ប្រទេសវ៉េណេស៊ុយអេឡាកំពុងស្គាល់ស្ថានភាពសេដ្ឋកិច្ចត្រដរខ្យល់
ការធ្លាក់តម្លៃប្រេងឆៅនៅលើទីផ្សារអន្តរជាតិបាន និងកំពុងធ្វើឲ្យវ៉េណេស៊ុយអេឡាដែលជាប្រទេសជ្រុកប្រេងឆៅជួបការលំបាកយ៉ាងខ្លំាង។ ជាមួយនឹងតម្លៃប្រេងឆៅធ្លាក់ថ្លៃបានធ្វើឲ្យរដ្ឋាភិបាលរបស់លោកប្រធានាធិបតីនីកូឡា ម៉ាឌុយរ៉ូបាត់បង់ចំណូលដល់ទៅ ៥០%។ គឺនៅក្នុងន័យនេះហើយបានជាលោកនីកូឡា ម៉ាឌុយរ៉ូបាន និងកំពុងចាត់វិធានការគ្រប់បែបយ៉ាងដើម្បីស្វែងរកថវិកាទៅបំពេញបន្ថែម។ តែក្រុមអ្នកវិភាគបានមើលឃើញថា វិធានការដែលលោកនីកូឡា ម៉ាឌុយរ៉ូកំពុងធ្វើនេះ គឺមិនចំគោលដៅដើម្បីអាចជួយស្រោចស្រង់សេដ្ឋកិច្ចឡើងវិញទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
វិធានការដែលលោកនីកូឡា ម៉ាឌុយរ៉ូកំពុងអនុវត្តន៍ពេលនេះត្រូវបានក្រុមអ្នកជំនាញហៅថា ជាការចង ក សម្លាប់ខ្លួនឯង ពោលមិនមែនជាចំណាត់ការដើម្បីជួយស្រោចស្រង់សេដ្ឋកិច្ចដែលកំពុងត្រដរខ្យល់នោះទេ។ អំណះអំណាងរបស់ក្រុមអ្នកជំនាញរបៀបនេះក៏ដោយសារថានារយៈពេលប៉ុន្មានខែចុងក្រោយនេះ លោកម៉ាឌុយរ៉ូបានយល់ព្រមកាត់បន្ថយប្រាក់បំណុលរបស់ប្រទេសមួយចំនួនដែលជំពាក់វ៉េណេស៊ុយអេឡាថ្លៃប្រេង តែត្រូវគោរពលក្ខខណ្ឌមួយ គឺប្រទេសទំាងនោះត្រូវតែសុខចិត្តសងប្រាក់ដែលនៅសល់ភ្លាមៗ។ វិធានការរបៀបនេះបានធ្វើឲ្យវ៉េណេស៊ុយអេឡាបាត់បង់ចំណូលចំនួន ២ ០០០លានដុល្លារពីប្រទេសហ្សាម៉ាអ៊ីក និង ១ ៥០០លានដុល្លារពីសាធារណរដ្ឋដូមីនីក។
ទន្ទឹមនឹងវិធានការបន្ធូរបន្ធយប្រាក់បំណុលដែលអ្នកផ្សេងជំពាក់ លោកនីកូឡា ម៉ាឌុយរ៉ូក៏បានសម្រេចប្រើលុយបម្រុងរបស់រដ្ឋចំនួន ១ ៥០០លានដុល្លារ ព្រមទំាងចរចាខ្ចីលុយចំនួន ២ ៥០០លានដុល្លារពីក្រុមហ៊ុន Citgo ដែលជាសាខារបស់ក្រុមហ៊ុនចម្រាញ់ប្រេងកាតនៅសហរដ្ឋអាមេរិក។ គឺក្រុមហ៊ុន Citgo នោះឯងដែលជាប្រភពចំណូលទី១ របស់វ៉េណេស៊ុយអេឡា។ តែគេត្រូវហ៊ានទទួលស្គាល់ថា តំាងពីតម្លៃប្រេងឆៅនៅលើទីផ្សារអន្តរជាតិធ្លាក់ថ្លៃមក ប្រទេសជង្រុកប្រេងមួយនេះកំពុងមានស្ថានភាពសេដ្ឋកិច្ចយ៉ាងត្រដាបត្រដួស។
វ៉េណាស៊ុយអេឡាកំពុងប្រឈមមុខនឹងអត្រាអតិផរណាជាង ១០០% ហើយផលិតសរុបក្នុងស្រុកនឹងធ្លាក់ចុះ ៧% ក្នុងឆ្នំា ២០១៥ នេះបើយោងតាមអង្គការមូលនិធិរូបិយវត្ថុអន្តរជាតិ។ មួយវិញទៀតនៅចំពោះមុខ ប្រជាពលរដ្ឋកំពុងជួបប្រទះកង្វះខាតសម្ភារៈ ថ្នំាសង្កូវ និងគ្រឿងឧបភោគបរិភោគ។ នេះក៏ដោយសារតែការនំាចូលបានកាត់បន្ថយអស់ពាក់កណ្តាលតំាងពីឆ្នំា ២០១៣។ តែទោះជាយ៉ាងនេះក្តី រដ្ឋាភិបាលនៅបន្តចាយវាយហ៊ឺហារដោយមិនបន្ធូរដៃទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ