វ៉េណេហ្ស៊ុយអេឡា៖ គណបក្សប្រឆាំងប្រមូលស្នាមមេដៃគ្រប់គ្រាន់ ដើម្បីសុំធ្វើប្រជាមតិដេញប្រធានាធិបតី
វិបត្តិនយោបាយរបស់វ៉េណេហ្ស៊ុយអេឡា ដែលបណ្តាលមកពីវិបត្តិសេដ្ឋកិច្ចធ្ងន់ធ្ងរ បានបន្តធ្វើឲ្យប្រទេសនេះកំពុងធ្លាក់ក្នុងរណ្តៅ ដែលពុំមានច្រកចេញពិតប្រាកដ។ នៅថ្ងៃសៅរ៍ ទី២៥មិថុនា នេះក្រុមគណបក្សប្រឆាំង បានប្រមែលប្រមូលហត្ថលេខានិងស្នាមមេដៃរបស់ប្រជាជន បានគ្រាប់គ្រាន់ទៅតាមនីតិវិធីច្បាប់ ដើម្បីទាមទារឲ្យមានការធ្វើប្រជាមតិទូទៅមួយ សំដៅបណ្តេញលោកប្រធានាធិបតីប្រទេសនេះ ឲ្យចុះចេញពីតំណែង។
ចុះផ្សាយនៅថ្ងៃ៖
ក្រុមសហភាពប្រជាធិតបតេយ្យវ៉េណេហ្ស៊ុយអេឡា ដែលជាក្រុមគណបក្សប្រឆាំង បានប្រកាសថា ពួកគេបានប្រមូលស្នាមមេដៃរបស់ប្រជាជនទូទាំងប្រទេស គ្រប់ទៅតាមចំនួនដែលច្បាប់ទាមទារ ពោលគឺ២សែនមេដៃ។ អ្នកនាំពាក្យគណបក្សប្រឆាំង បានបញ្ជាក់ថា តាមពិតចំនួនស្នាមេដៃ ប្រមូលបានទូទាំងប្រទេស បានលើសដល់ទៅ២ដងឯណោះ។ ដូច្នេះ គណបក្សប្រឆាំង អាចស្នើសុំទៅក្រុមប្រឹក្សាជាតិរៀបចំការបោះឆ្នោត ដើម្បីរៀបចំធ្វើការបោះឆ្នោតប្រជាមតិមួយ។ កម្មវត្ថុនៃការបោះឆ្នោតប្រជាមតិនេះ គឺដើម្បីបណ្តេញលោកប្រធានាធិបតី Nicolas Maduro ចេញពីតំណែង។
សូមបញ្ជាក់ថា យោងតាមនីតិវិធី គណបក្សដែលចង់ស្នើរសុំប្រជាមតិ មានពេល៥ថ្ងៃ ដើម្បីប្រមូលស្នាមមេដៃគាំទ្ររបស់ប្រជាជន ឲ្យបាន២សែននាក់។ នៅចន្លោះពីថ្ងៃចន្ទ ដល់ថ្ងៃសុក្រ ម្សិលមិញនេះ ប្រជាជនវ៉េណេហ្ស៊ុយអេឡា បាននាំគ្នាទៅកាន់ការិយាល័យបោះឆ្នោត ដើម្បីផ្តិតមេដៃគាំទ្រ រហូតដល់ទៅជាង៤សែននាក់។
ក្រុមគណបក្សប្រឆាំង ក៏បានធ្វើការបរិហារផងដែរ អំពីចំណាត់ការរបស់អាជ្ញាធរ និងបក្សពួករបស់រដ្ឋាភិបាល ដែលគ្រប់គ្រងក្រុមប្រឹក្សាជាតិរៀបចំការបោះឆ្នោត ព្រោះពួកគេបានបង្កការរាំងស្ទះ ទាំងពេលវេលា និងសម្ភាៈ ដើម្បីធ្វើយ៉ាងណាកុំឲ្យមានស្នាមមេដៃ បានគ្រប់ចំនួន ទាន់ពេលវេលា។
យ៉ាងណាក៏ដោយ ក្រុមប្រឹក្សាជាតិរៀបចំការបោះឆ្នោត នឹងត្រូវសម្រេចនៅថ្ងៃទី២៦កក្កដា ខាងមុខនេះ ថាតើត្រូវរៀបចំការធ្វើប្រជាមតិដែររឺទេ។ ក្រុមគណបក្សប្រឆាំងសង្ឃឹមថា នឹងធ្វើប្រជាមតិឲ្យបានមុនថ្ងៃទី១០មករា ២០១៧ ដើម្បីមានឱកាសរៀបចំការបោះឆ្នោតប្រធានាធិបតីថ្មីមុនអាណត្តិ។
សូមបញ្ជាក់ថា វេណេហ្ស៊ុយអេឡា កំពុងតែកប់ជ្រៅក្នុងវិបត្តិសេដ្ឋកិច្ចយ៉ាងធ្ងន់ធ្ងរ ដោយសារតែសេដ្ឋកិច្ចប្រទេសនេះ រំពឹងតែទៅលើការនាំប្រេងចេញតែមួយគត់។ តម្លៃប្រេងឆៅបានធ្លាក់មួយជាបី ក្នុងរយៈពេលជិត២ឆ្នាំមកនេះ បានធ្វើឲ្យចំណូលរដ្ឋរបស់វេណេហ្ស៊ុយអេឡា ខាតបង់ជាខ្លាំង។ ជាមួយនឹងអំពើពុករលួយ កំហឹងរបស់ប្រជាពលរដ្ឋបានរីកកាន់តែធំ ហើយបានបង្ករជាចលាចល និងអំពើហិង្សាក្នុងសង្គម។ កង្វះទំនិញក្នុងទីផ្សារ បានកើនឡើងដល់ទៅ៨០% ហើយអតិផរណា ក៏បានកើនរហូតដល់ ១៨០% ក្នុងឆ្នាំ២០១៥។ អំពើហិង្សា ឆក់ប្លន់ និងកាប់សម្លាប់ បានកើនឡើងគួរឲ្យព្រួយបារម្ភ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ