សហរដ្ឋអាមេរិក បារម្ភពីភេរវកម្មក្រោយករណីផ្ទុះគ្រាប់បែកផ្ទួនៗ និងករណីយកកាំបិតចាក់មនុស្ស
នៅរដ្ឋមីណេសូតា កាលពីល្ងាចថ្ងៃសៅរ៍ ទី១៧កញ្ញា មានហេតុការណ៍គួរឲ្យរន្ធត់មួយបានកើតឡើង ដោយមានបុរសម្នាក់ បានដើរយកកាំបិតចាក់មនុស្សជាច្រើននាក់ នៅក្នុងផ្សារទំនើបមួយកន្លែង។ តាមការឲ្យដឹងពីសាក្សីនៅកន្លែងកើតហេតុ ជននេះបានស្រែកឧទ្ទិសដល់ព្រះអាឡា ក្នុងពេលកំពុងធ្វើសកម្មភាព។ ហេតុការណ៍នេះ បានកើតឡើងផ្ទួនៗគ្នា ជាមួយនឹងហេតុការណ៍ផ្ទុះគ្រាប់បែកផ្សេងទៀត នៅសហរដ្ឋអាមេរិក។ យ៉ាងណាក៏ដោយ អាជ្ញាធរ នៅមិនទាន់មានភស្តុតាងគ្រប់គ្រាន់ អាចចាត់ទុកថាអំពើទាំងនេះជាអំពើភេរវកម្មទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
តាមការឲ្យដឹងពីនគរបាលរដ្ឋមីណេសូតា ភាគខាងជើងសហរដ្ឋអាមេរិក បុរសម្នាក់ ក្នុងសំលៀកបំពាក់ជាសន្តិសុខឯកជន បានចូលទៅក្នុងផ្សារទំនើបមួយកន្លែង ហើយបានដកកាំបិតចាក់មនុស្សជាច្រើននាក់ នៅវេលាម៉ោង៨យប់។
សាក្សីជាច្រើននាក់ បានអះអាងថា ជននេះ បានស្រែកសួរជនរងគ្រោះ ថាតើគេជាអ្នកកាន់អ៊ីស្លាមរឺទេ មុននឹងយកកាំបិតចាក់។ មិនត្រឹមតែប៉ុណ្ណោះ តាមសាក្សីដដែល ជននេះបានស្រែកឧទ្ទិសជាភាសាអារ៉ាប់ ដល់ព្រះអាឡា ក្នុងពេលធ្វើសកម្មភាពទៀតផង។
យ៉ាងហោចណាស់ មានមនុស្ស៨នាក់ ដែលបានរងរបួសក្នុងហេតុការណ៍នេះ ហើយក្នុងចំណោមនេះ មាន២នាក់ កំពុងស្ថិតក្នុងការសង្រ្គោះបន្ទាន់ក្នុងមន្ទីរពេទ្យ នៅឡើយ។ ចំណែកជនដៃដល់ ត្រូវបាននគរបាលម្នាក់ បាញ់សម្លាប់នៅនឹងកន្លែង តែនគរបាលនោះ ស្ថិតក្នុងសម្លៀកបំពាក់ស៊ីវីល ហើយមិនស្ថិតនៅក្នុងម៉ោងធ្វើការទេ។
តាមការឲ្យដឹងពីអធិការនគរបាល រដ្ឋមីណេសូតា ជនដៃដល់ ត្រូវបានគេដឹងអត្តសញ្ញាណហើយ ហើយជននេះមិនមានប្រវត្តិទាក់ទងនឹងបទឧក្រិដ្ឋ រឺបណ្តាញភេរវកម្មណាមួយទេ។ គិតមកត្រឹមពេលនេះ នគរបាល នៅមិនទាន់អាចសន្និដ្ឋានថា សកម្មភាពនេះជាអំពើភេរវកម្មនៅឡើយទេ ហើយក៏មិនទាន់អាចសន្មត់ថាសកម្មភាពយកកាំបិតដើរចាក់នេះ ត្រូវបានបញ្ជាដោយបណ្តាញជីហាដណាមួយ រឺមួយក៏ជាចេតនាឯកឯងរបស់ជនដៃដល់នោះឡើយ។
គួរកត់សំគាល់ដែរថា ករណីនេះ បានកើតឡើង ស្របពេលគ្នា ជាមួយនឹងករណីផ្ទុះ២កន្លែងផ្សេងទៀត ក្នុងថ្ងៃតែមួយ។ ទីមួយគឺករណីផ្ទុះនៅក្នុងសង្កាត់ Chelsea ទីក្រុងញូយ៉ក វេលាម៉ោងប្រហែល៨ និង៣០នាទីយប់ ដែលបានបង្កឲ្យរបួសមនុស្ស២៩នាក់។ ករណីផ្ទុះមួយទៀត បានកើតឡើងនៅរដ្ឋNew Jersey កាលពីថ្ងៃសោរ៍ដែរ ដោយគ្រាប់បែកមួយត្រូវបានគេដាក់បង្កៃក្នុងធុងសំរាម តាមផ្លូវដែលជាផ្លូវរត់ប្រណាំងរបស់ទាហានជើងទឹកអាមេរិក។ ជាសំណាងល្អ ការចេញដំណើររត់ប្រណាំង បានមានការយឺតយ៉ាវ ហើយគ្រាប់បែកបានផ្ទុះមុនពេលដែលក្រុមអ្នករត់ប្រណាំងមកដល់ ហើយមិនបានបង្កឲ្យមាននរណារងរបួសទេ។
អាជ្ញាធរកំពុងតែស៊ើបអង្កេត ស្វែងរកភស្តុតាងបន្ថែម ដោយក្នុងពេលនេះ គេមិនទាន់អាចសន្និដ្ឋានថាគ្រាប់បែកផ្ទុះទាំងនេះ ជាអំពើភេរវកម្មទេ។ យ៉ាងណាក៏ដោយ ព្រឹត្តិការណ៍ផ្ទួនៗគ្នាបែបនេះ បានបង្កជាអារម្មណ៍ភ័យខ្លាចសម្រាប់ប្រជាជនអាមេរិក ជាពិសេស អ្នកទីក្រុងញូយ៉ក ដែលទើបតែបានប្រារព្ធខួបគំរប់១៥ឆ្នាំ នៃអំពើភេរវកម្មថ្ងៃទី ១១កញ្ញា ២០០១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ