លោកអូបាម៉ាចុះហត្ថលេខាលើក្រឹត្យដាក់ទ័ណ្ឌកម្មថ្មីលើកូរ៉េខាងជើង
នៅសហរដ្ឋអាមេរិក លោកប្រធានាធិបតីអូបាម៉ាបានចុះហត្ថលេខានៅថ្ងៃពុធ ទី១៦ មីនាលើក្រឹត្យមួយអនុញ្ញាតឲ្យមានការដាក់ទ័ណ្ឌកម្មថ្មីលើកូរ៉េខាងជើង។ គម្រោងដាក់ទ័ណ្ឌកម្មថ្មីរបស់អាមេរិកបានធ្វើឡើង ចុះពេលដែលក្រុងព្យុងយ៉ាងបន្តយកនុយក្លេអ៊ែរទៅគំរាមសហគមន៍អន្តរជាតិ និងចំពេលដែលមានពលរដ្ឋអាមរិកម្នាក់កំពុងជាប់ឃុំក្នុងទឹកដីកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ទ័ណ្ឌកម្មថ្មីរបស់អាមេរិកដាក់លើកូរ៉េខាងជើង និងដែលមានការយល់ព្រមពីអង្គការសហប្រជាជាតិបានសំដៅលើវិស័យថាមពល ហិរញ្ញវត្ថុ និងការដឹកជញ្ជូនផ្លូវសមុទ្រ នេះបើតាមការបញ្ជាក់របស់សេតវិមាន។ តែក្រឹត្យដែលទើបចុះហត្ថលេខាដោយលោកប្រធានាធិបតីអាមេរិកបារ៉ាក់ អូបាម៉ាបានបញ្ជាក់ច្បាស់ៗថា ទ័ណ្ឌកម្មថ្មីទាំងអស់នេះមិនមែនដាក់សំដៅលើពលរដ្ឋកូរ៉េខាងជើងទេ តែសំដៅរដ្ឋាភិបាល។
នាខែមីនាកន្លងទៅ ក្រុមប្រឹក្សាសន្តិសុខអង្គការសហប្រជាជាតិបានដាក់ទ័ណ្ឌកម្មថ្មីមួយចំនួនលើកូរ៉េខាងជើង បន្ទាប់ពីក្រុងព្យុងយ៉ាងបានធ្វើការសាកល្បងនុយក្លេអ៊ែរ និងបាញ់គ្រាប់មីស៊ីលអន្តរទ្វីប។ ចាប់ពីពេលនេះតទៅ ប្រទេសសមាជិកអង្គការសហប្រជាជាតិទាំងអស់មានតួនាទីត្រួតពិនិត្យលើគ្រប់ទំនិញដែលដឹកចេញ និងដឹកចូលពីកូរ៉េខាងជើង។ នៅពាក់កណ្តាលខែកុម្ភៈកន្លងទៅ ទីក្រុងវ៉ាស៊ីតោនក៏ធ្លាប់បានចាត់វិធានការដាច់ដោយឡែករបស់ខ្លួនមួយចំនួន។
នៅក្នុងវិធានការដាក់ទ័ណ្ឌកម្មថ្មីលើកូរ៉េខាងជើងរបស់អាមេរិកពេលនេះ សេតវិមានបានសំដៅជាពិសេសលើស្ថាប័នឃោសនារបស់គណបក្សពលករកូរ៉េខាងជើង និងក្រុមហ៊ុនរ៉ែនានាដែលជាប្រភពចំណូលលុយកាក់របស់រដ្ឋាភិបាលក្រុងព្យុងយ៉ាង។ យោងតាមក្រសួងសេដ្ឋកិច្ចអាមេរិក ចំណូលបានមកពីក្រុមហ៊ុនរ៉ែមានទឹកប្រាក់ដល់ទៅ ១ ០០០លានដុល្លារក្នុងមួយឆ្នាំៗ។
ស្របនឹងការដាក់ទ័ណ្ឌកម្មថ្មីលើកូរ៉េខាងជើង សេតវិមានក៏បានអំពាវនាវឲ្យក្រុងព្យុងយ៉ាងលើលែងទោស និងដោះលែងនិស្សិតជនជាតិអាមេរិកាំងម្នាក់ដែលត្រូវបានតុលាការកូរ៉េខាងជើងកាត់ទោសដាក់គុកចំនួន ១៥ឆ្នាំ និងបង្ខំឲ្យធ្វើការជាទម្ងន់នាថ្ងៃពុធ ទី១៦ មីនា។ អ្នកនាំពាក្យរដ្ឋបាលអាមរិកាំងបានចាត់ទុកទង្វើផ្តន្ទាទោសជនជាតិអាមេរិកថាមានលក្ខណៈនយោបាយសុទ្ធសាធ និងបានអំពាវនាវកុំឲ្យពលរដ្ឋអាមរិកធ្វើដំណើរទៅកាន់ទឹកដីកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ