សន្និសីទជាន់ខ្ពស់លើកទីពីរស្តីពីសន្ដិសុខអាកាសចរណ៍អន្តរជាតិ
ទីក្រុងម៉ុងរ៉េអាល់ធ្វើជាម្ចាស់ផ្ទះរៀបចំសន្និសីទជាន់ខ្ពស់លើកទីពីរស្តីពីសន្ដិសុខអាកាសចរណ៍អន្តរជាតិក្នុងក្របខណ្ឌនៃអង្គការអាកាសចរណ៍ស៊ីវិលអន្តរជាតិ (OACI) ចាប់ពីថ្ងៃចន្ទ ២ ដល់ថ្ងៃព្រហស្បតិ៍ ខែកុម្ភៈសប្តាហ៍នេះ នៅឯ ទីស្នាក់ការកណ្តាលរបស់ OACI ក្នុងកណ្តាលទីក្រុងម៉ុងរ៉េអាល់។
ចុះផ្សាយនៅថ្ងៃ៖ កែប្រែថ្ងៃទី៖
អង្គការអាកាសចរណ៍ស៊ីវិលអន្តរជាតិ (OACI) ជាសខាមួយនៃអង្គការសហប្រជាជាតិ ដែលមាន បេសកកម្មក្នុងការបង្កើតស្តង់ដានៃអាកាសចរអន្ដរជាតិ ដោយសហការជាមួយនឹងអជ្ញាធរនៃ ប្រទេសសមាជិកចំនួន១៩១ប្រទេស។
ជំុវិញហេតុការណ៍គ្រោះថ្នាក់ថ្មីៗនៃការធ្វើដំណើរតាមផ្លូវអាកាស យើងអាចរាប់ឃើញមាន ចំនួនបី សំខាន់ៗ ដែលបានកើតឡើងនៅក្នុងឆ្នាំ២០១៤ ទីមួយគឺ កាលពីខែមីនា យន្តហោះ លេខ MH370 របស់ក្រុមហ៊ុនអាកាសចរណ៍ម៉ាឡេស៊ីបានលិចនៅក្នុងមហាសមុទ្រឥណ្ឌាដោយមានផ្ទុកអ្នកដំណើរ ចំនួន២៣៩នាក់។ ទីពីរគឺកាលពីខែកក្កដា ជើងហោះហើរមួយផ្សេងទៀត នៃក្រុមហ៊ុនអាកាសចរណ៍ ម៉ាឡេស៊ីក៏បានទទួលការវាយប្រហារដោយមីស៊ីលនៅភាគខាងកើតប្រទេសអ៊ុយក្រែន ដែលសម្លាប់មនុស្សទាំងអស់២៩៨នាក់។ បន្ទាប់មកទី៣ នៅក្នុងខែធ្នូជើងហោះហើរ QZ8501 របស់ក្រុមហ៊ុន AirAsia បានបាត់ខ្លួននៅសមុទ្រដោយមានអ្នកដំណើរ ១៦២ ដែលត្រូវបានគេសន្មត់ថាស្លាប់ក្នុងហេតុការណ៍នោះផងដែរ។
ទាំងនេះជាស្ថានភាពនៃចំណោទបញ្ហាដែលតម្រូវឲ្យ អង្គការការអាកាសចរណ៍ស៊ីវិលអន្តរជាតិ (OACI) បង្កើតផែនការសកម្មភាពជាដំណាក់ៗដើម្បីរកឲ្យឃើញឲ្យបានយ៉ាងឆាប់រហ័សនូវជើងហោះហើរណា មួយដែលជួបការលំបាកក្នុងពេលហោះហើរ។
យោងតាមប្រភពពត៌មានការទូតបានឲ្យដឹងកាលពីថ្ងៃសុក្រកន្លងទៅថា គណៈកម្មាការអាកាសចររបស់ អង្គការ OACI នេះ បានរៀបចំនូវសេចក្តីបង្គាប់មួយចំនួនដែលនឹងត្រូវដាក់ជូនអង្គសន្និសីទពិនិត្យក្នុងសប្តាហ៍នេះ។ កិច្ចប្រជុំចំនួនបួនថ្ងៃនេះនឹងពិភាក្សាជំុវិញប្រធានបទចំនួនបី៖ ទីមួយគឺពិនិត្យឡើងវិញពីស្ថានភាពបច្ចុប្បន្ន ទីពីរ គឺស្វែងរកវិធីសាស្រ្តសម្រាប់ពេលអនាគតដើម្បីគ្រប់គ្រងសុវត្ថិភាពអាកាសចរណ៍ និងទី៣គឺការសម្របសម្រួលដើម្បីបង្កើនកិច្ចសហប្រតិបត្តិការក្នុងតំបន់។ អង្គសន្និសីទក៏នឹងធ្វើការសង្កត់ធ្ងន់ទៅលើហានិភ័យនៃប្រតិបត្ដិការហោះហើរ និងលើការតាមដានការហោះហើរនៅក្នុងតំបន់មានជម្លោះផងដែរ។ ហើយដែលក្នុងនោះគេរំពឹងថានឹងមានវិធានការដែលតម្រូវឲ្យ យន្តហោះទាំងអស់នឹងត្រូវមានការតាមដានក្នុង ការហោះហើរដោយការបញ្ជូនសញ្ញារៀងរាល់មួយនាទីម្តង ក្នុងករណីមានជួបនូវឧបទ្ទវហេតុ ឬបញ្ហាណាមួយ ដើម្បីអាចឲ្យគេកំណត់ឲ្យបានច្បាស់ពីទីតាំងនៃយានដែលបានធ្លាក់ជាយថាហេតុ។
បន្ទាប់ពីសន្និសីទនេះ ប្រទេសជាមាជិកទាំង១៩១មានរយៈពេលបីខែដើម្បីផ្តល់ជាយោបល់ធ្វើ មូលវិចារណ៍លើសេចក្តីបង្គាប់នោះ មុននឹងបង្កើតជាសំណៅចុងក្រោយដាក់ជូនឲ្យក្រុមប្រឹក្សារបស់ អង្គការនេះបោះឆ្នោតសម្រេចឲ្យបានមុនចុងឆ្នាំ២០១៥ នេះបើផ្អែកតាមប្រភពពត៌មានការទូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ