វ៉េណេស៊ុយអេឡា៖ រ្ហ័ន ហ្កាយដូ បន្តអំពាវនាវឲ្យរៀបចំការបោះឆ្នោត ខណៈសហគមន៍អន្តរជាតិ គាំទ្រកាន់តែច្រើន
នៅប្រទេសវ៉េណេស៊ុយអេឡា លោករ័្ហន ហ្កាយដូ ប្រធានក្រុមប្រឆាំង បានបន្តអំពាវនាវ និងដាក់សំពាធ ទៅលើរដ្ឋាភិបាលរបស់លោក នីកូឡា ម៉ាឌូរ៉ូ ថាត្រូវតែរៀបចំការបោះឆ្នោតសាជាថ្មី ឲ្យមានភាពសេរីយុត្តិធម៌។ បើទោះបីជា កិច្ចប្រជុំនៅក្រុមប្រឹក្សាសន្តិសុខ កាលពីថ្ងៃសៅរ៍ទី២៦មករា បានចេញជាលទ្ធផលអ្វីក៏ដោយ ក៏ប៉ុន្តែ លោក រ័្ហន ហ្កាយដូ បានទទួលការគាំទ្រ កាន់តែច្រើន ពីសំណាក់សហគមន៍អន្តរជាតិ ដែលបាននាំគ្នា ដាក់ឧស្សានុវាទ ឲ្យរដ្ឋាភិបាលលោកនីកូឡា ម៉ាឌូរ៉ូ រៀបចំការបោះឆ្នោតសាជាថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
“យើងនឹងបន្ត ដើរទៅមុខ ដើម្បីស្តារសិទ្ធិសេរីភាព និងលទ្ធិប្រជាធិបតេយ្យ។ ពិភពលោកទាំងមូល បានឮ ពីការប្តេជ្ញាចិត្ត របស់ប្រជាជនវ៉េណេស៊ុយអេឡា”។ នេះគឺជាសារ ដែលលោក រ័្ហន ហ្កាយដូ ប្រធានសភាវ័យ៣៥ឆ្នាំ បានសរសេរនៅលើទំព័រ Twitter។
មួយថ្ងៃក្រោយការប្រជុំនៅក្រុមប្រឹក្សាសន្តិសុខអង្គការសហប្រជាជាតិ បើទោះបីជារុស្ស៊ី ព្យាយាមនិយាយរិះគន់ មិនចង់ឲ្យកិច្ចប្រជុំនេះ អាចកើតមានឡើង គឺប្រទេសជាច្រើន បាននាំគ្នា ប្រកាសគាំទ្រ ឲ្យមានការបង្កើតរដ្ឋាភិបាលបណ្តោះអាសន្ន និងរៀបចំការបោះឆ្នោតសាជាថ្មី នៅវ៉េណេស៊ុយអេឡា។ ក្រៅពីសហរដ្ឋអាមេរិក និងប្រទេសជាច្រើននៅតំបន់អាមេរិកខាងត្បូង សហភាពអឺរ៉ុប និងប្រទេសសាមជិកខ្លួន មួយចំនួន ក៏បានប្រកាសក្នុងន័យនេះដែរ។
បារាំង អេស្ប៉ាញ អង់គ្លេស អាល្លឺម៉ង់ បែលហ្សិកជាដើម បានប្រកាសជំហរ ដាក់ឱស្សានុវាទ ទៅរដ្ឋាភិបាលលោក នីកូឡា ម៉ាឌូរ៉ូ ថាត្រូវតែប្រកាសរៀបចំការបោះឆ្នោត ក្នុងរវាង៨ថ្ងៃទៀត ពុំដូច្នោះទេ ប្រទេសទាំងនេះ នឹងប្រកាសទទួលស្គាល់ រដ្ឋាភិបាលបណ្តោះអាសន្ន របស់លោក រ័្ហន ហ្កាយដូ។
គួរកត់សំគាល់ថា ជាមួយនឹងការគាំទ្រ ពីសហគមន៍អន្តរជាតិ លោករ័្ហន ហ្កាយដូ បានបន្តដាក់សំពាធ និងអំពាវនាវអូសទាញ ឲ្យមនុស្សក្នុងបក្សលោកនីកូឡា ម៉ាឌូរ៉ូ ព្រមទាំងកងទ័ពផង ឲ្យងាកមកគាំទ្រលោក។ លោករ័្ហន ហ្កាយដូ បានបញ្ជាក់ឲ្យដឹងដែរថា លោកបានជួបនិយាយគ្នា ជាមួយនឹង សមាជិករដ្ឋាភិបាល លោកនីកូឡា ម៉ាឌូរ៉ូ មួយចំនួន។ ប្រធានក្រុមប្រឆាំងវ័យក្មេងរូបនេះ ក៏បានប្រកាស សន្យាថា កម្លាំងទាហាន និងកងនគរបាល ដែលស្ម័គ្រចិត្ត ឈប់ការពាររបបលោកនីកូឡា ម៉ាឌូរ៉ូ នឹងអាចចូលរួមក្នុងការកសាងប្រទេស ហើយនឹងពុំមានការចាប់ទោសអូសដំណើរអ្វីទេ។
គួររំលឹកថា កាលពីថ្ងៃសុក្រ រដ្ឋមន្ត្រីការពារជាតិវ៉េណេស៊ុយអេឡា អមដោយមេទ័ពធំៗ បានប្រកាសថាខ្លួននឹងស្មោះស្ម័គ្រ នៅពីក្រោយលោកនីកូឡា ម៉ាឌុយរ៉ូ ជានិច្ច។ តែដោយឡែក កាលពីល្ងាចថ្ងៃសៅរ៍ ម្សិលមិញនេះ លោកមេបញ្ជាការ José Luis Silva ដែលជាតំណាងបេសកកម្មពិសេស ប្រចាំនៅសហរដ្ឋអាមេរិក បានប្រកាសឈប់ទទួលស្គាល់ភាពស្របច្បាប់ របស់លោកប្រធានាធិបតី ម៉ាឌូរ៉ូ ហើយបានអំពាវនាវ ឲ្យកងទ័ព ងាកទៅជ្រោមជ្រែងលោក រ័្ហន ហ្កាយដូវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ