ក្នុងនោះមាន ៥នាក់ជាជនបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ