ពិភពលោកជួបជុំគ្នានៅម៉ុងត៍រ៉េអាល់ ដើម្បីរកថវិកាប្រយុទ្ធនឹងជំងឺស៊ីដា របេងនិង គ្រុនចាញ់
មូលនិធិពិភពលោក ប្រយុទ្ធប្រឆាំងនឹងជំងឺស៊ីដា ជំងឺរបេង និងជំងឺគ្រុនចាញ់ បានបើកការប្រជុំ៣ឆ្នាំម្តងរបស់ខ្លួន នៅក្រុងម៉ុងត៍រ៉េអាល់ ប្រទេសកាណាដា ក្រោមវត្តមានរបស់លោក Justin Trudeau នាយករដ្ឋមន្ត្រីកាណាដា។ កម្មវត្ថុនៃអង្គសន្និសីទនេះ គឺដើម្បីប្រមូលថវិកា ឲ្យបានយ៉ាងហោចណាស់ ១៣ពាន់លានដុល្លារ ទុកប្រើប្រាស់រយៈពេល៣ឆ្នាំ ក្នុងដំណើរការយុទ្ធនាការ កម្ចាត់ការឆ្លងមេរោគអេដស៍ ជំងឺរបេង និងជំងឺគ្រុនចាញ់ នៅទូទាំងសកលលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
“ការតស៊ូប្រយុទ្ធ នៅមិនទាន់ចប់ទេ”។ នេះគឺជាសំដីរបស់លោក Justin Trudeau នាយករដ្ឋមន្ត្រីកាណាដា កាលពីថ្ងៃសុក្រ ទី១៦កញ្ញា ក្នុងឱកាសបើកសន្និសីទស្វែងរកមូលនិធិដើម្បីប្រយុទ្ធនឹងជំងឺស៊ីដា ជំងឺរបេង និងជំងឺគ្រុនចាញ់។ លោកបន្តថា ការជឿនលឿនទៅមុខ ក្នុងការទប់ស្កាត់ការឆ្លងរាលដាលនៃជំងឺទាំងនេះ បានឈានឡើងច្រើនណាស់ តែនៅមានដំណាក់កាលច្រើនថែមទៀត ដែលគ្រប់គ្នាត្រូវប្រឹងប្រែង ដើម្បីឈានទៅកម្ចាត់ជំងឺឆ្លងទាំងនេះ ឲ្យសាបវិនាស។
លោកនាយករដ្ឋមន្ត្រីកាណាដា បានឆ្លៀតសង្កត់ធ្ងន់ថា “នេះគឺជាឱកាសរបស់យើងគ្រប់គ្នា ដែលជាអ្នកដឹកនាំប្រទេស និងជាអ្នកទទួលបន្ទុកវាសនារបស់ប្រជាជនយើង។ ដើម្បីកុំឲ្យមានវិប្បដិសារី ហើយចៀសវៀងកូនចៅជំនាន់ក្រោយស្តីបន្ទោសយើង គឺពេលនេះហើយ ដែលក្នុងនាមជាថ្នាក់ដឹកនាំ យើងត្រូវធ្វើអ្វីមួយឲ្យត្រឹមត្រូវ ដើម្បីមនុស្សជាតិ”។ លោកJustin Trudeau មិនបានភ្លេចបញ្ជាក់ទេថា មួយថ្ងៃៗ មានមនុស្សប្រមាណ៨ពាន់នាក់ ដែលស្លាប់ដោយជំងឺឆ្លងទាំងនេះ។
សូមរំលឹកថា មូលនិធិពិភពលោកប្រយុទ្ធនឹងជំងឺស៊ីដា ជំងឺរបេង និងជំងឺគ្រុនចាញ់នេះ ត្រូវបានបង្កើតឡើងក្នុងឆ្នាំ២០០២ ក្នុងគោលបំណងប្រមូលថវិកា ពីសំណាក់ ប្រទេសផ្តល់ជំនួយនិងសប្បុរសជនទាំងអស់ ដើម្បីបំរើដល់យុទ្ធនាការកម្ចាត់ជំងឺទាំងនេះ។ កម្មវត្ថុនៃសន្និសីទលើកនេះ គឺដើម្បីប្រមូលថវិកាចំនួន ១៣ពាន់លានដុល្លារ សម្រាប់ការចំណាយរវាងពីឆ្នាំ២០១៧-២០១៩ ដែលសំដៅកម្ចាត់ជំងឺឆ្លងទាំងបីខាងលើ ឲ្យអស់ ក្នុងឆ្នាំ២០៣០។ ប្រទេសតំបន់ទ្វីបអាហ្វ្រិក គឺជាប្រទេសដែលប្រឈមមុខខ្លាំងជាងគេ ហើយការឆ្លងរាលដាលនៃជំងឺទាំងនេះ គឺជាប្រភពនៃភាពក្រីក្រ ជាពិសេសសម្រាប់ស្ត្រីនិងកុមារ។
តាមការប៉ាន់ស្មាន ថវិកាសរុប អាចនឹងត្រូវប្រមូលបានតាមការរំពឹងទុក។ ក្នុងចំណោមប្រទេសផ្តល់ថវិកា សហរដ្ឋអាមេរិកជាប្រទេសនាំមុខគេ ដោយបានផ្តល់ចំនួន ៤៣០០លានដុល្លារ បន្ទាប់មកមានបារាំង ដែលបានផ្តល់ ១១០០លានអឺរ៉ូ អាល្លឺម៉ង់ ៨០០លានអឺរ៉ូ ជប៉ុន៨០០លានដុល្លារ និងកាណាដា ៦០០លានដុល្លារ។ ដោយឡែកមូលនិធិលោកBill Gates បានផ្តល់ថវិកាចំនួន១៦០០លានដុល្លារ ចាប់តាំងពីមូលនិធិលោក ត្រូវបានបង្កើតឡើង។
គួរបញ្ជាក់ផងដែរថា យោងតាមតួលេខរបស់មូលនិធិពិភពលោក ប្រយុទ្ធនឹងជំងឺស៊ីដា ជំងឺរបេង និងជំងឺគ្រុនចាញ់នេះ ចាប់តាំងពីឆ្នាំ២០០៥មក ជីវិតមនុស្សប្រមាណជា២២លាននាក់ ត្រូវបានជួយសង្គ្រោះ ហើយការឆ្លងចំនួនប្រមាណជា៣០០លានករណី ត្រូវបានបញ្ចៀស។ ទាំងអស់នេះ គឺដោយមានថវិកាចំណាយ ចំនួនប្រមាណជា៣០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ